Ezikɛl 34 - EBƆRƐ BE KAWƆL

Israɛl be benimu nɛ b la mbolpɔkpapo na be asheŋ

¹ Nɛ Enyɛnpe Ebɔrɛ na kaŋɛ ma le:

² “Dimɛdi pibi, Ezikɛl, Israɛl be bejuŋkparpoana na du fanɛ mbolpɔkpapo nɛ baa keni ma basa nɛ b du fanɛ mbolpɔ so nna. Ama mee sha fanɛ fo kaŋɛ Israɛl be bejuŋkparpo na fanɛ b maŋ wora n nyalɛ nɛ ekama e nu. Kaŋɛ bumo kusɔ nɛ ma Enyɛnpetale Ebɔrɛ na kaŋɛ fanɛ: Asheŋ maaŋ nyalɛ n sa menyi, Israɛl be mbolpɔkpapo ere! Menyi be amu nɛ menyee keni so nseŋ kplaŋ ma mbolpɔ so.

³ Menyee nuu bumo be kenyipochu nna nsaa ta bumo be afuibi a lue asɔbuuso nseŋ naa mɔ bumo be belelabi a we, ama menyi alɛ maa keni bumo so nɛnɛ.

⁴ Menyee maa keni bumo be bumo nɛ b maŋ kɔ eleŋ na so, ŋko a chɛ bumo nɛ baa lɔ na ŋko a wɔtɔ bumo nɛ b doro na be achuu to adur a kre amo ŋko a kuŋ bumo nɛ baa lar a yɔ mboŋ ko na a ba ŋko a fin bumo nɛ foe na. Men du nyaŋnyaŋ nna a tɔrɔ bumo.

⁵ Ŋkpal mbolpɔ na ka maŋ kɔ ekpapo so, b pesaŋ to nna nɛ kupuŋ to be asɔbɔya lubi bee pɛ bumo a ji.

⁶ Ma mbolpɔ ya kaa na abeegboŋ nɛ abeebi so nna. B daŋ pesaŋ to nna a wɔ durnya be kaplɛkama nɛ esa kikɛ malɛ daa maŋ keni n fin bumo.

⁷ Amoso, menyi mbolpɔkpapoana na e nu kusɔ nɛ ma, Enyɛnpe Ebɔrɛ na bee kaŋɛ menyi.

⁸ Nɛ men nu n sa ma, asheŋ beeŋ baa bɔ menyi so ŋkpal manɛ so ma e la Enyɛnpetale Ebɔrɛ nɛ e bee sa ŋkpa na. Kupuŋ to be asɔbɔya lubi pɛ ma mbolpɔ m mɔ n we ŋkpal esa kikɛ ka maa keni bumo so so. Ma mbolpɔkpapoana maŋ wora ania fanɛ baŋ fin mbolpɔ na. Bumo gbagba be amu so nɛ baa keni so, mannɛ ma mbolpɔ.

⁹ Amoso, menyi mbolpɔkpapoana na e nu nfe.

¹⁰ Ma, Enyɛnpetale Ebɔrɛ na yɛ ma nɛ menyi maŋ naa kɔ shɛŋ. Ma alɛ beeŋ suge ma mbolpɔ menyi be enɔ to nɛ menyi maaŋ naa la bumo be ekpapo a nya bumo a mɔ a we.

Mbolpɔkpapo lela na be asheŋ

¹¹ Ma, Enyɛnpetale Ebɔrɛ na e naa kaŋɛ menyi na fanɛ ŋ gbagba e naŋ fin ma mbolpɔ nsaa keni bumo so

¹² fanɛ kananɛ mbolpɔkpapoana bee keni bumo be mbolpɔ nɛ b daŋ pesaŋ to nɛ b naŋ ya bar bumo abar so na. Ma alɛ beeŋ bɛta bumo n shi mboŋ nɛ b pesaŋ to n yɔ kachɛ nɛ asheŋ daŋ maŋ nite nɛnɛ n sa bumo na kikɛ m ba.

¹³ Meeŋ lara bumo efuli pɔtɛana so m ba gama bumo abar so nseŋ shin nɛ b bɛta m ba bumo gbagba be kasawule so. Ma alɛ beeŋ baa la bumo be ekpapo nseŋ shin nɛ b nya n ji nɛnɛ ashi Israɛl be abee nɛ eboŋana ase.

¹⁴ Ade be kaman, meeŋ shin nɛ b nya n ji kayurwushi so ashi abeemase nɛ ataŋɛ to nɛ mboŋ kama nɛ ajibi lela wɔ ashi Israɛl be kasawule so kikɛ.

¹⁵ Ŋ gbagba e naaŋ baa keni ma mbolpɔ so nseŋ fin ewushi be kakpa n sa bumo. Ma, Enyɛnpetale Ebɔrɛ e kaŋɛ na.

