Ezikɛl 36 - EBƆRƐ BE KAWƆL

Ebɔrɛ be nɛfa ka ba Israɛl so be asheŋ

¹ Ndoŋ nna nɛ Enyɛnpe Ebɔrɛ na naŋ kaŋɛ le: “Dimɛdi pibi, Ezikɛl, kaŋɛ abee nɛ a wɔ Israɛl be efuli so na fanɛ a nu kubɔya nɛ ma,

² Enyɛnpetale Ebɔrɛ na kɔ n sa amo. Israɛl mo doŋana daŋ malga mmalga jiga ŋ kaŋɛ fanɛ, Naniere abee dra na ki bumo peya nna!

³ Amoso bɔ kubɔya nɛ ma Enyɛnpetale Ebɔrɛ na bee kaŋɛ ere. Jemanɛ nɛ efuli nɛ a chena ŋ kulti Israɛl na kɔ n suge Israɛl be abee na, ekama na daŋ wora Israɛl eyurto nna.

⁴ Amoso naniere kusɔ nɛ ma Enyɛnpetale Ebɔrɛ na bee kaŋɛ menyi abeegboŋ nɛ abeebi nɛ eboŋana nɛ ataŋɛ nɛ mboŋ nɛ a bure a dese nɛ ndegboŋ nɛ basa shile amo to nɛ efuliana nɛ a kulti menyi na ba muu amo to be asɔ n yɔ nseŋ wora menyi eyurto na kikɛ nde.

⁵ Ma, Enyɛnpetale Ebɔrɛ na malga agbogboŋ so nna ŋ gbiti efuliana nɛ a kulti fo Israɛl be efuli na kikɛ, fɔŋfɔŋ Edɔm be efuli na. Ŋkpal manɛ so, bumo e daŋ ji eyur ga nseŋ daŋ sɔ ma kasawule nɛ kumo be asɔbɔya be ejikpa ŋ ki bumo peya.

⁶ Amoso malga ŋ kaŋɛ Israɛl be efuli so be abeegboŋ nɛ abeebi nɛ eboŋana nɛ ataŋɛ kusɔ nɛ ma, Enyɛnpetale Ebɔrɛ na bee kaŋɛ kukɔrkɔ nɛ agbo so ŋkpal kananɛ efuliana na tege nseŋ wora bumo yeryerbi so.

⁷ Ma, Enyɛnpetale Ebɔrɛ na bɔ ntaŋ fanɛ efuliana na beeŋ ji anishinyɔr.

⁸ Ama ndibi nɛ a yil abee so ashi ma basa, Israɛlebi, be efuli so na beeŋ naŋ purge nseŋ sɔr asɔrso n sa bumo. K maaŋ chɛr baaŋ bɛta m ba epe.

⁹ N nyi menyi Israɛlebi be asheŋ nɛ men be asheŋ tir n sa ma. Ma alɛ beeŋ shin nɛ men naaŋ dɔ menyi be adɔsawule so n duu adɔjibi.

¹⁰ Kumo be kaman nɛ n shin nɛ Israɛl be basa e naŋ wora keshi n chena menyi be nsawule so nɛ basa e naŋ chena ndeana to nseŋ lɔŋɛ alambure na m pɔr.

¹¹ Ma alɛ beeŋ naŋ shin menyi be asɔbɔya kikɛ e salga n wora keshi nɛ men naaŋ chena kasawule na so fanɛ kananɛ men daŋ chena kumo so dra na. Menyeeŋ dii kedama ga a chɔ kananɛ men daa du na, saŋɛ na so nɛ menyeeŋ pin fanɛ ma e la Enyɛnpe Ebɔrɛ na.

¹² Ade kikɛ be kaman nɛ n shin nɛ ma basa Israɛlebi na e naŋ bɛta m ba chena bumo be nsawule so. Nsawule na beeŋ baa la bumo gbagba peya nɛ akoŋ malɛ maaŋ naŋ mɔ bumo be mbia.

