Ezikɛl 37 - EBƆRƐ BE KAWƆL

Ketaŋɛ nɛ awibi wɔlso dese to na be asheŋ

¹ Saŋko ka fo nɛ Enyɛnpe Ebɔrɛ na be eleŋgboŋ na gbelge ma so nɛ mbe Kiyoyu ta ma ŋ gbelge to n yɔ ketaŋɛ ko to nɛ awibi sɔ kaplɛkama a dese.

² Ndoŋ nna nɛ Enyɛnpe Ebɔrɛ na keta ma n nite ketaŋɛ na to nɛ n wu fanɛ awibi na daa shi nseŋ daŋ wɔl n fuli a dese.

³ Nɛ e bishi ma: “Dimɛdi pibi, Ezikɛl, awibi ere beeŋ naŋ tiŋ m ba ŋkpa to a?” Nɛ ma alɛ kaŋɛ: “Enyɛnpetale Ebɔrɛ, fo nawule e naŋ tiŋ m pin kumo be loŋ!”

⁴ Ndoŋ nna nɛ e kaŋɛ: “Malga n sa awibi nɛ a wɔl n fuli na nseŋ kaŋɛ amo nɛ e nu Enyɛnpe Ebɔrɛ na be kamalga.

⁵ Kaŋɛ amo fanɛ le nɛ ma Enyɛnpetale Ebɔrɛ na kaŋɛ: Meeŋ shin nɛ efute e ba menyi to nɛ men naŋ nya ŋkpa.

⁶ Ma alɛ beeŋ sa menyi achin nɛ eblaŋ, nseŋ shin nɛ kawɔl e ba buu menyi so. Kumo be kaman nɛ n sa menyi efute nɛ men nya ŋkpa. Ndoŋ nɛ menyeeŋ pin fanɛ ma e la Enyɛnpe Ebɔrɛ na.”

⁷ Ndoŋ nna nɛ m malga n sa awibi na fanɛ kananɛ Enyɛnpe Ebɔrɛ kaŋɛ na. Ŋ kraa malga nna nseŋ nu egbri ko fanɛ basa ka bee kpla enɔ na nɛ awibi kɔŋkɔŋ na fara a chɛ abar so.

⁸ Ŋ kraa yil a keni amo nna nɛ achin nɛ eblaŋ nɛ kawɔl ba buu amo so. Ama ŋkpa daa maŋ wɔ amo to.

⁹ Ndoŋ nna nɛ Ebɔrɛ naŋ kaŋɛ ma: “Dimɛdi pibi, malga n sa afu. Kaŋɛ afu na fanɛ Enyɛnpetale Ebɔrɛ na yɛ k shi kaba kama so m ba luri eyurana nɛ a la bubuni a dese ere to nɛ e nya ŋkpa.”

¹⁰ Ŋ ka baŋ kaŋɛ loŋ, nɛ afu ber m ba luri eyurana na to nɛ a nya ŋkpa ŋ koso n yili. B daa la benapo be katuŋ gboŋgboŋi ko nna.

¹¹ Ade kikɛ be kaman, nɛ Enyɛnpe Ebɔrɛ na naŋ kaŋɛ ma: “Dimɛdi pibi, Israɛl be basa du fanɛ awibi kɔŋkɔŋ ere nna. Baa fubel nna a kaŋɛ fanɛ b wɔlso nna nsaa maa kɔ echefoso be tama kikɛ kebaawɔtɔ to.

¹² Amoso kaŋɛ bumo fanɛ ma, Enyɛnpetale Ebɔrɛ na bee sha kebugi bumo be nchaŋana nna nɛ b lar m bɛta m ba Israɛl be kasawule so.

¹³ Ŋ kaŋ wora loŋ, baaŋ pin fanɛ ma e la Enyɛnpe Ebɔrɛ na.

¹⁴ Ma kiyoyu beeŋ sa bumo efute nɛ b nya ŋkpa m ba kaa wɔ bumo gbagba be kasawule so. Ndoŋ nɛ baaŋ pin fanɛ ma e la Enyɛnpe Ebɔrɛ nɛ n nase kɔnɔ fanɛ meeŋ wora loŋ na. Ma, Enyɛnpe Ebɔrɛ na e kaŋɛ na.”

