Ezikɛl 44 - EBƆRƐ BE KAWƆL

Epeŋilarkpa be kabunagboŋ na be asheŋ

¹ Ndoŋ nna nɛ kanyɛn na naŋ keta ma n yɔ kowushina be kelɔnɛ na so a mata bɔrɛlambu na be kabunagboŋ nɛ k wɔ epeŋilarkpa be kaba so na. Nɛ n wu fanɛ kumo be akuloŋ na daŋ ti nna.

² Nɛ Enyɛnpe Ebɔrɛ na kaŋɛ ma le: “Kabuna ere nɛ ma Enyɛnpe, Israɛl be Ebɔrɛ na bɔla to n luri bɔrɛlambu na to, amoso, a daga fanɛ k baŋ ti loŋ mbaanaayɔ! Esa kama e sa maŋ naŋ bɔla kumo to n luri kikɛ.

³ Israɛl be ewura beeŋ tiŋ m ba nfe m ba ji ajibi nɛ b ta n lara sarga n sa ma, ama a daga fanɛ e bɔla kabunagboŋ ere be kedɛdɛ na to nna n luri ŋko n lar.”

Basa nɛ b maŋ daga keluri bɔrɛlambu na to be asheŋ

⁴ Ndoŋ nna nɛ kanyɛn na keta ma m bɔla kelargato be esoso be kabuna na to n yɔ bɔrɛlambu na be anishito nɛ n to kenishi ŋ keni nseŋ wu fanɛ Enyɛnpe Ebɔrɛ be kemaŋkura bɔlɔ bɔrɛlambu na to. Ndoŋ nna nɛ n ta ma enɔana m buu ma anishi so nseŋ kurgi kumu n yuu to.

⁵ Nɛ Enyɛnpe Ebɔrɛ na kaŋɛ ma le: “Dimɛdi pibi, Ezikɛl, shin nɛ fo lakal e baa wɔ kusɔ kama nɛ feeŋ wu nsaa nu ashi nfe so. Mbraana nɛ a wɔ bɔrɛlambu na to nɛ mee sha kekaŋɛ fo na. Baa de so nɛnɛ a nyi basa nɛ baaŋ tiŋ n luri nɛ bumo nɛ b maaŋ tiŋ n luri bɔrɛlambu na to.

⁶ Kaŋɛ Israɛl be basa nɛ b kini ma nseŋ lar ma kaman na fanɛ ma, Enyɛnpetale Ebɔrɛ na maŋ naa ba nɛ n sɔ ekishisheŋ nɛ baa wora na kikɛ.

⁷ B wora eyurpisheŋ n jija ma bɔrɛlambu ŋkpal b ka shin nɛ befɔ nɛ b maa ŋana Ebɔrɛ luri kumo to jemanɛ nɛ baa lara esarga a sa ma na so. Amoso, ma basa wora kulubi nseŋ da ma nɛ bumo be kɔnɔkoŋwule be ŋkre na so.

⁸ Bumo gbagba ka beeŋ baa wora asɔ nɛ a daga a laŋɛ esarga cheembi na kaplɛa so ashi bɔrɛlambu na to so na, befɔ nɛ b ta loŋ be kushuŋ nna n sa.

⁹ Amoso kusɔ nɛ ma, Enyɛnpetale Ebɔrɛ na, bee kaŋɛ e la fanɛ efɔ kama nɛ e maa ŋana Ebɔrɛ nsaa maa nu a sa ma maŋ daga keluri ma bɔrɛlambu to, hale efɔ nɛ e chena Israɛl be basa na to gba maŋ daga keluri kumo to.”

Livaiebi ko kaa nya kasogberge be asheŋ

¹⁰ Kede be kaman nɛ Enyɛnpe Ebɔrɛ na naŋ kaŋɛ ma le: “Mee sha kegberge Livaiebi nɛ b tu Israɛl be basa na ŋ kini ma nseŋ ya shuŋ agbirana na kusoe nna na.

¹¹ B kraa beeŋ tiŋ a shuŋ bɔrɛlambu na to fanɛ basa nɛ baa keni mbunaana na so nseŋ naŋ tiŋ n chɛ basa na to m mɔ asɔbɔya nɛ b ta a lara esarga na.

¹² Ama ŋkpal Livaiebi ere ka chɛ Israɛl be basa na to jemanɛ nɛ b daa shuŋ agbirana na so, ma, Enyɛnpetale Ebɔrɛ na bee nase kɔnɔ nna fanɛ Livaiebi na beeŋ nya kasogberge.

¹³ B maaŋ naŋ tiŋ n shuŋ ma fanɛ bɔrɛmatapoana ŋko n yɔ ma kusɔ cheembi kama ase ŋko n luri bɔrɛlambu na to be acheembiana to be kakpa cheembi na to. Ekishisheŋ nɛ b wora na be kasogberge nna na.

¹⁴ Ashuŋ kpakpaso nawule nɛ mee sa bumo ekpa fanɛ b baa shuŋ ashi bɔrɛlambu na to.”

Mbraana nɛ a wɔtɔ n sa bɔrɛmatapoana be asheŋ

¹⁵ Kumo be kaman, nɛ Enyɛnpetale Ebɔrɛ na kaŋɛ le: “Livai be yiri to be bɔrɛmatapoana nɛ b shi kanyɛn nɛ baa tre Zadɔk na be kabuna na bre daŋ maŋ kini ma kushuŋ bɔrɛlambu na to nseŋ ya shuŋ agbirana jemanɛ nɛ Israɛl be basa na daŋ kini ma na. Amoso bumo e naŋ tiŋ m ba ma anishi to m ba shuŋ ma fanɛ bɔrɛmatapoana nseŋ ta asɔbɔya be nfɔ nɛ ŋklaŋ n lara esarga.