¹³ Ma, Enyɛnpetale Ebɔrɛ na yɛ: Kashenteŋ nɛ basa bee kaŋɛ fanɛ kasawule na maa wora ajibi nɛnɛ nsaa shin nɛ akoŋ bee mɔ kumo be basa.

¹⁴ Ama yili jemanɛ ere a yɔ, k beeŋ baa wora ajibi nɛnɛ nɛ menyi maaŋ naŋ paŋ menyi be mbia. Ma Enyɛnpetale Ebɔrɛ na e kaŋɛ na.

¹⁵ Kumo be kaman, menyi maaŋ naŋ bugi asoe a nu mmalga jiga nɛ efuliana na bee malga a gbiti menyi. Meni alɛ maaŋ naŋ keni n wu basa ka bee wora menyi eyurto. Kasawule na maaŋ naŋ shin nɛ men paŋ menyi be mbia. Ma, Enyɛnpetale Ebɔrɛ na, e kaŋɛ na.”

Israɛl be basa be ŋkpa popɔr be asheŋ

¹⁶ Ndoŋ nna nɛ Enyɛnpe Ebɔrɛ na naŋ kaŋɛ ma le:

¹⁷ “Dimɛdi pibi, Israɛlebi na ka daa wɔ bumo be kasawule so na, b daŋ bɔla bumo be kebaawɔtɔ nɛ asheŋ woraso so nna n jija kumo. Kananɛ eche nɛ e bee lar ntamaŋ maŋ walɛ so daŋkare be ekpa so na, nɛ bumo be kebaawɔtɔ na daa du n sa ma.

¹⁸ Ndoŋ nna nɛ n nya agbo n wɔtɔ bumo ŋkpal kabasamɔ nɛ kagbirshuŋ nɛ b ta n jija kasawule na so,

¹⁹ nseŋ pesaŋ bumo to n yɔ efuli pɔtɛana so. Bumo be kebaawɔtɔ nɛ asheŋ woraso so nɛ n daŋ ji bumo demu.

²⁰ Kaplɛkama malɛ nɛ b yɔ, b daa ŋaba ma ketre cheembi na nna; ŋkpal manɛ so, le nɛ efuli pɔtɛana be basa daa kaŋɛ: ‘Enyɛnpe Ebɔrɛ na be basa nna na. E tintiŋ bumo nna n lar bumo gbagba be kasawule so.’

²¹ Ndoŋ nna nɛ kusɔ nɛ efuli pɔtɛana be basa bee fɛ a laŋɛ ma kaplɛa so na tɔrɔ ma ga.

²² Amoso kaŋɛ Israɛlebi na kubɔya nɛ ma, Enyɛnpetale Ebɔrɛ na kɔ nɛ sa bumo: Mannɛ menyi Israɛlebi so nɛ meeŋ wora kusɔ nɛ mee sha kewora ere, ama ma ketre cheembi nɛ men ŋaba efuli pɔtɛ kama nɛ men yɔ kumo so na so.

²³ Ŋ kaŋ lara kecheembiya nɛ k wɔ ma ketregboŋ nɛ men ŋaba ashi efuliana na so na ŋ ŋini bumo na nɛ baaŋ pin fanɛ ma e la Enyɛnpe Ebɔrɛ na. Ma, Enyɛnpetale Ebɔrɛ na e kaŋɛ, fanɛ men bɔla menyi so ŋ ŋini efuli pɔtɛana na fanɛ n du cheembi nna.

²⁴ Meeŋ lara menyi ashi efuli pɔtɛana kama to m ba epe menyi gbagba be kasawule so.

²⁵ Nɛ kebaadu fanɛ ŋ ka wora nchu lela ŋ ŋmenyaŋ menyi so nɛ men nyalɛ so ashi kagbirshuŋ nɛ kusɔ kama nɛ k shin nɛ men wora eyurpi na to.

²⁶ Ade be kaman, nɛ n lara menyi be ŋgbene kpakpaso fanɛ kejembu na nseŋ sa menyi ŋgbene popɔr nɛ a beeŋ shin nɛ men baa wora ma kasonu.

