Ezikɛl 30 - EBƆRƐ BE KAWƆL

Enyɛnpe Ebɔrɛ ka beeŋ gberge Ijipt kusoe be asheŋ

¹ Ade kikɛ be kaman, nɛ Enyɛnpe Ebɔrɛ na naŋ kaŋɛ ma le:

² “Dimɛdi pibi, Ezikɛl, kaŋɛ kusɔ nɛ ma Enyɛnpetale Ebɔrɛ na bee malga ere. A daga fanɛ fo kaŋɛ amo awɔrso fanɛ Kachɛ lubi lubi bee ba!

³ Kachɛ na taga to, kachɛ nɛ Enyɛnpe Ebɔrɛ na beeŋ gberge fo kusoe na fo nna na, K la kemur nɛ etɔrɔ be kachɛ nna n sa efuliana na.

⁴ Kena beeŋ ku Ijipt be efuli so; Nɛ kagbenejija damta e tɔr Itiopia be basa so. Basa damta beeŋ wu ashi Ijipt to; Nɛ b suge efuli na so be asɔ kikɛ Nseŋ ka kumo kelambure n nase.

⁵ Benapo nɛ b ya haya ashi Itiopia nɛ Libiya nɛ Lidiya n Areebia nɛ Kub be efuliana so na nɛ ma basa gbagba to be basa damta beeŋ wu kena na to.”

⁶ Kede be kaman nɛ Enyɛnpe Ebɔrɛ na naŋ kaŋɛ le: “Bekama nɛ baa kɔ a sa Ijipt na beeŋ yili kade nɛ baa tre Migdɔl nɛ k wɔ kelargato be esoso na m ba choŋ kumo nɛ baa tre Aswan nɛ k wɔ kelargato be kaseto na n wu kena to nɛ benapo nɛ baa puchi so na kikɛ e mur. Ma Enyɛnpetale Ebɔrɛ na e kaŋɛ.

⁷ Ijipt be efuli na beeŋ ki kakpa fuloŋ nɛ ekama kini ashi durnya kikɛ to nɛ kumo be ndegboŋ a ki nde bureso a dese.

⁸ Ŋ kaŋ shin nɛ edɛ ji Ijipt be efuli nɛ kumo be basa nɛ baa kɔ a kuŋ kumo na nɛ baaŋ pin fanɛ ma e la Enyɛnpe Ebɔrɛ na.

⁹ Kachɛ nɛ Ijipt beeŋ mur na, meeŋ shuŋi mbɔ nɛ b ta nchu so be ekuloŋgboŋ m ba bɔ Itiopia be basa nɛ b maa fɛ shɛŋ be asheŋ na kubɔya a laŋɛ kemur nɛ k bee ba bumo alɛ gba so be kaplɛa so nɛ kufu e pɛ bumo. Loŋ be kachɛ na malɛ bee ba!”

¹⁰ Ade be kaman nɛ Enyɛnpetale Ebɔrɛ na naŋ kaŋɛ le: “Meeŋ bɔla Babilɔn be ewurgboŋ, Nebukadneeza so m mur Ijipt be efuli so be benapo damta kikɛ.

¹¹ Ewurgboŋ Nebukadneeza nɛ mbe benapo nɛ b maa wu kuwɔr beeŋ ba kɔ Ijipt be basa kena m mɔ basa m biti abar so kasawule na so be kaplɛkama.

¹² Kumo be kaman nɛ n shin nɛ lɔrgboŋ nɛ baa tre Nail na e wɔlto nseŋ naŋ shin nɛ basa lubi e ba ji Ijipt be efuli so eleŋ. Befɔ beeŋ ba jija kasawule na nɛ k maaŋ naa kɔ tɔnɔ. Ma Enyɛnpe Ebɔrɛ na e kaŋɛ.”

¹³ Ade be kaman nɛ Enyɛnpetale Ebɔrɛ na naŋ kaŋɛ le: “Meeŋ mur agbirana nɛ mpɔrduliana nɛ Ijiptebi bee shuŋ ashi kadegboŋ nɛ baa tre Mɛmfis na. Esa kikɛ maaŋ naa wɔtɔ nɛ e ji Ijipt be efuli so kuwura, nɛ kufu a pɛ basa kikɛ efuli na so.

