Ezikɛl 29 - EBƆRƐ BE KAWƆL

Ijipt be kaplɛa so be kewuŋkaŋɛ be asheŋ

¹ B ka pɛ anyi be beko nɛ ewura Jehowachin n yɔ kenyaya to ashi Babilɔn be efuli so na be kafɛ kudusopo na to be kufɔl kudusopo na be kachɛ kudu anyɔsopo na nɛ Enyɛnpe Ebɔrɛ na kaŋɛ ma le.

² “Dimɛdi pibi, Ezikɛl, malga ŋ gbiti Ijipt be ewura, Fɛɛro, ŋ kaŋɛ mo kananɛ mo nɛ Ijipt be kasawule so be basa kikɛ beeŋ nya kasogberge be asheŋ.

³ Kaŋɛ Ijipt be ewura fanɛ Enyɛnpetale Ebɔrɛ na bee kaŋɛ fanɛ, fo ki n doŋ nna ŋkpal fo ka ta fo kumu fanɛ laŋchaŋ nɛ e kɔ eleŋ a wɔ lɔr to na so. Fo alɛ naŋ kaŋɛ fanɛ feeto lɔrgboŋ nɛ baa tre Nail na a ki feya.

⁴ Amoso meeŋ shin nɛ dariwa e kɔl fo ŋgbuŋ to nɛ ekɔrɔtɔ nɛ a wɔ lɔr na to e mata fo so nɛ ŋ gberge fo n lar Nail be lɔr na to.

⁵ Kumo be kaman nɛ n ta fo nɛ ekɔrɔtɔ nɛ a mata fo so na kikɛ n lɛ keshishɛrsawule so nɛ fo ya dese ndoŋ a maaŋ nya kepuli. Meeŋ shin nɛ mbuibi nɛ asɔbɔya e ji fo.

⁶ Saŋɛ na so nɛ Ijipt be efuli so be basa kikɛ e pin fanɛ ma e la Enyɛnpe Ebɔrɛ na.” Nɛ Enyɛnpe Ebɔrɛ na naŋ kaŋɛ le: “Israɛlebi na daŋ ta bumo be amu n to menyi Ijiptebi so nna fanɛ men chɛ bumo to, ama men daa du fanɛ kedibi wuso nɛ k maŋ kɔ eleŋ nna n sa bumo.

⁷ B ka yirgi menyi so nɛ men bu n da bumo be aba to m bɔl n shin nɛ bumo be ketetowibi shege ŋko ŋ kpekpel.

⁸ Amoso, ma Enyɛnpetale Ebɔrɛ na e naa kaŋɛ menyi naniere na fanɛ meeŋ shin nɛ benapo e ba kɔ menyi kena nseŋ mɔ menyi be basa nɛ asɔbɔya kikɛ.

⁹ Nɛ Ijipt be efuli na a ki kasawule jiga nɛ shɛŋ maŋ naa wɔ kumo so a dese. Ndoŋ nɛ menyeeŋ pin fanɛ ma e la Enyɛnpe Ebɔrɛ na. Ŋkpal fo ka kaŋɛ fanɛ feeto Nail be lɔr na a ki feya so,

¹⁰ fo nɛ Nail kikɛ ki n doŋ nna na. Amoso meeŋ shin nɛ Ijipt be efuli na a ki kasawule jiga nɛ shɛŋ maaŋ naa wɔ kumo so, yili kadegboŋ nɛ baa tre Migdɔl nɛ k wɔ kelargato be esoso na n ya fo kumo nɛ baa tre Aswan ashi kelargato be kaseto na, hale ŋ keta m ba choŋ menyi nɛ Kush be efuli so be egbaŋ to.

¹¹ Dimɛdi ŋko kusɔbɔya kikɛ maaŋ naŋ bɔla kasawule na so n choŋ kikɛ. Nfɛ adena nɛ shɛŋ maŋ naa wɔ kumo so.

