Ezikɛl 39 - EBƆRƐ BE KAWƆL

Gɔg ka kɔ n tɔr be asheŋ

¹ Ade kikɛ be kaman, nɛ Enyɛnpetale Ebɔrɛ na naŋ kaŋɛ le: “Dimɛdi pibi, Ezikɛl, malga ŋ gbiti Gɔg nɛ e la Meshɛk nɛ Tubal be efuliana be ewurgboŋ na nseŋ kaŋɛ mo fanɛ ma nɛ mo maŋ naa kɔ shɛŋ.

² Ma alɛ beeŋ shin nɛ e kilgi anishito n shoŋi kakpa pɔtɛ nɛ n juŋkpar mo n shi kelargato be esoso wɔfɔ wɔfɔ hale nɛ e ba fo Israɛl be abee so.

³ Saŋɛ na so nɛ ŋ ŋmɛa mbe keta nɛ atanyembi ashi mbe enɔjiso nɛ bena to n lɛ.

⁴ Kumo be kaman nɛ Gɔg nɛ mbe benapo nɛ mbe bechɛtopo kikɛ e tɔr n wu ashi Israɛl be abee so nɛ n shin nɛ b ki kusɔ jiso n sa mbuibi nɛ kupuŋ to be asɔbɔya.

⁵ Bumo be beko malɛ gba beeŋ wu n dese kupuŋ to. Ma, Enyɛnpetale Ebɔrɛ na e kaŋɛ na.

⁶ Ade be kaman, nɛ n shin nɛ edɛ e chɔɔ Magɔg be kasawule nɛ teku ase be nsawule nɛ basa chena amo so kayurwushi so na, nɛ ekama e pin fanɛ ma e la Enyɛnpe Ebɔrɛ na.

⁷ Ma alɛ beeŋ shin nɛ ma basa Israɛlebi e pin ma ketre cheembi na, a maaŋ naa keni kumo jiga kikɛ. Ndoŋ nɛ efuliana na beeŋ pin fanɛ ma, Enyɛnpe Ebɔrɛ na e la Israɛl be Ebɔrɛ cheembi na.”

⁸ Ndoŋ nna nɛ Enyɛnpetale Ebɔrɛ na naŋ kaŋɛ le: “Kachɛ nɛ m malga kumo be asheŋ ere beeŋ ba, fanɛ kananɛ n nase kumo be kɔnɔ na;

⁹ Nɛ basa nɛ b wɔ Israɛl be ndegboŋ to na e lar n ya tise n tise bumo doŋana be akɔsɔ nɛ baaŋ yige n lɛ na m ba wɔtɔ edɛ. Baaŋ ta abɛlso be asɔ kuŋamuso nɛ ata nɛ atanyembi nɛ akpa nɛ mprɛ m wɔtɔ edɛ to. Nfɛ ashunu nɛ baa chɔɔ amo.

¹⁰ B maaŋ naŋ yɔ kupuŋ to n ya fin ndibi puga edɛ ŋko ŋ ku ndibi kiyi to kikɛ, ŋkpal manɛ so akɔsɔ nɛ b shile ŋ ka na ba ako beeŋ ndibi puga edɛ n sa bumo. Bumo alɛ beeŋ suge basa nɛ b daŋ suge bumo be asɔ na be asɔ.” Ma, Enyɛnpetale Ebɔrɛ na e kaŋɛ na.

Gɔg be kepuli be asheŋ

¹¹ Ade kikɛ be kaman nɛ Enyɛnpe Ebɔrɛ na naŋ kaŋɛ le: “Jemanɛ nɛ asheŋ ere kikɛ beeŋ wora na, meeŋ shin nɛ b puli Gɔg ashi Israɛl be kakpa nɛ baa tre Benitepo be Ketaŋɛ to nɛ k dese Teku Wuso na be epeŋilarkpa be kaba so na. Ndoŋ nɛ baaŋ puli Gɔg nɛ mbe benapo kikɛ, saŋɛ na so baaŋ baa tre ketaŋɛ na Gɔg be benapo be Ketaŋɛ.

¹² Afɔl ashunu nɛ Israɛlebi na beeŋ ta m puli bubuni na kikɛ pɔɛŋ nɛ kasawule na e naŋ nyalɛ so.

¹³ Ekama nɛ e wɔ kasawule na so beeŋ chɛ to m puli bumo, nɛ kumo be loŋ e shin nɛ b nya kemaŋkura kachɛ nɛ meeŋ kɔ m pɔɔ so na. Ma, Enyɛnpetale Ebɔrɛ na e kaŋɛ na.

¹⁴ Afɔl ashunu na be kaman nɛ, b lara benyɛn ko nɛ b nite efuli na kikɛ so n ya keni n fin bubuni kama nɛ baaŋ ka a dese mboŋ ko na m puli, saŋɛ na so kasawule na beeŋ naŋ nyalɛ so.

