Ezikɛl 32 - EBƆRƐ BE KAWƆL

B ka ta Ijipt be ewura m ber laŋchaŋ be asheŋ

¹ B ka pɛ ewura Jehowachin nɛ anyi be galeŋga anya n yɔ Babilɔn be efuli so na be kafɛ kudu anyɔsopo na be kufɔl kudu anyɔsopo na to be kachɛ sososo na, nɛ Enyɛnpe Ebɔrɛ na kaŋɛ ma le:

² “Dimɛdi pibi, Ezikɛl, kaŋɛ Ijipt be ewura, Fɛɛro, kenishipere be kasokpele be kubɔya ere fanɛ n yɛ: ‘Fee wora fanɛ buluŋ nna ashi efuliana na to, ama fo alɛ baa la fanɛ lɔr to be laŋchaŋ nɛ fee bri nchu to nna a jija amo.

³ Efuli damtaana be basa kaŋ shɛr abar so, meeŋ to fo kashewu nseŋ shin nɛ b gberge fo nɛ kashewu na n dii kedeŋi so.’

⁴ Kumo be kaman, nɛ n lara fo n lɛ kasawule nseŋ bar durnya to be mbuibi nɛ asɔbɔya kikɛ nɛ a baa ji fo.

⁵ Ma alɛ beeŋ shin nɛ fo eblaŋ bɛso e dese abee so nɛ ataŋɛ to kikɛ,

⁶ nɛ n chulgi fo ŋklaŋ m pɔ abee kikɛ hale nɛ a bɔlɔ eboŋana.

⁷ Jemanɛ nɛ meeŋ mur fo na kaŋ fo, meeŋ shin nɛ kakpa e buu so nɛ epeŋi nɛ kufɔl nɛ achɛkpabi kikɛ e fulto ŋ gben.

⁸ Ma alɛ beeŋ shin nɛ esoso be kefulto kikɛ e ki tentembiri m buu fo efuli na kikɛ so. Ma Enyɛnpetale Ebɔrɛ e kaŋɛ na.

⁹ Jemanɛ nɛ meeŋ shin nɛ fo kemur be asheŋ be baru e sɔ efuliana na so na, efuli damta so be basa nɛ fo maŋ naŋ nu bumo be asheŋ be ŋgbene beeŋ jija bumo ga.

¹⁰ Kusɔ nɛ meeŋ wora fo na beeŋ chinchiŋ basa damta. Kachɛ nɛ meeŋ pee ma tokobi m mɔ fo na, kufu beeŋ tɔr bewura so nɛ b baa chicha ŋkpal bumo gbagba be ŋkpa so.”

¹¹ Ade be kaman nɛ Enyɛnpetale Ebɔrɛ na kaŋɛ Ijipt be ewura le: “Babilɔn be ewura beeŋ ba kɔ fo kena.

¹² Ma alɛ beeŋ shin nɛ efuliana nɛ amo be basa maa wu kuwɔr e ba mɔ fo basa kikɛ nseŋ mur asɔ kama nɛ fee puchi so na kikɛ.

¹³ Kumo be kaman nɛ m mɔ menyi be ana nɛ b wɔ nchu ase kikɛ, saŋɛ na so edimɛdi ŋko ana maaŋ naa wɔtɔ a jija nchu na.

¹⁴ Saŋɛ na so nɛ n shin nɛ menyi be nchuana e tɔr so a du keleŋkelembi nɛ menyi be eboŋana e baa shile boeŋ boeŋ. Ma Enyɛnpetale Ebɔrɛ e kaŋɛ na.

¹⁵ Ŋ kaŋ mur bekama nɛ b wɔ Ijipt be efuli so kikɛ nseŋ shin nɛ kasawule na dese fuloŋ na nɛ baaŋ pin fanɛ ma e la Enyɛnpe Ebɔrɛ na.

¹⁶ Kasokpele ere beeŋ baa la awɔba nɛ efuli pɔtɛana so be beche e boŋ kumo n shu Ijipt nɛ kumo be basa kikɛ be keeli. Ma, Enyɛnpetale Ebɔrɛ e kaŋɛ na.”

¹⁷ B ka pɛ anyi be beko nɛ ewura Jehowachin n yɔ kenyaya to na be kafɛ kudu anyɔsopo na to be kufɔl juŋkparso na be kachɛ kuduanusopo na nɛ Enyɛnpe Ebɔrɛ na kaŋɛ ma le.

