Ezikɛl 31 - EBƆRƐ BE KAWƆL

B ka ta Ijipt m ber kedibi nɛ baa tre Sida na be asheŋ

¹ B ka daŋ pɛ ewura Jehowachin nɛ anyi be galeŋga anya n yɔ Babilɔn be efuli so na be kafɛ kudukakosopo to be kufɔl sasopo na to be kachɛ sososo na nɛ Enyɛnpe Ebɔrɛ na kaŋɛ le:

² “Dimɛdi pibi, kaŋɛ Ijipt be ewura, Fɛɛro nɛ mbe basa fanɛ Ebɔrɛ kaŋɛ fanɛ; Fo kɔ eleŋ ga a chɔ ekama durnya to! Wanɛ nɛ meeŋ ta ŋ keshɛr fo?

³ Fo du fanɛ Lebanɔn be efuli so be kedibi nɛ baa tre sida; Nɛ k kɔ ayabi lela nɛ kiyoyul ga, nsaa wɔ nteŋ a sha kechute awɔlpa na nna.

⁴ Nchu e sa kumo kayul. Achubu nɛ a wɔ nchiŋ e shin nɛ k daŋ nteŋ; Nɛ eboŋana daa shile a kulti kumo be kaseto n shin nɛ kakpa nɛ k yil na bee wushi a sa kupuŋ to be ndibi kikɛ.

⁵ Ŋkpal k ka daa nya kayul nɛnɛ so, nɛ k daŋ nteŋ a chɔ ndibi nɛ a ka na. Kumo be ayabi daŋ nɛnɛ nsaa wɔ nteŋ nna.

⁶ Ndoŋ nna nɛ mbuibi be yiri kikɛ tɔl asha kumo be ayabi so; Nɛ kupuŋ to be asɔbɔya bee kurge amo be bibi kumo be kifito; Nɛ efuliana nɛ a wɔ durnya to be basa bee chena kumo be kiyoyul to a wushi.

⁷ Kedibi na daa walɛ ga. Kumo be ayabi daa wɔ nteŋ ga. Kumo be nliŋi daa fo kasawule to be nchu nna.

⁸ Ebɔrɛ be kudɔbi na to be ndibi nɛ baa tre sida na be kekama maŋ walɛ n fo kumo so. Ndibi kpakpaso nɛ baa tre fir na be kekama be ayabi maŋ fo kumo be ayabi so. Kedibi kikɛ be ayabi be nteŋ maŋ fo kumo peya so. Ebɔrɛ be kudɔbi na to malɛ be kedibi kikɛ be kela maŋ fo kumo peya so.

⁹ Mee to kumo nɛ k walɛ nsaa kɔ ayabi damta. Kedibi kama nɛ k wɔ Ebɔrɛ be kudɔbi nɛ baa tre Iden na to na daa sha kebaadu fanɛ kumo nna, ŋkpal loŋ so nsaa besa kumo eyur.

¹⁰ Amoso, naniere, kusɔ nɛ ma Enyɛnpetale Ebɔrɛ na bee kaŋɛ fanɛ k beeŋ wora kedibi nɛ k daŋ nteŋ hale n ya fo awɔlpa to na nde. K kaa daŋ nteŋ ga so nɛ k fara a wu kumo be kumu;

¹¹ ŋkpal loŋ so, ŋ kini kumo nna nsaa beeŋ shin nɛ efuli pɔtɛ ko be ewura e sɔ kumo nseŋ gberge kumo kusoe ŋkpal kumo be kumu kpakpaso so.

¹² Befɔ nɛ b maa wu kuwɔr beeŋ ku kumo nseŋ yige kumo n nase kakpa nɛ k beeŋ tɔr na. Kumo gbagba nɛ kumo be ayabi beeŋ tɔr kebee kama nɛ ketaŋɛ kama nɛ a wɔ efuli na so so. Saŋɛ na so efuliana nɛ a daa chena kumo be kiyoyul to na beeŋ yɔ mboŋ ko.

¹³ Kumo be kaman nɛ mbuibi e ba kaa jɔŋɛ kedibi nɛ k tɔr a dese na so nɛ kupuŋ to be asɔbɔya malɛ e baa chichi kumo be ayabi so.

¹⁴ Amoso yili le be jemanɛ a yɔ, kanaŋkamaso nɛ kedibi kikɛ nya nchu, k maaŋ tiŋ n daŋ nteŋ fanɛ kumo. Amo be kekama beeŋ wu fanɛ kananɛ edimɛdi bee wu a gbelge kasawule to a yɔ bubuni to na.”

¹⁵ To, kusɔ nɛ Enyɛnpe Ebɔrɛ na kaŋɛ nde: “Kachɛ nɛ kedibi na beeŋ wu n yɔ bubuni to na, meeŋ shin nɛ elɔr nɛ mbombiana e bɔlɔ m buu kumo so a ŋini fanɛ a bee shu kumo be keeli nna. Meeŋ shin nɛ elɔr nɛ mbombiana kikɛ e sa maŋ naŋ shile. Kumo be kaman nɛ tentembiri e buu Lebanɔn be efuli so be abee so nɛ kiyi to be ndibi kikɛ e gbaŋgbaŋ amo be afantaŋ.

¹⁶ Jemanɛ nɛ meeŋ shin nɛ kedibi na e wu n yɔ bubuni to na, kumo be asheŋ beeŋ shin nɛ kufu e pɛ efuliana nɛ b baa chicha. Iden to be ndibi nɛ Lebanɔn be efuli so be ndibi nɛ a bee nya nchu nɛnɛ nɛ amo be nliŋi luri kasawule to kikɛ be ŋgbene beeŋ fuli amo ŋkpal k ka wu n tɔr so.

¹⁷ Bekama nɛ b daa chena kumo be kiyoyul to na gba beeŋ tu kumo ŋ gbelge to n yɔ bubuni to kakpa nɛ bumo nɛ b daŋ kewu na yɔ na.

¹⁸ Kedibi na e la fo Ijipt be ewura nɛ mbe basa. Iden be kudɔbi na to be ndibi gba be kela daa maŋ fo feya so. Ama naniere, kananɛ Iden be ndibi wu ŋ gbelge to n yɔ bubuni to na nɛ fo alɛ gba beeŋ wu n ya tu basa nɛ b maa ŋana Ebɔrɛ nɛ bumo nɛ b wu kena to na. Ma Enyɛnpe Ebɔrɛ na e malga na.”