Ezikɛl 41 - EBƆRƐ BE KAWƆL

¹ Ade kikɛ be kaman, nɛ kanyɛn na naŋ keta ma n luri bɔrɛlambu na be ebu nɛ baa tre kakpa cheembi to. Nseŋ karga kumo be kedɛdɛ na, nɛ kumo be mparto daa sa fanɛ ayadra kudu,

² nɛ kumo be nteŋ to malɛ daa sa fanɛ ayadra kuduaburwa. Yili kumo be kabuna to n yɔ egbalana nɛ a wɔ kumo be mba anyɔ na be kekama ase daa sa fanɛ ayadra kudu anyɔ nna. Kumo be kaman, nɛ e karga ebu na gbagba, nɛ kumo be nteŋ daa sa fanɛ ayadra adushunu, nɛ kumo be mparto malɛ daa sa fanɛ ayadra adesa nɛ aburwa.

³ Kanyɛn na ka karga ndoŋ n loge, nɛ mo nawule yɔ bɔrɛlambu na be ŋkpar to be ebu na to. E daŋ juŋkpar nna ŋ karga kedɛdɛ nɛ baa bɔla to a yɔ kumo to na, nɛ kumo be mparto daa sa fanɛ ayadra asa nɛ egbalana nɛ a wɔ kumo be akel to na be kekama be nteŋ to daa sa fanɛ ayadra kudu anyɔ.

⁴ E ka loge, nɛ e karga ŋkpar to be ebu na gbagba; nɛ kumo be kaba kama so daa sa fanɛ ayadra adesa nɛ ana. Ebu ere daa wɔ nferinto be ebu na be anishito nna. Kumo be kaman nɛ e kaŋɛ ma: “Acheembiana to be kakpa cheembi nna na.”

Ebuana nɛ baa ta asɔ a yili to na be asheŋ

⁵ Ndoŋ nna nɛ kanyɛn na naŋ karga bɔrɛlambu na be egbal na be pentren nɛ k daa sa fanɛ ayadra kudu. B daŋ pɔr asɔ be ebuana nna nɛ amo be kekama be mparto daa sa fanɛ ayadra ashunu, m mata bɔrɛlambu na be egbal na ŋ kulti.

⁶ Ebuana ere daa wɔ ntuŋ asa nna nseŋ bɛ abar so asa asa n yɔ awɔlto, nɛ katuŋ kama daa kɔ ebu adesa nsaa yil egbal nɛ k kulti bɔrɛlambu na so. Bɔrɛlambu na be esoso be ebuana na be egbalana daa maŋ danto n fo kaseto be ebuana peya so, saŋɛ na so ebuana na beeŋ tiŋ n yili egbalana na so nɛ shɛŋ maŋ suse amo to.

⁷ Egbalana nɛ a kulti bɔrɛlambu na daa du pentren kaseto a chɔ esoso nna, a ŋini fanɛ esoso be ebuana na be epunto daŋ kpalga to a chɔ kaseto peya na. B daŋ pɔr atemprembi nna a dii so a yɔ nferinto nɛ awɔlto be asɔ be ebuana na to.

⁸ Bɔrɛlambu na daa yil kejembu nɛ kumo be jeŋgreŋ daa sa fanɛ ayadra kudu nna. Kumo koŋwule na so nɛ ebuana na gba daa yil.

⁹ Ebuana na be kaman to be egbalana na be pentren daŋ fo fanɛ ayadra aburwa. Efuli nɛ k daŋ dese egbalana ere

¹⁰ nɛ bɔrɛmatapoana na be ebuana be kefɛato be mparto daŋ fo fanɛ ayadra adesa nɛ ana.

¹¹ Kabuna koŋwule daa bugi nna a yɔ asɔ be ebuana nɛ a wɔ a laŋɛ kelargato be esoso be kaba so nna nɛ kuko malɛ daa bugi a yɔ amo nɛ a wɔ a laŋɛ kelargato be kaseto be kaba so na. Kejembu nɛ bɔrɛlambu na daa yil so na daŋ dese nna m baŋ ebuana na be kaman to be egbalana na so n fo fanɛ ayadra aburwa be mparto ŋ kulti bɔrɛlambu na.

Epeŋitɔrkpa be kowu na be asheŋ

¹² Kede be kaman, nɛ n naŋ wu kowu ko. K daŋ kilgi nna n shoŋi bɔrɛlambu na be epeŋitɔrkpa be kaba so nɛ kumo be nteŋ to daŋ fo fanɛ ayadra kalfa nɛ adunu nɛ kumo be mparto malɛ daŋ fo fanɛ ayadra kalfa nɛ kuduashe. Kumo be egbal malɛ be pentren daŋ fo fanɛ ayadra akpanu.

