Ezikɛl 40 - EBƆRƐ BE KAWƆL

B ka ta Ezikɛl n yɔ Jerusalɛm be asheŋ

¹ B ka pɛ anyi be beko nɛ ewura Jehowachin kenya n tintiŋ anyi n yɔ Babilɔn be efuli so na be kafɛ adunyɔ nɛ anu nɛ Babilɔnebi ka kɔ n suge Jerusalɛm na be kafɛ kuduanasopo to be kufɔl juŋkparso na be kachɛ kudusopo na nɛ Enyɛnpe Ebɔrɛ na be eleŋgboŋ gbelge ma so nɛ e keta ma n yɔ Jerusalɛm.

² Ndoŋ nna nɛ ŋ ku bɔrɛdare n wu fanɛ Ebɔrɛ ka keta ma n yɔ Israɛl be kasawule so n ya yili kebee jeŋgreŋ ko so nɛ ŋ keni kelargato be kaseto be kaba so n wu nwu damta ko nɛ a duli fanɛ kadegboŋ na.

³ Nɛ Enyɛnpe Ebɔrɛ na firgi ma n taga amo to nɛ wu esa ko nɛ e bee nyɛkpɛ fanɛ b ka fifɛa danyaŋ so na, nɛ e kɔ wajɛchɛbi be kusɔ nɛ baa ta a karga asɔ be nteŋ nɛ kekpabi nɛ b kɔ a karga asɔ na mbe enɔ to nsaa yil kabunagboŋ ase ashi bɔrɛdare na to.

⁴ Kumo be kaman nɛ kanyɛn na kaŋɛ ma le: “Dimɛdi pibi, bugi anishi nɛ asoe ŋ keni nseŋ nu kusɔ nɛ mee sha keŋini fo ere nɛnɛ, ŋkpal manɛ so, loŋ so nɛ m bar fo nfe. Feeŋ kaŋɛ Israɛl be basa na kusɔ kama nɛ fo wu.”

Epeŋilarkpa be kabunagboŋ na be asheŋ

⁵ Kusɔ nɛ n daŋ wu e la bɔrɛlambu na, nɛ egbal kulti kumo n wɔtɔ. Ndoŋ nna nɛ kanyɛn na ta mbe kekpabi nɛ b kɔ a karga asɔ nɛ kumo be nteŋ sa fanɛ ayadra kudu na ŋ karga egbal na. Egbal na be jeŋgreŋ nɛ ndanto kikɛ daa sa fanɛ ayadra kudu nna.

⁶ Kumo be kaman, nɛ e yɔ kabunagboŋ nɛ k bee shoŋi epeŋilarkpa na nseŋ ya dii ketemprembi na n yɔ kumo be awɔlto n ya karga kabuna na, nɛ kumo be jeŋgreŋ sa fanɛ ayadra kudu.

⁷ Kedɛdɛ ko daa wɔ kabunagboŋ na be anishito nɛ kumo be kaba kama so daa kɔ ebu asa nɛ baa tre amo bekumpo be ebuana. Ebuana na be mba ana na be kekama daa sa fanɛ ayadra kudu nna nɛ kedɛdɛ na malɛ daŋ dese n ya fo kabuna to be ebu ko nɛ k kilgi n shoŋi bɔrɛlambu na.

^8-9 Ndoŋ nna nɛ kanyɛn na karga ebu nɛ k kilgi n shoŋi bɔrɛlambu ere nseŋ wu fanɛ yili kumo be kabuna to n ya fo epunto be egbal na sa fanɛ ayadra kuduana nna. Naŋ yili kabuna na to n ya fo kumo be akel to be egbalana na malɛ be kekama sa fanɛ ayadra ana nna.

¹⁰ Bekumpo be ebuana nɛ a wɔ kedɛdɛ na be mba anyɔ na kikɛ daa sasa nna, nɛ egbalana nɛ a daa barga amo to na malɛ gba be ndanto daa sasa.

¹¹ Kumo be kaman, nɛ kanyɛn na naŋ karga kedɛdɛ na be mparto nɛ kumo kikɛ koso ayadra adunyɔ nɛ anyɔ, ama yili kabuna ko n ya fo kenyɔsopo daa sa fanɛ ayadra kuduashe nna.

¹² Egbal shiimbi nɛ kumo be jeŋgreŋ nɛ pentren kikɛ ka gbrɛ nɛ e fo ayadra anyɔ daa wɔ bekumpo be ebuana na be kekama be anishito nna. Bekumpo be ebuana na be kekama be nteŋ to nɛ mparto kikɛ daa la ayadra kudu nna.