¹⁴ Meeŋ shin nɛ Ijipt be efuli na be kelargato be kaseto na be kasawule e dese fuloŋ. Meeŋ nya edɛ n wɔtɔ kadegboŋ nɛ baa tre Zowan nɛ k wɔ kelargato be esoso na n chɔɔ kumo m mur. Ma alɛ beeŋ gberge basa nɛ b wɔ Ijipt be efuli so be kadegboŋ nɛ baa tre Tɛɛbis na kusoe.

¹⁵ Kumo be kaman nɛ n shin nɛ Ijipt be kade nɛ b pɔr egbal ŋ kuŋ kumo nɛ baa tre kumo Pɛlusium na to be basa e pin kananɛ ma agbo du. Ma alɛ beeŋ naŋ mur Tɛɛbis be benapo damta.

¹⁶ Meeŋ shin nɛ edɛ e ji Ijipt nɛ kagbenejija e tɔr basa nɛ b wɔ Pɛlusium na so. Egbal nɛ b pɔr ŋ kulti Tɛɛbis n wɔtɔ na beeŋ bure n tɔr nɛ nchu e ji kadegboŋ na; nɛ kufu a tɔr basa nɛ b wɔ Mɛmfis na so.

¹⁷ Mbrantiɛfɔlbi nɛ b wɔ ndegboŋ nɛ baa tre Hiliopolis nɛ Bubastis na kikɛ beeŋ wu kena to nɛ b pɛ basa nɛ b ka na ŋ ki anya.

¹⁸ Jemanɛ nɛ meeŋ jija Ijipt be eleŋ nɛ baa puchi so nseŋ shin nɛ k ba ekar na, tentembiri beeŋ tɔr kadegboŋ nɛ baa tre Taapanes na so. Kuwɔlpa beeŋ buu Ijipt be efuli na so nɛ b pɛ kumo be ndegboŋ to be basa ŋ ki anya.

¹⁹ Ŋ kaŋ gberge Ijiptebi le be kusoe ere n loge nɛ baaŋ pin fanɛ ma e la Enyɛnpe Ebɔrɛ na.”

Ijipt be ewura be eleŋ ka yɔɔ be asheŋ

²⁰ B ka pɛ ewura Jehowachin nɛ anyi be beko n yɔ kenyaya to ashi Babilɔn be efuli so na be kafɛ kudukakosopo na to be sososo be kufɔl na to be kachɛ shunusopo na nɛ Enyɛnpe Ebɔrɛ na kaŋɛ ma le:

²¹ “Dimɛdi pibi, m pɔɔ Ijipt be ewura so nna nɛ esa kikɛ maŋ tiŋ m ba chɛ mo to.

²² Amoso, kusɔ nɛ ma, Enyɛnpetale Ebɔrɛ na kaŋɛ nde e la fanɛ: Ijipt be ewura la n doŋ nna nɛ mee sha kemur mo kuraa, saŋɛ na so, e maaŋ naŋ nya eleŋ ŋ koso n wora shɛŋ.

²³ Kumo be kaman, meeŋ shin nɛ Ijiptebi na e pesaŋ to n yɔ durnya kikɛ to.

²⁴ Ade kikɛ be kaman, nɛ n wɔtɔ Babilɔn be ewura eleŋ to nseŋ ta tokobi m bɔɔ mo enɔ. Meeŋ shin nɛ Ijipt be ewura e kɔ n tɔr n wu mo doŋ be anishito.

²⁵ Kashenteŋto, meeŋ shin nɛ Ijipt be ewura, Fɛɛro, e ki esa pɔso nseŋ shin nɛ Babilɔn be ewura e nya eleŋ. Saŋɛ na so nɛ ŋ kaŋ ta ma tokobi m bɔɔ mo enɔ nɛ e ta kumo n shoŋi Ijipt, ekama beeŋ pin fanɛ ma e la Enyɛnpe Ebɔrɛ na.

²⁶ Meeŋ shin nɛ Ijiptebi na e pesaŋ to n yɔ durnya kikɛ to. Saŋɛ na so nɛ b pin fanɛ ma e la Enyɛnpe Ebɔrɛ na.”