Ezikɛl 38 - EBƆRƐ BE KAWƆL

Gɔg be kaplɛa so be kewuŋkaŋɛ be asheŋ

¹ Nɛ Enyɛnpe Ebɔrɛ na naŋ kaŋɛ ma le:

² “Dimɛdi pibi, Ezikɛl, malga ŋ gbiti Gɔg nɛ e la Meshɛk nɛ Tubal be efuliana so be ewurgboŋ ashi Magɔg be kasawule so na. Malga ŋ gbiti mo

³ nseŋ kaŋɛ mo fanɛ ma, Enyɛnpetale Ebɔrɛ na nɛ mo maŋ naa kɔ shɛŋ.

⁴ Ma alɛ beeŋ shin nɛ e maaŋ naa kɔ eleŋ, nseŋ ta edariwa ŋ kɔl mbe ŋgbuŋ to ŋ gberge mo nɛ mbe benapo damta nɛ baa dii egbaŋɛ nsaa kɔ akɔsɔ damta, nɛ bumo be ekama malɛ kɔ kebɛlso be kusɔ kuŋkumuso nɛ tokobi enɔana to na kikɛ n yɔ.

⁵ Pɛshiya nɛ Kush nɛ Libiya be efuliana so be benapo ti fo benapo na so nɛ bumo kikɛ malɛ kɔ abɛlso be asɔ kuŋamuso nɛ abɛlso be akpaŋwuro.

⁶ Gɔma nɛ Bɛf Togaama be nsawule so ebi ashi kelargato be esoso na nɛ bumo be benapo kikɛ gba ti bumo so. Efuli damtaana be basa gba ti bumo so.

⁷ To, kaŋɛ mo fanɛ mo nɛ mbe benapo e bela ase n wora shiriya n ya kɔ kena,

⁸ ŋkpal manɛ so, nfɛ damta be kaman meeŋ kaŋɛ mo nɛ e ya kɔ m pɔɔ efuli ko nɛ kumo be basa daŋ gama abar n shi efuli pɔtɛ damtaana so m ba chena a maa ŋana kena na. E beeŋ pɔ Israɛl be basa nɛ b chena kayurwushi so ashi abee nɛ b daŋ shile ŋ ka amo n chɛr na so.

⁹ Gɔg nɛ mbe benapo nɛ efuli damtaana nɛ b ti so na beeŋ kre m ba Israɛlebi na so fanɛ bɔrɛfu m ba buu bumo so fanɛ kuwɔlpa.”

¹⁰ Kusɔ nɛ Enyɛnpetale Ebɔrɛ na bee kaŋɛ Gɔg nde: “Jemanɛ na kaŋ fo, feeŋ fara a fɛ ŋkre lubi.

¹¹ Fo alɛ beeŋ baa sha kekɔ m pɔɔ efuli nɛ kumo be basa chena kayurwushi so ashi nde nɛ b maŋ pɔr egbalana a kuŋ amo na so.

¹² Kumo be kaman, nɛ fo kɔ n suge basa nɛ b wɔ ndegboŋana nɛ a daŋ bure a dese na be asɔ. B la basa nɛ b shi efuli pɔtɛana so nna m ba abar nsaa kɔ asɔbɔya nɛ asɔ nsaa wɔ durnya be kakpa k bee bɔlɔ kenishi ga na naniere.

¹³ Saŋɛ na so nɛ Sheba nɛ Dedan be efuliana so be basa nɛ Speen be efuli so be ndeana to be eyawujipo e bishi fo fanɛ fo gama fo benapo abar so nna nɛ fo kɔ n suge asɔ fanɛ shuwa nɛ gbiti nɛ asɔbɔya kikɛ n yɔ a?

¹⁴ Amoso nɛ Enyɛnpetale Ebɔrɛ na shuŋi ma fanɛ n ya kaŋɛ Gɔg fanɛ nɛ e wu mbe basa Israɛlebi ka wɔ kayurwushi to, e beeŋ koso

¹⁵ kakpa nɛ e wɔ ashi kelargato be esoso wɔfɔ wɔfɔ na n juŋkpar benapo lempo damta nɛ bumo kikɛ dii egbaŋɛ

¹⁶ ŋ kre m ba buu bumo so fanɛ bɔrɛfugboŋ ka ba kasawule na so na. Jemanɛ na kaŋ fo, meeŋ shin nɛ men kɔ m pɔɔ ma kasawule so nɛ efuliana na e pin esa nɛ e la ma ashi kusɔ nɛ meeŋ bɔla menyi so n wora a ŋini ma kecheembiya na.”

¹⁷ Nɛ Enyɛnpetale Ebɔrɛ na naŋ kaŋɛ le: “Fo asheŋ nɛ n daa malga dra dra jemanɛ nɛ n daŋ bɔla ma nyɛrbi, Israɛl be anebiana na so na, fanɛ kachako bee ba nɛ n shin nɛ esa ko e ba kɔ Israɛlebi kena na.

¹⁸ Kusɔ nɛ k beeŋ wora kachɛ nɛ Gɔg beeŋ ba kɔ Israɛlebi kena na beeŋ shin nɛ ma kagbene e kaa ga,

¹⁹ nɛ n nya agbo n shin nɛ kasawule e gbuŋgbuŋ eleŋ so ashi Israɛl be efuli so.

²⁰ Saŋɛ na so nɛ kufu e pɛ ekɔrɔtɔ nɛ mbuibi, nɛ asɔbɔya wurbi nɛ agboŋi kikɛ nɛ dimɛdi kama nɛ a wɔ durnya to so nɛ b baa chicha. Abeegboŋ nɛ abeebi kikɛ beeŋ bu n tɔr nɛ egbal kama e bure n tɔr kasawule.

²¹ Ma alɛ beeŋ shin nɛ etɔrɔ be yiri yiri e ta kufu n lɛ Gɔg nɛ mbe benapo so nɛ b kilgi a mɔ abar. Ma, Enyɛnpetale Ebɔrɛ na e kaŋɛ na.

²² Kumo be kaman nɛ n ta alɔ nɛ luwu ŋ gberge mo kusoe, nseŋ shin nɛ bɔrɛfu nɛ abɔrɛjembubi nɛ edɛ nɛ a bee suse fanɛ kejembu nɛ baa tre jɛrbi na e chulgi n wurge mo nɛ mbe benapo nɛ efuli damtaana nɛ b ti mo so na so.

²³ Kananɛ meeŋ ŋini efuliana na kikɛ ma keshi nɛ kecheembiya nna na. Aloŋ nɛ baaŋ pin fanɛ ma e la Enyɛnpe Ebɔrɛ na.”