¹⁶ Ma alɛ beeŋ fin bumo be bumo nɛ foe na nseŋ bɛta bumo nɛ yeŋ na m ba. Kumo be kaman nɛ ŋ kre bumo nɛ b doro na be achuu nseŋ chɛ bumo nɛ baa lɔ na. Ama bekama nɛ b ji n daŋ nsaa kɔ eleŋ na bre, meeŋ mur bumo, ŋkpal manɛ so, n la mbolpɔkpapo nɛ e bee wora kusɔ nɛ k daga nna.

¹⁷ Naniere ma Enyɛnpetale Ebɔrɛ na bee kaŋɛ menyi nɛ men la ma mbolpɔ na nna fanɛ meeŋ keni menyi to m barga belela na ashi belubi na to nɛ mbolpɔ ashi mboe to.

¹⁸ Menyi be beko ji ajibi lela nna ŋkukwe; nsaa chichi amo nɛ menyi maŋ ji so a wea shishɛr to! Menyeeŋ nuu nchu lela nna nseŋ gbar nchu nɛ menyi maaŋ nuu na to!

¹⁹ Saŋɛ na so nɛ ma mbolpɔ nɛ b ka na e ji ajibi nɛ men chichi so na nseŋ nuu nchu nɛ men gbar to na.

²⁰ Amoso, naniere ma Enyɛnpetale Ebɔrɛ na bee kaŋɛ menyi nna fanɛ, meeŋ keni so m barga mbolpɔ nɛ b kɔ eleŋ na ashi bumo nɛ b maŋ kɔ eleŋ na to.

²¹ Ŋkpal manɛ so, menyi bumo nɛ men kɔ eleŋ na bee ŋin bumo nɛ b maŋ kɔ eleŋ na nna a lar ekarso nsaa ta menyi be alambɛ a pur bumo a lar ma mbolpɔ to.

²² Ama ma alɛ beeŋ mɔlga ma mbolpɔ nɛ menyi maaŋ naa kɔrfɛ bumo. Meeŋ keni bumo so nseŋ barga belela na ashi belubi na to.

²³ Ade kikɛ be kaman nɛ n sa bumo ewura nɛ e beeŋ baa du fanɛ ma kayɛrbi ewura Deevid nɛ e baa kpa bumo nsaa keni bumo so nɛnɛ.

²⁴ Saŋɛ na so nɛ ma Enyɛnpe Ebɔrɛ na e baa la bumo be Ebɔrɛ, nɛ ewura nɛ e du fanɛ ma kayɛrbi ewura Deevid na e baa la bumo be ejuŋkparpo. Ma, Enyɛnpe Ebɔrɛ e kaŋɛ na

²⁵ Ma nɛ bumo beeŋ wora kɔnɔkoŋwule be ŋkre nɛ k beeŋ bar bumo kayurwushi. Ma alɛ beeŋ ju kupuŋ to be asɔbɔya lubi na kikɛ kasawule na so, saŋɛ na so ma mbolpɔ maaŋ naa ŋana kufu.

²⁶ Ade be kaman, meeŋ nɛfa bumo nseŋ shin nɛ b baa wɔ ma kebee cheembi na ase nɛ n sa bumo bɔrɛchu lela jemanɛ nɛ k daga nsaa la nɛfa na.

²⁷ Saŋɛ na so nɛ ndibi na e sɔr nɛnɛ nɛ nsawule na kikɛ malɛ e wora adɔjibi. Kumo be kaman nɛ ekama e chena mo gbagba be kasawule so nɛ kayurwushi. Ŋ kaŋ tuge ŋgbɛlɛbi nɛ a kre ma basa na, nseŋ shin nɛ b nya bumo be amu ashi basa nɛ b pɛ bumo anya na be enɔ na nɛ baaŋ pin fanɛ ma e la Enyɛnpe Ebɔrɛ na.

²⁸ Loŋ be jemanɛ so, efuli pɔtɛana maaŋ naŋ tiŋ m ba kɔ n suge bumo be asɔbɔya, nɛ kupuŋ to be asɔ lubi gba maaŋ naŋ pɛ bumo n ji. Baaŋ chena kayurwushi so nna nɛ esa kama maa naa funti bumo.

²⁹ Ade kikɛ be kaman, meeŋ sa bumo kasawule lela nɛ akoŋ maaŋ naa wɔ kumo so. Efuli pɔtɛana be basa maaŋ naaŋ mushe bumo kikɛ.

³⁰ Aloŋ nɛ ekama beeŋ pin fanɛ ma e naa kuŋ Israɛl be basa nɛ b la ma basa na. Ma, Enyɛnpetale Ebɔrɛ e kaŋɛ na.”

³¹ Kumo be kaman nɛ Enyɛnpetale Ebɔrɛ na kaŋɛ le: “Menyi, ma mbolpɔ, nɛ mee bela na, la ma basa nna nɛ ma alɛ la menyi be Ebɔrɛ.”