¹³ Ndoŋ nna nɛ kanyɛn na yili ebu ko be kaman to be egbal ŋ karga m bɔla kedɛdɛ na to m ba choŋ ebu nyɔsopo be kaman to be egbal nɛ k koso fanɛ ayadra adena nɛ anyɔ.

¹⁴ Kumo be kaman nɛ e naŋ karga ebu nɛ k wɔ kedɛdɛ na be lalaloge to, nɛ baa bɔla kumo to a lar kelɔnɛ so na nseŋ wu fanɛ kumo be mparto daa sa fanɛ ayadra adesa nɛ ana nna.

¹⁵ To, yili kedɛdɛ na be kabuna to be egbal be kaman to n ya fo ebu nɛ k wɔ kedɛdɛ na be lalaloge to na be nteŋ to kikɛ daa sa fanɛ ayadra aduburwa nɛ ana nna.

¹⁶ Etokuro wurbi daa wɔ egbal asa nɛ a wɔ bekumpo be ebuana to na nna. Amo alɛ baa du fanɛ amo nɛ a wɔ kabuna to be ebu na to na nna. B daŋ wora abii be ndibi be nduli nna n deŋi kedɛdɛ na be epunto be egbalana so.

Kowushina be kelɔnɛ na be asheŋ

¹⁷ Ade kikɛ be kaman, nɛ kanyɛn na naŋ keta ma m bɔla kedɛdɛ na to n yɔ bɔrɛlambu na be kowushina be kelɔnɛ na so. Ebu adesa e wɔ kowushina be egbal na to nɛ b ta ajembu n yuu n dulgi kakpa nɛ baa nite na

¹⁸ n chambɔ kelɔnɛ na kikɛ. Kowushina be kelɔnɛ ere daa wɔ kaseto a chɔ epunto be kelɔnɛ na nna.

¹⁹ Ndoŋ nna nɛ kanyɛn na yili kowushina be kelɔnɛ na be kabuna to ŋ karga n ya fo epunto be kelɔnɛ na be kabuna to nɛ k koso fanɛ ayadra kalfa nɛ adeshe nɛ aburwa.

Kelargato be esoso be kabunagboŋ na be asheŋ

²⁰ Kumo be kaman nɛ kanyɛn na naŋ karga kelargato be esoso be kabunagboŋ nɛ k bee bugi a lar kowushina be kelɔnɛ so na.

²¹ Kabunagboŋ ere gba be kedɛdɛ daa kɔ bekumpo be ebu asa kumo be kaba kama so nna. Kanyɛn na ka karga ebuana ere nɛ egbalana nɛ a barga amo to na nɛ kabuna to be ebu na, amo nɛ amo nɛ a wɔ epeŋilarkpa be kabunagboŋ ase na kikɛ daa sasa nna.

²² Kelargato be esoso be kabuna to be ebu na nɛ etokuro na nɛ abii be ndibi be nduli nɛ b wora n deŋi egbalana so na kikɛ daa du fanɛ amo nɛ a wɔ epeŋilarkpa be kabunagboŋ ase na nna. Kabuna to be ebu na bee shoŋi bɔrɛlambu na be kelɔnɛ na nna nɛ baa dii atemprembi ashunu a yɔ kumo to.

²³ Kabuna ko daa wɔ kelɔnɛ na be kelargato be esoso be kaba so nɛ baa bɔla kumo to a yɔ epunto be kelɔnɛ na so, fanɛ kananɛ kuko daa wɔ epeŋilarkpa be kaba so na. Nɛ kanyɛn na yili kowushina be kabuna na ŋ karga n ya fo epunto be kabuna na ase nɛ kekoso fanɛ ayadra kalfa nɛ adeshe nɛ aburwa.

Kelargato be kaseto be kabunagboŋ na be asheŋ

²⁴ Ade be kaman, nɛ kanyɛn na naŋ ta ma n yɔ kelargato be kaseto na, nɛ n ya wu kabunagboŋ ko gba ndoŋ. Ndoŋ nna nɛ e karga kumo be epunto be egbalana na, nɛ kabuna to be ebu na, nɛ amo nɛ amo nɛ a wɔ mbunagboŋ anyɔ na ase na kikɛ sasa.

²⁵ Kananɛ ebuana nɛ a wɔ mbunagboŋ anyɔ na ase na kɔ etokuro na nɛ ade gba kɔ. Kabunagboŋ ere be nteŋ to daa sa fanɛ ayadra aduburwa nɛ ana nna nɛ kumo be mparto malɛ daa sa fanɛ ayadra adena nɛ anyɔ.