Juda nɛ Israɛl ka naŋ ki kuwurji koŋwule be asheŋ

¹⁵ Ade kikɛ be kaman, nɛ Enyɛnpe Ebɔrɛ na naŋ kaŋɛ ma.

¹⁶ E yɛ: “Dimɛdi pibi, fin kedibi nseŋ sibɛ le kumo so, ‘Juda be kuwurji be asheŋ.’ Kumo be kaman nɛ fo fin kedibi nyɔsopo nseŋ sibɛ le kumo alɛ gba so, ‘Israɛl be kuwurji be asheŋ.’

¹⁷ Kede be kaman, nɛ fo ta ndibi anyɔ na be nnɔso n chɔga abar so ŋ keta enɔ to nɛ k wora fanɛ a ka la kedibi koŋwule na.

¹⁸ Fo basa kaŋ bishi fo kusɔ nɛ k bee ŋini,

¹⁹ feeŋ tiŋ ŋ kaŋɛ bumo fanɛ ma, Enyɛnpetale Ebɔrɛ na bee sha keta kedibi nɛ k yili n sa Israɛl nna n chuge kumo nɛ k yili n sa Juda na so nna, saŋɛ na so amo anyɔ na beeŋ ki kedibi koŋwule a wɔ ma enɔ to.

²⁰ To, feeŋ keta ndibi anyɔ na fo enɔ to nɛ basa na e wu amo.

²¹ Ndoŋ nna nɛ fo kaŋɛ bumo fanɛ ma, Enyɛnpetale Ebɔrɛ na bee sha kelara ma basa kikɛ ashi efuliana nɛ b pesaŋ to n yɔ to na n shin nɛ b ba abar so ashi bumo gbagba be kasawule so.

²² Ma alɛ beeŋ shin nɛ b baa la basa koŋwule ashi Israɛl be efuli so. Baaŋ baa kɔ ewura koŋwule nɛ e beeŋ baa ji bumo so kuwura a maaŋ naŋ barga to a wɔtɔ.

²³ Bumo alɛ maaŋ naŋ bɔla kagbirshuŋ so n jija bumo be amu ŋko n wora alubi ŋ gbiti bumo be amu. Ma alɛ beeŋ sɔ bumo n yige ashi ekpa kama so nɛ baa bɔla so a wora alubi a debɔr ma na, nseŋ fɔr bumo so, nɛ b baa la ma basa, nɛ ma alɛ e baa la bumo be Ebɔrɛ.

²⁴ Ewura nɛ e du fanɛ ma kayɛrbi Deevid e naaŋ baa la bumo be ewura nɛ bumo kikɛ e wora kɔnɔkoŋwule a wɔ mbe kaseto nseŋ ta kashenteŋji a bɛ ma mbraana so.

²⁵ Kasawule nɛ n ta n sa ma kayɛrbi Jeekɔb na so nɛ baaŋ chena, kakpa nɛ bumo nanaana daŋ chena na. Bumo nɛ bumo be mbia nɛ kaman to ebi kikɛ beeŋ chena kumo so hale mbaanaayɔ, nɛ ewura nɛ e du fanɛ ma kayɛrbi Deevid na e baa ji bumo so kuwura.

²⁶ Ade kikɛ be kaman, ma nɛ bumo beeŋ luri kɔnɔkoŋwule be ŋkre to a ŋini kayurwushi nɛ baaŋ baa wɔtɔ to hale mbaanaayɔ. Ma alɛ beeŋ shin nɛ b baa wɔtɔ nseŋ wora keshi n ti so nɛ ma bɔrɛlambu na e baa wɔ bumo to mbaanaayɔ.

²⁷ Ma nɛ bumo e naa baa wɔ ndoŋ, nɛ m baa la bumo be Ebɔrɛ nɛ bumo alɛ e baa la ma basa.

²⁸ Jemanɛ nɛ meeŋ yili ma bɔrɛlambu bumo to mbaanaayɔ na, nɛ efuliana na beeŋ pin fanɛ ma Enyɛnpe Ebɔrɛ na e lara Israɛlebi na ŋ ki ma basa.”