Ezikɛl 42 - EBƆRƐ BE KAWƆL

Bɔrɛmatapoana be ebuana be asheŋ

¹ Ade kikɛ be kaman, nɛ kanyɛn na ta ma n luri kowushina be kelɔnɛ na to nseŋ juŋkpar nɛ m bɛ mo so nɛ an yɔ kowu ko nɛ k wɔ a laŋɛ bɔrɛlambu na be kelargato be esoso be kaba so ase. Kumo nɛ kowu nɛ k wɔ bɔrɛlambu na be epeŋitɔrkpa na daa maŋ barga abar ga.

² Kowu ere be nteŋ to daa sa fanɛ ayadra kalfa nɛ adeshe nɛ aburwa nna nɛ kumo be mparto malɛ daa sa fanɛ ayadra aduburwa nɛ ana.

³ Kowu na be kaba ko daŋ kilgi n shoŋi efuli ko nɛ k dese bɔrɛlambu na ase nɛ kumo be mparto daa sa fanɛ ayadra adesa nɛ ana, nɛ kaba ko malɛ bee shoŋi ekpabi nɛ k chambɔ kowushina be kelɔnɛ na. B daŋ pɔr ebuana na nna m bɛ abar so esoso, nɛ kekama nɛ k bɛ kumo barkasa so na laŋɛ kaman a chɔ kumo nɛ k wɔ kaseto na.

⁴ Kedɛdɛ daa wɔ a laŋɛ kowu ere be kelargato be esoso be kaba so nna nɛ kumo be mparto daa sa fanɛ ayadra kuduashe, nɛ kumo be nteŋ to malɛ daa sa fanɛ ayadra kalfa nɛ adeshe nɛ aburwa. Kumo be mbuna daa bugi a yɔ kelargato be esoso be kaba so nna.

⁵ Ebuana nɛ a wɔ kowu ere be awɔlto gbagba na daa maŋ wɔ mpar n fo nferinto peya na so. Nferinto peya na malɛ daa maŋ naa wɔ mpar n fo kaseto peya na so.

⁶ Kowu na be ebuana nɛ a wɔ kaseto na e daa kɔ amo nɛ a wɔ esoso na to a yil, amoso esoso peya na daa maa kɔ eshabɔrɛ fanɛ nwu nɛ a ka a wɔ kelɔnɛ na so na.

^7-8 Kowu na be kaseto na be bargato daa la egbal nawule nna nɛ egbal na be nteŋ to daa sa fanɛ ayadra aduburwa nɛ ana, nɛ kumo be bargato nɛ k ka na malɛ daa la ebuana. Kumo be awɔlto na bre kikɛ daa la ebuana nna n ya fo kumo be ekar.

^9-10 Ebu anyɔ nɛ a wɔ kowu na be epeŋilarkpa be kaba so na be kaseto daa kɔ kabuna nɛ k bee bugi a lar kowushina be kelɔnɛ na so nna. Kowu ko nɛ k duli kowu ere daa yil bɔrɛlambu na be kelargato be kaseto be kaba so nna nɛ kumo nɛ kowu nɛ k yil bɔrɛlambu na be epeŋitɔrkpa be kaba so na maŋ barga abar ga.

¹¹ Nwuana ere be ebuana nɛ amo nɛ a yil kelargato be esoso be kaba so na maŋ kɔr abar to. Amo be nteŋ to nɛ mparto nɛ kananɛ b pɔr amo nɛ amo be mbuna kikɛ daŋ duli abar nna. Kedɛdɛ ko malɛ daa wɔ amo alɛ gba be anishito nna.

¹² Amo be akuloŋ daa shoŋi egbal nɛ k yil amo be anishito na be epeŋilarkpa be kaba so nna.

¹³ Ndoŋ nna nɛ kanyɛn na kaŋɛ ma le: “Nwu anyɔ ere kikɛ la mboŋ cheembi nna. Amo to nɛ bɔrɛmatapoana nɛ baa luri a yɔ Enyɛnpe Ebɔrɛ na be anishito na beeŋ baa chena a ji esargajibi cheembi na. Ebuana na ka du cheembi so, ndoŋ nɛ bɔrɛmatapoana na beeŋ baa ta ayu be esarga nɛ alubi be esarga nɛ kewora n jija be esarga cheembiana na a wɔtɔ.

¹⁴ Bɔrɛmatapoana na baa sha kelar bɔrɛlambu na to n yɔ kowushina be kelɔnɛ na so, a daga fanɛ b bɔla ebuana na ere to n lara bumo be asɔbuuso nɛ b buu n yɔ Enyɛnpe Ebɔrɛ na be anishito na n nase ndoŋ pɔɛŋ nseŋ ta asɔbuuso pɔtɛ m buu n lar.”

B ka karga bɔrɛlambu na be kowushina be asheŋ

¹⁵ Kanyɛn na ka karga bɔrɛlambu na be epunto kikɛ n loge, nɛ e keta ma m bɔla kabunagboŋ nɛ k wɔ epeŋilarkpa be kaba so na to n lar nseŋ ya karga kumo be kowushina na kikɛ ŋ kulti.

¹⁶ E daŋ ta kekpabi karga asɔ na nna ŋ karga bɔrɛlambu na be epeŋilarkpa be kaba so na. Kumo be nteŋ to daa sa fanɛ ayadra alfa aburwa nɛ adena nna.

^17-19 Ndoŋ nna nɛ e naŋ karga kumo be kelargato be esoso nɛ kaseto nɛ epeŋitɔrkpa be mbaana na kebɛso kebɛso. Kekama be nteŋ to daa sa fanɛ ayadra alfa aburwa nɛ ana nna,

²⁰ a ŋini fanɛ bɔrɛlambu na be kakpa nɛ egbal na kulti na be kaba kama so daa sa fanɛ ayadra alfa aburwa nɛ adena nna. Egbal na daa barga mboŋ cheembi na nɛ amo nɛ a maŋ du cheembi na to nna.