¹⁸ E yɛ: “Dimɛdi pibi, baa shu ŋkpal Ijipt be basa damta so nseŋ shin nɛ b pin fanɛ bubuni to e daga bumo. Ndoŋ e la kakpa nɛ baaŋ ta bumo nɛ efuli pɔtɛana nɛ a kɔ eleŋ ga na be basa n ya puli.”

¹⁹ Kaŋɛ bumo le: “Menyee tama fanɛ men walɛ nna ga a chɔ ekama a? Menyeeŋ yɔ bubuni to n ya tu basa nɛ b maa ŋana Ebɔrɛ na n dese ndoŋ.

²⁰ Menyi, Ijipt be basa, nɛ bumo nɛ b mɔ kena to na kikɛ e naŋ wu luwu koŋwule. Ŋkpal manɛ so, tokobi na teŋ wora shiriya nɛ k mɔ menyi kikɛ.

²¹ Saŋɛ na so nɛ benapo lempoana nɛ b daŋ kɔ n sa Ijiptebi nɛ b mɔ bumo na e wora menyi Ijiptebi na maraba ashi bubuni to. Baaŋ boŋ to ŋ kaŋɛ le: ‘Basa nɛ b maa ŋana Ebɔrɛ nseŋ wu kena to na e ba bubuni to nfe m ba ka dese na!’

²² Asiriya nɛ kumo be benapo be nchaŋana kulti kumo na gba wɔ ndoŋ. Kena to nɛ b daŋ mɔ bumo kikɛ.

²³ Bumo be nchaŋana dese efuli na kikɛ so nna. Ama bumo alɛ e daa funti basa jemanɛ ko na.

²⁴ Elam nɛ kumo be benapo be nchaŋana kulti kumo na gba wɔ ndoŋ. Kena to nɛ b daŋ mɔ basa nɛ b maa ŋana Ebɔrɛ na kikɛ nɛ b yɔ bubuni to. Bumo e daa funti basa nɛ b wɔ ŋkpa to na, ama naniere bumo e ji anishinyɔr a dese bubuni to na.

²⁵ Elam e dese kakpa nɛ basa nɛ b mɔ kena to dese na nɛ kumo be benapo be nchaŋana kulti efuli na kikɛ so na. Bumo koŋwule na e daa funti basa na, ama naniere bumo e ji anishinyɔr n wu n tu basa nɛ b mɔ kena to a dese na.

²⁶ Meshɛk nɛ Tubal nɛ amo be benapo be nchaŋana kulti amo na gba wɔ ndoŋ. B la basa nɛ b maa ŋana Ebɔrɛ nna nɛ b mɔ bumo kikɛ kena to. Bumo e daa funti basa nɛ b wɔ ŋkpa to na.

²⁷ B daa maŋ puli bumo bunyaŋ so fanɛ kananɛ b daa puli dra na be basa nɛ b ji eleŋ ga nɛ b daa ta bumo nɛ bumo be akɔsɔ kikɛ a puli na. Jemanɛ ko le be benapo nɛ b ji eleŋ ga ere daa funti basa nɛ b wɔ ŋkpa to nna.

²⁸ Kananɛ Ijiptebi gba beeŋ wu m mur nseŋ dese basa nɛ b maa ŋana Ebɔrɛ nseŋ wu kena to na nna na.

²⁹ Edɔm nɛ mbe bewura nɛ bejuŋkparpo kikɛ gba wɔ ndoŋ. B daa la benapo lempo nna, ama naniere bumo nɛ basa nɛ b maa ŋana Ebɔrɛ nseŋ wu kena to na kikɛ e dese bubuni to na.

³⁰ Benimuana nɛ b shi kelargato be esoso na nɛ basa nɛ b daŋ shi Sidɔn be kadegboŋ to m ba na kikɛ gba wɔ ndoŋ. Bumo be eleŋ gboŋ daa funti basa nna, ama naniere bumo alɛ gba ta anishinyɔr nna n tu basa nɛ b wu kena to n yɔ bubuni to. Bumo kikɛ ji nyɔmɔ ashi bubuni to nna na.”

³¹ Ade kikɛ be kaman, nɛ Enyɛnpetale Ebɔrɛ na kaŋɛ le: “Ijipt be ewura nɛ mbe benapo kaŋ wu, bekama nɛ baa wu kena to na bumo be ŋgbene beeŋ wushi.

³² Ŋkpal manɛ so, ma e shin nɛ Ijipt be ewura daa funti basa nɛ b wɔ ŋkpa to, ama baaŋ mɔ mo nɛ mbe benapo kikɛ nseŋ puli bumo kakpa nɛ b puli basa nɛ b maa ŋana ma nseŋ wu kena to na. Ma, Enyɛnpetale Ebɔrɛ e kaŋɛ na.”