Ezikɛl 43 - EBƆRƐ BE KAWƆL

Enyɛnpe Ebɔrɛ be kemaŋkura ka bɛta m ba bɔrɛlambu na to be asheŋ

¹ Ade kikɛ be kaman nɛ kanyɛn na keta ma n yɔ bɔrɛlambu na be kabunagboŋ nɛ k shoŋi epeŋilarkpa na ase.

² Ndoŋ nɛ n wu Israɛl be Ebɔrɛ na be kemaŋkura ka bee nyɛkpɛ pɛlpɛl n shi epeŋilarkpa a ba, nɛ Ebɔrɛ be ebɔl gbir fanɛ teku ka bee baga to na. Kusɔ kama nɛ k daa wɔ ndoŋ gba daŋ fulto nna a nyɛkpɛ.

³ Bɔrɛdare nɛ n wu ere daa du fanɛ amo nɛ n daŋ wu jemanɛ nɛ Ebɔrɛ daŋ ba nɛ e ba mur kadegboŋ nɛ baa tre Jerusalɛm na nna nɛ jemanɛ nɛ n daa wɔ lɔr nɛ baa tre Kɛba na ase na nna. Ndoŋ nna nɛ n ta enɔ m buu anishi so nseŋ kurgi kumu n yuu to epul na to.

⁴ Ndoŋ nna nɛ kefulto nɛ k bee ŋini Enyɛnpe Ebɔrɛ be kemaŋkura na bɔla kabunagboŋ nɛ k wɔ epeŋilarkpa be kaba so na to n luri bɔrɛlambu na to.

⁵ Kumo be kaman, nɛ Enyɛnpe Ebɔrɛ na be Kiyoyu keta ma n luri bɔrɛlambu na be laŋ be epunto be kelɔnɛ so nɛ n ya wu fanɛ Enyɛnpe Ebɔrɛ na be kemaŋkura sɔ bɔrɛlambu na to kikɛ.

⁶ Ma nɛ kanyɛn na yil nna nɛ n nu Enyɛnpe Ebɔrɛ ka shi bɔrɛlambu na to ŋ kaŋɛ ma le:

⁷ “Dimɛdi pibi, Ezikɛl, ma kuwurputi be kakpa nna na. Meeŋ baa wɔ Israɛl be basa nɛ b la ma basa ere to a ji kuwura bumo so hale mbaanaayɔ. Israɛl be basa ŋko bumo be bewuraana maaŋ naŋ shuŋ agbirana ŋko n wora kanyiŋi be asɔ nɛ a bee ŋaba ma ketre cheembi na n yili nfe n sa bumo be bewura nɛ b wu na.

⁸ Israɛl be bewura daŋ pɔr bumo be ewurkpaana nna m mata ma bɔrɛlambu cheembi na ga. Egbal e daa wɔ ma nɛ bumo be nferinto. B daa wora asheŋ jiga nna a ŋaba ma ketre cheembi na, amoso nɛ n daŋ nya agbo m mur bumo na.

⁹ Naniere a daga fanɛ b yige kagbirshuŋ nseŋ lara bumo be bewuraana nɛ b wu na be kanyiŋi be asɔ nɛ b pɔr n yili na. Nɛ b wora loŋ, meeŋ ba ka wɔ bumo to mbaanaayɔ.”

¹⁰ Ndoŋ nna nɛ Enyɛnpe Ebɔrɛ na naŋ kaŋɛ le: “Dimɛdi pibi, kute bɔrɛlambu na be asheŋ n sa Israɛl be basa na nɛ nyɔmɔ e pɛ bumo ŋkpal bumo be asheŋ lubi so. Kumo be kaman nɛ fo shin nɛ b fɛ kumo be kananɛ k du be asheŋ.

¹¹ Nɛ fanɛ bumo be asheŋ woraso kaŋ pɛ bumo nyɔmɔ nɛ bumo be ŋgbene jija bumo, fo bugi kananɛ bɔrɛlambu na du na be asheŋ to n sa bumo. Kute kumo be mbuna nɛ kananɛ k dese nɛ kumo to be asɔ be asheŋ nɛ mbraana nɛ a wɔtɔ a laŋɛ kumo be kaplɛa so be asheŋ n sa bumo. Fo alɛ e sibɛ ade kikɛ n nase n sa bumo saŋɛ na so baaŋ wu kananɛ kusɔ kama dese nseŋ tiŋ n wora m bɛ mbraana na so.

¹² Mbra nɛ k dese a laŋɛ bɔrɛlambu na be kaplɛa so e la fanɛ, kaboŋ nɛ k kulti kumo ashi kebee na be awɔlto na kikɛ la kakpa cheembi gbagba nna.”

Bɔrɛsure na be asheŋ

¹³ Kananɛ ekama nyi b kaa bee karga asɔ ashi bɔrɛlambu to na nɛ b yili so ŋ karga bɔrɛsure na. Le nɛ k daa sa. Kemaŋ ko nɛ kumo be nchiŋ daa sa fanɛ keyadra koŋwule nɛ bargato nɛ kumo be mparto gba daa sa fanɛ keyadra koŋwule nɛ bargato e daŋ kulti kumo. Kumo be ekarso be kananɛ k du kulkulbi na malɛ daŋ ka gbrɛ nɛ k fo keyadra koŋwule nna.