²⁶ Atemprembi ashunu nɛ baa dii a yɔ kabunagboŋ ere ase. Ebu nɛ k wɔ kumo be kabuna to ashi kumo be lalaloge to na malɛ kilgi anishito n shoŋi bɔrɛlambu na be kelɔnɛ so nna. B daŋ wora abii be ndibi be nduli n deŋi kedɛdɛ na be epunto be egbalana na so nna.

²⁷ Nfe gba daa kɔ kabuna a laŋɛ kelargato be kaseto be kaba so nna nɛ k bee bugi a yɔ epunto be kelɔnɛ na so. Ndoŋ nna nɛ kanyɛn na yili kowushina be kabuna na ŋ karga n ya fo epunto be kabuna na ase, nɛ k sa fanɛ ayadra kalfa nɛ adeshe nɛ aburwa.

Epun to be kelɔnɛ na be mbunagboŋ na be asheŋ

²⁸ Ade kikɛ be kaman, nɛ kanyɛn na naŋ keta ma m bɔla kelargato be kaseto be kabunagboŋ na to n luri epunto be kelɔnɛ na to nseŋ ya karga kabunagboŋ na. Kumo nɛ kowushina be kabunagboŋ na kikɛ sasa nna.

^29-30 Kumo be bekumpo be ebuana nɛ kabuna to be ebu na nɛ egbalana nɛ a bee barga ebuana na to na kikɛ daa du fanɛ amo nɛ a wɔ mbunagboŋ nɛ a ka ase na nna. Ebuana na gba daa kɔ etokuro nna. Kabunagboŋ ere gba be nteŋ daa la fanɛ ayadra aduburwa nɛ ana nna nɛ kumo be mparto malɛ daa la fanɛ ayadra adena nɛ anyɔ.

³¹ Ebu nɛ k wɔ kumo be kabuna to na daŋ kilgi anishito n shoŋi kowushina be kelɔnɛ na nna. Atemprembi aburwa nɛ baa dii a yɔ kabunagboŋ ere ase.

Epeŋilarkpa be Kabunagboŋ na be asheŋ

³² Ndoŋ nna nɛ kanyɛn na naŋ ta ma m bɔla epeŋilarkpa be kabunagboŋ na to n yɔ epunto be kelɔnɛ na so nseŋ ya karga kabuna to na. Kumo nɛ amo nɛ a ka na kikɛ sasa nna.

³³ Kumo alɛ be bekumpo be ebuana, nɛ kabuna to be ebu na, nɛ egbalana nɛ a barga ebuana na to na, nɛ amo braana nɛ a wɔ mbunagboŋ nɛ a ka na ase na kikɛ la kukoŋwule nna. Kumo alɛ gba be bekumpo be ebuana na nɛ kabuna to be ebu na daa kɔ etokuro nna n chambɔ. Kumo be nteŋ to kikɛ koso ayadra aduburwa nɛ ana nɛ mparto kikɛ koso ayadra adena nɛ anyɔ nna.

³⁴ Ebu nɛ k wɔ kumo be kabuna to na daŋ kilgi n shoŋi kowushina be kelɔnɛ na nna nɛ b wora abii be ndibi be nduli n deŋi kedɛdɛ na be egbalana so. Atempreŋ aburwa nɛ baa dii so a yɔ kabunagboŋ ere ase.

Kelargato be esoso be kabunagboŋ na be asheŋ

³⁵ Kede be kaman, nɛ kanyɛn na naŋ keta ma n yɔ kelargato be esoso be kaba so be kabunagboŋ na ase nseŋ ya karga kumo. Kumo nɛ amo nɛ a ka na kikɛ daa sasa nna.

³⁶ Kumo alɛ gba daa kɔ bekumpo be ebuana nɛ egbalana nɛ b wora abii be ndibi be nduli n deŋi amo so nɛ kabuna to be ebu nɛ etokuro n chambɔ kumo fanɛ kelargato be kaseto be kabunagboŋ na gbagba nna chap. Kumo be nteŋ to daa la fanɛ ayadra aduburwa nɛ ana nɛ kumo be mparto malɛ daa la fanɛ ayadra adena nɛ anyɔ.

³⁷ Ebu nɛ k wɔ kumo be kabuna to na daŋ kilgi n shoŋi kowushina be kelɔnɛ na nna, nɛ b wora abii be ndibi be nduli n deŋi kedɛdɛ na be egbalana na so. Atemprembi aburwa nɛ baa dii so a yɔ kabunagboŋ ere ase.

Sarga be asɔbɔya be ebuana be asheŋ

³⁸ Ebubiana ko daŋ mata kedɛdɛ nɛ k wɔ epunto be mbunagboŋ na be kekama na ase nna nɛ baa fɔr sarga chɔɔso be asɔbɔya so amo to.