¹⁵ Kaplɛkama nɛ benyɛn na beeŋ wu dimɛdi be kuwibi ka dese baaŋ dulgi ndoŋ, saŋɛ na so bechaŋkurpoana na beeŋ ba ta kumo n ya puli ashi Gɔg be benapo be Ketaŋɛ na to

¹⁶ m mata kade nɛ baa tre Gɔg be Benapo na. Kumo be kaman, nɛ kasawule na e naŋ nyalɛ so.”

¹⁷ Ndoŋ nna nɛ Enyɛnpetale Ebɔrɛ na naŋ kaŋɛ ma le: “Dimɛdi pibi, tre mbuibi nɛ kupuŋ to be asɔbɔya kikɛ nɛ b shi kaplɛkama m ba ji sarga nɛ mee wora a sa bumo na. K beeŋ baa la kejigboŋ nna ashi Israɛl be abee so, nɛ b we eblaŋ nseŋ nuu ŋklaŋ ndoŋ.

¹⁸ Benapo be eblaŋ nɛ baaŋ we nseŋ nuu durnya to be bewurjipo be ŋklaŋ. Kananɛ baa mɔ ekpakpa ŋko mbolpɔ fɔlbi ŋko mboe ŋko egbolu danso na nɛ baaŋ mɔ benapo na nɛ bewurjipo na.

¹⁹ Jemanɛ nɛ meeŋ mɔ basa ere fanɛ sarga be asɔbɔya na, mbuibi nɛ asɔbɔya beeŋ ji nfɔ kanaŋkama nɛ baaŋ tiŋ nseŋ nuu ŋklaŋ hale nɛ a boo bumo.

²⁰ Ndoŋ beeŋ ki fanɛ ma ejikpa nɛ b we egbaŋɛ nɛ bumo be bediipo nɛ basa gboŋ nɛ benapo be yiri yiri be eblaŋ m mɔɛ m baŋ bumo be amu so.”

Israɛl be efuli ka naaŋ laŋɛ n yili be asheŋ

²¹ Amo kikɛ be kaman, nɛ Enyɛnpe Ebɔrɛ na naŋ kaŋɛ le: “Meeŋ shin nɛ efuliana na e wu ma kemaŋkura nɛ ŋ ŋini bumo kananɛ mee wora asheŋ nɛ ŋ ŋkre ma eleŋ to na.

²² Yili loŋ be kachɛ na a yɔ Israɛlebi na beeŋ pin fanɛ ma, Enyɛnpe Ebɔrɛ na e la bumo be Ebɔrɛ.

²³ Kumo be kaman, nɛ efuliana na e pin fanɛ Israɛlebi na daŋ yɔ kenyaya to nna ŋkpal bumo be alubi nɛ b wora n da ma so na so. N daŋ lar bumo kaman nseŋ shin nɛ bumo doŋana kɔ bumo kena m mɔ bumo.

²⁴ Kusɔ nɛ k daga bumo nɛ n shin nɛ b nya na. Bumo be asheŋ lubi nɛ amu kpakpaso so nɛ n daŋ pal kaman n sa bumo na.”

²⁵ Ade ere malɛ kikɛ be kaman, nɛ Enyɛnpetale Ebɔrɛ na naŋ kaŋɛ le: “Ama naniere bre meeŋ wu Jeekɔb be kaman to ebi nɛ b la Israɛl be basa na kuwɔr nseŋ shin nɛ b naŋ dii dama. Ma alɛ beeŋ kuŋ ma ketre cheembi na.

²⁶ B kaŋ ba chena bumo gbagba be kasawule so kayurwushi so nɛ esa kikɛ maŋ naa funti bumo na, baaŋ teŋ bumo be anishinyɔr nɛ b daŋ ji ŋkpal b ka daŋ debɔr ma na so.

²⁷ Efuli damtaana beeŋ wu kananɛ meeŋ lara ma basa, Israɛlebi na ashi mboŋ nɛ bumo doŋana yɛr bumo na m ba nseŋ wu fanɛ n du cheembi nna.

²⁸ Saŋɛ na so nɛ ma basa e pin fanɛ ma, Enyɛnpe Ebɔrɛ na e la bumo be Ebɔrɛ, ŋkpal manɛ so, n daŋ yɛr bumo kenyaya to nna nseŋ naŋ gama bumo abar so m ba bumo gbagba be kasawule so, hale bumo be ekoŋwule gba maŋ shir ndoŋ.

²⁹ Ma alɛ maaŋ naaŋ lar Israɛl be basa na kaman kikɛ, ŋkpal manɛ so, meeŋ ta ma kiyoyu n wɔtɔ bumo to. Ma, Enyɛnpetale Ebɔrɛ na e kaŋɛ na.”