¹⁴ Bɔrɛsure na be gbaltɔlase na be jeŋgreŋ daŋ fo fanɛ ayadra ana nna. Nɛ kumo be kaba nɛ k bɛ gbaltɔlase na so na be jeŋgreŋ malɛ daŋ fo fanɛ ayadra ashunu. B daŋ yili gbaltɔlase na be ekarso nna n firgi n yɔ anishito fanɛ keyadra koŋwule nɛ barga pɔɛŋ nseŋ pɔr bɔrɛsure m bɛ kumo so. Kumo be kaman, nɛ b naŋ firgi n yɔ anishito fanɛ keyadra koŋwule nɛ bargato ashi kumo alɛ gba so ŋ kulti pɔɛŋ nseŋ pɔr bɔrɛsure be kaba nyɔsopo m bɛ so.

¹⁵ Bɔrɛsure nɛ k bɛ so esoso na so nɛ b daa ta esarga na a deŋi so a chɔɔ. Kumo alɛ daŋ fo fanɛ ayadra ashunu. Kumo be akel to be nnɔso ana na daŋ dii a chɔ kumo be esoso na kikɛ nseŋ daŋ duli gbolu be alambɛ.

¹⁶ Bɔrɛsure na be esoso na be mba ana na kikɛ daa sasa nna. Kaba kama so be nteŋ to daŋ fo fanɛ ayadra adunyɔ nna.

¹⁷ Kumo be nferinto na gba be mba ana na kikɛ daa sasa nna. Kaba kama daŋ fo fanɛ ayadra adunyɔ nɛ ana nna, nɛ kumo be ekarso ŋ kulti malɛ be jeŋgreŋ daŋ ka gbrɛ nɛ k fo keyadra koŋwule. Atemprembi nɛ baa dii so a yɔ bɔrɛsure na be esoso na daa wɔ a laŋɛ epeŋilarkpa be kaba so nna.

B ka ta bɔrɛsure na m bɔɔ Ebɔrɛ enɔ be asheŋ

¹⁸ Ndoŋ nna nɛ Enyɛnpetale Ebɔrɛ na naŋ kaŋɛ ma le: “Dimɛdi pibi, nu kusɔ nɛ mee kaŋɛ fo ere. B kaŋ pɔr bɔrɛsure na n loge, menyeeŋ mɔ asɔbɔya n lara esarga kumo so, nseŋ ta ŋklaŋ na ŋ ŋmenyaŋ kumo so a ŋini fanɛ men ta kumo m bɔɔ Ebɔrɛ enɔ nna na.

¹⁹ Bɔrɛmatapoana nɛ b shi Livai be yiri to nsaa la kanyɛn nɛ baa tre Zadɔk na be kanaŋ to be basa nawule e naŋ tiŋ m ba ma anishi to m ba shuŋ ma. Ma, Enyɛnpetale Ebɔrɛ na be mbra nna na. Menyeeŋ sa bumo gbolu fɔlbi nɛ b ta n lara kulubi be sarga.

²⁰ Kumo be kaman, nɛ b suse kusɔbɔya na be ŋklaŋ ŋ gbiti bɔrɛsure na be akel to be nnɔso ana na so nɛ kumo be nferinto gba peya so nɛ kumo be ekarso kikɛ ŋ kulti. Kananɛ menyeeŋ wora nɛ k nyalɛ so nsaa la kusɔ nɛ menyeeŋ tiŋ a lara esarga kumo so a sa ma nna na.

²¹ Kede be kaman, nɛ men ta gbolu nɛ b ta n lara kulubi be sarga na n lar ekarso n ya chɔɔ ashi kakpa nɛ k maŋ mata bɔrɛlambu na ase, nɛ b lara ndoŋ n yili a chɔɔ kulubi be esarga.

²² Kumo be ŋklade nɛ men ta kaboenyɛnso nɛ doro kikɛ maŋ wɔ kumo so n lara kulubi be sarga. Menyeeŋ ta kumo be ŋklaŋ n lɔŋɛ bɔrɛsure na so fanɛ kananɛ men ta gbolu na be ŋklaŋ n wora na.

²³ Men kaŋ wora loŋ n loge, nɛ men ta gbolu fɔlbi nɛ kpakpafɔlbi nɛ amo be kekama maŋ kɔ doro kikɛ kumo so

²⁴ m ba sa ma. Bɔrɛmatapoana na beeŋ mɔ amo nseŋ wora nfɔl n fur amo so n chɔɔ amo n lara sarga n sa ma.

²⁵ Karechɛ kama menyeeŋ baa ta kaboe nɛ gbolu nɛ kpakpa nɛ amo be kekama maŋ kɔ doro kikɛ amo so na a lara kulubi be sarga hale nɛ nchɛ ashunu e ya fo.

²⁶ Nchɛ ashunu nɛ bɔrɛmatapoana na beeŋ ta n lɔŋɛ bɔrɛsure na so nɛ k nyalɛ so n sa ma.

²⁷ Nchɛ ashunu na kaŋ choŋ, bɔrɛmatapoana na beeŋ fara a lara esarga chɔɔso nɛ kɔnɔkoŋwule be esarga bɔrɛsure na so. Saŋɛ na so nɛ ma kagbene e fuli Israɛl be basa so. Kusɔ nɛ ma, Enyɛnpetale Ebɔrɛ na kaŋɛ nna na.”