¹⁶ Zadɔk be kabuna ebi na nawule e naŋ tiŋ n luri bɔrɛlambu na to n shuŋ bɔrɛsure na ase nseŋ naŋ tiŋ n juŋkpar basa nɛ baa shuŋ ma na.

¹⁷ A daga fanɛ b buu bɔrɛmatapoana be epiŋi lela na nna n luri bɔrɛlambu na be epun to be kelɔnɛ na so. A maŋ daga fanɛ b baa buu asɔbuuso nɛ b ta ateebi n lue jemanɛ nɛ b wɔ kushuŋ to ashi epun to be kelɔnɛ na so ŋko bɔrɛlambu na gbagba to.

¹⁸ A daga fanɛ b baa buu ago be kechɛbi be asɔbuuso nna nsaa chɛ ago be achɛbi be eneemu, saŋɛ na so b maaŋ baa pa kebleŋ jemanɛ nɛ baa shuŋ bumo be kabɔrɛmata be kushuŋ na.

¹⁹ Pɔɛŋ nɛ b lar n yɔ kowushina be kelɔnɛ na so ashi kakpa nɛ basa wɔ na, a daga fanɛ b lara epiŋi nɛ b buu a shuŋ bɔrɛlambu na to na n nase ebu cheembiana na to nna. Kumo be kaman nɛ b ta asɔbuuso pɔtɛ m buu n lar, saŋɛ na so bumo be asɔbuuso cheembi na maaŋ bar tɔrɔ basa so.

²⁰ Bɔrɛmatapoana maŋ daga fanɛ b she bumo be emin ŋko n shin nɛ e daŋ tenteŋ. A daga fanɛ b baa digi amo so nna.

²¹ Bɔrɛmatapoana maŋ daga fanɛ b nuu yabra pɔɛŋ nseŋ luri bɔrɛlambu na be epunto be kelɔnɛ na to.

²² Bɔrɛmatapowura kikɛ maŋ daga fanɛ e ta eche nɛ mo kul kini mo. A daga fanɛ e ta Israɛl to be eche nɛ e maŋ nyi enyɛn ŋko eche nɛ mo kul daa la bɔrɛmatapo nseŋ wu ŋ ka nawule nna.

²³ Bɔrɛmatapoana na e daga fanɛ b baa ŋini ma basa kusɔ nɛ k du cheembi nɛ kusɔ nɛ k maŋ du cheembi nseŋ naŋ ŋini bumo kusɔ nɛ k walɛ so daŋkare be ekpa so nɛ kusɔ nɛ k maŋ walɛ so daŋkare be ekpa so nɛ b pin amo be mbarga.

²⁴ Nɛ kesheŋ ko koso nɛ a daga fanɛ b ji kumo mbra be ekpa so, bɔrɛmatapoana na beeŋ keni ma mbraana so nna n ji kumo. Kananɛ ma mbraana nɛ atande bee ŋini na nɛ baaŋ baa yili so a ji bumo be kabɔrɛshuŋ be nchɛgboŋana, nseŋ shin nɛ Kewushiachɛ na e baa la kachɛ cheembi n sa bumo.

²⁵ Bɔrɛmatapowura maŋ daga fanɛ e beta kebuni kikɛ nseŋ wora eyurpi daŋkare be ekpa so, ama k baa la mo tuto ŋko mo nio ŋko mo pibi ŋko mo niopibi nyɛnso ŋko mo niopibi cheso nɛ e maa kil be kebuni nna.

²⁶ Kumo be kaman nɛ e ka naŋ nyalɛ so daŋkare be ekpa so, a daga fanɛ e jo nchɛ ashunu pɔɛŋ

²⁷ nseŋ yɔ bɔrɛlambu na be epunto be kelɔnɛ na to n ya lara sarga nɛ k beeŋ shin nɛ e nyalɛ so, saŋɛ na so e beeŋ naŋ tiŋ a shuŋ bɔrɛlambu na to. Ma, Enyɛnpetale Ebɔrɛ na, e kaŋɛ na.

²⁸ Kebɔrɛmata be kushuŋ na e la bɔrɛmatapoana be kapetɛ nɛ baaŋ tiŋ n yige n sa bumo be kenana. B maŋ daga fanɛ b baa kɔ kapetɛsɔ kikɛ Israɛl to. Ma e la bumo be kapetɛ.

²⁹ Ayu be esarga nɛ kulubi be esarga nɛ kewora n jija be esarga kikɛ beeŋ baa la bɔrɛmatapoana be asɔ jiso nna. Kumo be kaman, kusɔ kama nɛ b kɛ ma ashi Israɛl to kikɛ gba la bumo peya nna.

³⁰ Adɔjibi kama nɛ b juŋkpar n teŋi nɛ kusɔ kama nɛ b ta n sa ma beeŋ baa la bɔrɛmatapoana na peya nna. Jemanɛ kikɛ nɛ basa na wora ebodobodo, a daga fanɛ b ta bodobodo nɛ b juŋkpar n wora na n sa bɔrɛmatapoana fanɛ kakɛ nɛ k bee yɔ Ebɔrɛ kutɔ, saŋɛ na so ma nɛfa beeŋ baa wɔ bumo be elaŋana so.

³¹ Bɔrɛmatapoana maŋ daga fanɛ b ji kusɔbɔya ŋko kabuibi nɛ k wu kpi ŋko kumo nɛ kusɔbɔya pɔtɛ mɔ n ji ŋ ka be eblaŋ.”