³⁹ Eteebɔl ana e daa wɔ ebubi ere to. Amo be anyɔ daa yil kaba ko so nna nɛ anyɔ nɛ a ka malɛ daa yil kaba nyɔsopo so nɛ b daa mɔ esarga chɔɔso ŋko kulubi be sarga ŋko kewora n jija be sarga be asɔbɔya amo so.

⁴⁰ Eteebɔl ana ko gba daa wɔ kowushina be kelɔnɛ na to. Amo be anyɔ daa yil atemprembi nɛ a dese a yɔ kabunagboŋ nɛ k wɔ kelargato be esoso na be kaba ko so nna nɛ anyɔ malɛ yil kaba nyɔsopo so.

⁴¹ Eteebɔl aburwa e daa wɔtɔ nɛ b daa mɔ asɔbɔya nɛ baa ta a lara esarga na amo so. Amo be ana daa yil ebubi na to nna nɛ ana nɛ a ka malɛ daa yil kowu ashi kelɔnɛ na so.

⁴² Ajembu nɛ b daŋ shɛl n lɔŋɛ eteebɔl ana nɛ a daa yil ebubi na to, nsaa ta asɔbɔya nɛ baa ta a lara esarga chɔɔso na a deŋi amo so a bɛ. Amo be jeŋgreŋ daŋ fo fanɛ keyadra koŋwule nɛ bargato nɛ amo be esoso be mparto malɛ be mba ana na be kekama daa la ayadra anyɔ nɛ bargato. Nsaŋɛ nɛ asɔ kama nɛ b kɔ a mɔ nsaa bɛ esarga be asɔbɔya na kikɛ daa deŋ eteebɔl ere so nna.

⁴³ B daŋ gbir ayir nɛ amo be nteŋ fo fanɛ enɔ be mparto egbalana na so nna ŋ kulti ebuana na to. Eteebɔl na malɛ so nɛ b daa ta esargablaŋ na a deŋi so.

Bɔrɛmatapoana na be ebuana be asheŋ

⁴⁴ Ndoŋ nna nɛ kanyɛn na naŋ keta ma n luri epunto be kelɔnɛ na to nɛ n ya wu ebu anyɔ ko nɛ amo be mbuna daa bugi a yɔ epunto be kelɔnɛ na so. Kuko daa wɔ kabunagboŋ nɛ k wɔ kelargato be esoso be kaba so na ase nseŋ kilgi n shoŋi kelargato be kaseto be kaba so nna, nɛ kenyɔsopo malɛ wɔ kabunagboŋ nɛ k wɔ kelargato be kaseto be kaba so na ase nseŋ kilgi n shoŋi kelargato be esoso be kaba so.

⁴⁵ Nɛ kanyɛn na kaŋɛ ma fanɛ ebu nɛ kumo be anishito bee shoŋi kelargato be kaseto be kaba so na la bɔrɛmatapoana nɛ baa shuŋ bɔrɛlambu na to na peya nna,

⁴⁶ nɛ kumo nɛ kumo alɛ be anishito be shoŋi kelargato be esoso be kaba so na malɛ la bɔrɛmatapoana nɛ baa shuŋ bɔrɛsure na ase na peya. Zadɔk be kabuna ebi nɛ b shi Livai be yiri to na nawule e kɔ ekpa nɛ b shuŋ bɔrɛmatapoana be kushuŋ n sa Enyɛnpe Ebɔrɛ na.

Epunto be kelɔnɛ na nɛ bɔrɛlambu na be asheŋ

⁴⁷ Ndoŋ nna nɛ kanyɛn na naŋ karga epunto be kelɔnɛ na. Kumo be mba ana na be kekama daa la ayadra kalfa nɛ adeshe nɛ aburwa nna. Bɔrɛsure na daa wɔ bɔrɛlambu nɛ k daa wɔ kelɔnɛ na be epeŋitɔrkpa na be anishito nna.

⁴⁸ Kumo be kaman nɛ e naŋ keta ma n luri bɔrɛlambu na be kedɛdɛ na to nseŋ ya karga kumo be kabuna to na. Kumo be jeŋgreŋ daa sa fanɛ ayadra akpanu nna nɛ kumo be mparto malɛ daa sa fanɛ ayadra adunyɔ nɛ ana.

⁴⁹ Atemprembi nɛ b daa bɔla so a dii a yɔ kedɛdɛ na so. Kedɛdɛ na be mparto daa sa fanɛ ayadra adesa nɛ ana nna nɛ kumo be jeŋgreŋ malɛ daa sa fanɛ ayadra adunyɔ nna. Eshabɔrɛ malɛ daŋ bɛ abar so kedɛdɛ na be mba anyɔ na kikɛ so nna n ya fo kumo be ekar.