²⁷ Ma alɛ beeŋ ta ma kiyoyu n wɔtɔ menyi to nseŋ shin nɛ men bɛ ma mbraana nɛ keŋini kikɛ so kenishipereso.

²⁸ Saŋɛ na so nɛ men chena kasawule nɛ n ta n sa men nananyɛnana na so nsaa la ma basa nɛ ma alɛ e baa la menyi be Ebɔrɛ.

²⁹ Meeŋ kuŋ menyi ashi kusɔ kama nɛ k bee shin nɛ menyee wora eyurpi na to nseŋ shin nɛ menyi be ayu e wora nɛnɛ, saŋɛ na so akoŋ maaŋ naa wɔtɔ.

³⁰ Ma alɛ beeŋ naŋ shin nɛ menyi be ndibi sɔrso nɛ adɔjibi e foo, saŋɛ na so menyi maaŋ naŋ ji anishinyɔr ashi efuliana na so ŋkpal akoŋ so.

³¹ Ade kikɛ be kaman, menyeeŋ nyiŋi menyi be asheŋ woraso lubi nɛ a shin nɛ men gbagba e kishi menyi be amu ŋkpal kusɔ nɛ men wora so.

³² Kede be kaman nɛ Enyɛnpetale Ebɔrɛ na kaŋɛ le: Israɛlebi, mee sha nɛ men pin fanɛ mannɛ menyi so nɛ mee wora asheŋ ere, ama mee sha nna nɛ anishinyɔr nɛ nyɔmɔ e pɛ menyi ŋkpal asheŋ nɛ men wora na so.”

³³ Nɛ Enyɛnpetale Ebɔrɛ na naŋ kaŋɛ le: “Kachɛ nɛ meeŋ kpra menyi be alubi ashi menyi so na nɛ meeŋ naŋ shin nɛ men chena menyi be ndegboŋana to nseŋ lɔŋɛ alambure na m pɔr.

³⁴ Ekama nɛ e daŋ bɔla menyi be adɔana ase a choŋ daa wu fanɛ e ki kupuŋ nna a dese, ama meeŋ naŋ shin nɛ men lɔŋɛ amo so n dɔ.

³⁵ Nɛ ekama na e naŋ kaŋɛ fanɛ kasawule nɛ k daa la kudɔpuŋ a dese jiga na a kilgi a walɛ fanɛ Iden be Kudɔbi na. Kumo be kaman nɛ wu kananɛ ndeana nɛ a daŋ ki alambure a dese nɛ shɛŋ daa maŋ naa wɔ amo to na naŋ nya basa nɛ b pɔr egbalana ŋ kulti amo nsaa wɔ amo to na.

³⁶ Ndoŋ nna nɛ basa nɛ b wɔ efuliana nɛ a mata menyi nseŋ kraa wɔtɔ na e pin fanɛ ma Enyɛnpe Ebɔrɛ na e naa lɔŋɛ menyi be nde bureso a pɔr nsaa dɔ menyi be adɔpuŋ a du. Ma Enyɛnpe Ebɔrɛ na e nase kumo be kɔnɔ, ma alɛ beeŋ wora loŋ gbagba chap.”

³⁷ Ade kikɛ be kaman, nɛ Enyɛnpetale Ebɔrɛ na naŋ kaŋɛ le: “Meeŋ naŋ shin nɛ Israɛlebi na e kule ma kechɛto nɛ n shin nɛ b wora keshi n ti so fanɛ mbolpɔ na.

³⁸ Nɛ nde nɛ a bure a dese ere e naŋ bɔlɔ basa fanɛ kananɛ mbolpɔ daŋ bɔlɔ Jerusalɛm to nɛ b daa ta amo a lara esarga nchɛgboŋachɛ na. Ndoŋ nɛ baaŋ pin fanɛ ma e la Enyɛnpe Ebɔrɛ na.”