Kananɛ bɔrɛlambu na kikɛ sa be asheŋ

¹³ Ndoŋ nna nɛ kanyɛn na karga bɔrɛlambu na be nteŋ to nɛ k fo fanɛ ayadra kalfa nɛ adeshe nɛ aburwa. Kumo be kaman nɛ e naŋ yili kumo be kaman to be egbal na ase ŋ karga m bɔla kumo be kaman to be kelɔnɛ na so m ba choŋ ebu nɛ k wɔ epeŋitɔrkpa na be kaman to be egbal na, nɛ kumo alɛ gba fo fanɛ ayadra kalfa nɛ adeshe nɛ aburwa.

¹⁴ E ka karga bɔrɛlambu na be anishito nɛ alɔnɛ nɛ a dese kumo be mba anyɔ na ase kikɛ nɛ kumo alɛ gba fo fanɛ ayadra kalfa nɛ adeshe nɛ aburwa.

¹⁵ Kumo be lalaloge nɛ e karga kowu nɛ k wɔ epeŋitɔrkpa be kaba so na nɛ adɛdɛ nɛ a wɔ kumo be mba anyɔ na kikɛ be nteŋ to nɛ a fo fanɛ ayadra kalfa nɛ adeshe nɛ aburwa. B daŋ yili kasawule nna ŋ gbir ndibi m mata abar ashi kedɛdɛ nɛ k wɔ bɔrɛlambu na be kabuna to na nɛ Kakpa cheembi na nɛ acheembiana to be kakpa cheembi na

Kananɛ bɔrɛlambu na be epunto du be asheŋ

¹⁶ kikɛ be epunto be egbalana na so hale n ya fo etokuro na. Ndibi na daa beeŋ tiŋ m buu etokuro na so gba kuraa.

¹⁷ Bumo alɛ daŋ naŋ shɛl asɔ be nduli nna m mata m mata bɔrɛlambu na be epunto kikɛ, hale kumo be akuloŋ be awɔlto kikɛ.

¹⁸ Abii be ndibi nɛ asɔbɔya nɛ a kɔ aba fanɛ mbuibi be nduli nɛ b daŋ shɛl n deŋi egbalana na so. B baŋ shɛl abii be kedibi be nduli koŋwule n deŋi egbal so, b naa shɛl kusɔbɔya nɛ k kɔ aba fanɛ kabuibi na be nduli nna m bɛ so. Asɔbɔya be nduli na malɛ be kekama kɔ anishito anyɔ nna.

^19-20 B daa kɔ dimɛdi be anishito nna nɛ k bee keni abii be kedibi be nduli ko kaba ko so nseŋ naa kɔ buluŋ be anishito nɛ kumo alɛ bee keni abii be kedibi be nduli ko kaba pɔtɛ so. Aloŋ nɛ b daŋ yili kasawule n wora amo n ya fo akuloŋ na be awɔlto n deŋi egbalana na so ŋ kulti.

²¹ Kakpa cheembi be kukuloŋ na be jeŋgreŋ nɛ mparto kikɛ daa sasa nna. Kusɔ ko daa yil acheembiana to be kakpa cheembi na be kabuna to n duli

Ndibi be bɔrɛsure be asheŋ

²² bɔrɛsure nɛ b ta ndibi wora nna. Kumo be jeŋgreŋ daŋ fo fanɛ ayadra anu nɛ kumo be mparto malɛ daŋ fo fanɛ ayadra ana. Ndibi nɛ b ta n lɔŋɛ kumo be kaplɛkama. Ndoŋ nna nɛ kanyɛn na kaŋɛ ma le “Kede la kanyiŋi nna fanɛ Enyɛnpe Ebɔrɛ na bee keni mbe bɔrɛlambu so jemanɛ kikɛ nna.”

Bɔrɛlambu na be mbuna be asheŋ

²³ Kabuna ko daa wɔ kakpa nɛ baa bɔla a yɔ kakpa cheembi to nna nɛ kuko malɛ gba daa wɔ kakpa nɛ baa bɔla a yɔ acheembiana to be kakpa cheembi na to.

²⁴ Kabuna kama malɛ daa kɔ akuloŋ anyɔ nna.

²⁵ B daŋ shɛl abii be ndibi nɛ asɔbɔya nɛ a kɔ aba fanɛ mbuibi na be nduli nna n deŋi kakpa cheembi be mbunaana na so fanɛ kananɛ b wora n deŋi egbalana na so na. Kumo be kaman nɛ b ta ndibi n ti kedɛdɛ na be kabuna ashi kowushina.

²⁶ Kedɛdɛ na be akel to be egbalana na daa kɔ etokuro wurbi nna, nɛ b naŋ shɛl abii be ndibi be nduli n deŋi kumo alɛ gba be egbalana na so.