¹² Meeŋ shin nɛ Ijipt e ki efuli nɛ shɛŋ shɛŋ maaŋ naa wɔ kumo so ashi durnya ere kikɛ to. Nfɛ adena nɛ Ijipt be efuli so be ndegboŋ dese alambure. A beeŋ dese n chɛr a chɔ nde nɛ a bure a dese kikɛ. Kumo be kaman nɛ n shin nɛ Ijiptebi na e pesaŋ to n yɔ efuli pɔtɛana so; ŋkpal manɛ so baaŋ shile n yɔ efuli kama so n ya kaa wɔ ndoŋ be basa to.”

¹³ Ade be kaman, nɛ Enyɛnpe Ebɔrɛ na naŋ kaŋɛ le: “Nfɛ adena be kaman, meeŋ naŋ shin nɛ Ijiptebi na e naŋ bɛta n shi efuliana nɛ m pesaŋ bumo to n yɔ na so m ba

¹⁴ chena Ijipt be kasawule so be kelargato be kaseto, nɛ k la bumo be echenakpa gbagba na. Ama bumo alɛ beeŋ baa la basa pɔso ndoŋ nna.

¹⁵ Kumo e la fanɛ baaŋ baa la basa nɛ b maaŋ naa kɔ eleŋ nseŋ naŋ tiŋ n ji efuliana ko so kuwura. Meeŋ shin nɛ b ki efuli jiga nɛ k maaŋ naŋ tiŋ n tintiŋ efuli ko nɛ efuli na e wora kumo be aparsheŋ.

¹⁶ Israɛl be basa malɛ maaŋ naŋ ta bumo be amu n to Ijiptebi so a fin kechɛto. Kusɔ nɛ k beeŋ tu Ijipt be basa na beeŋ shin nɛ Israɛlebi na e nyiŋi fanɛ kedaa maŋ daga fanɛ b ta bumo be amu n to Ijipt so nseŋ pin fanɛ ma e la Enyɛnpetale Ebɔrɛ na.”

Ewurgboŋ Nebukadneeza ka beeŋ pɔɔ Ijipt so be asheŋ

¹⁷ B ka pɛ ewura Jehowachin nɛ anyi be beko n yɔ Babilɔn be efuli so kenyaya to na be kafɛ adunyɔ nɛ ashunusopo na to be kufɔl sososo na be kachɛ sososo na nɛ Enyɛnpe Ebɔrɛ na naŋ kaŋɛ ma le:

¹⁸ “Dimɛdi pibi, Babilɔn be ewurgboŋ Nebukadneeza daŋ kre n ya kɔ Tayɛ be basa kena. Mo alɛ daŋ sulɔ mbe benapo esulɔ gbɛgbɛso nna hale nɛ bumo be amu kpra nɛ bumo be abatimu pɛge, ama ewura na nɛ mbe benapo kikɛ maŋ nya bumo be kegben be tɔnɔ ashi kena na to.

¹⁹ Amoso kusɔ nɛ ma Enyɛnpetale Ebɔrɛ na bee kaŋɛ nde e la fanɛ: Meeŋ ta Ijipt be kasawule n sa ewurgboŋ Nebukadneeza nɛ e kɔ n suge bumo be asɔ nseŋ sulɔ Ijipt be efuli so be mpetɛsɔ lela n yɔ nɛ a ki mbe benapo be kakɔka.

²⁰ Ŋkpal manɛ so, ewura na nɛ mbe benapo kikɛ daa shuŋ nna a sa ma, Enyɛnpetale Ebɔrɛ na.

²¹ Nɛ kumo be loŋ kaŋ wora, meeŋ shin nɛ Israɛl be basa e nya eleŋ, nɛ fo, Ezikɛl, e yili kakpa nɛ ekama beeŋ nu fo ebɔl nseŋ malga, saŋɛ na so baaŋ pin fanɛ ma e la Enyɛnpe Ebɔrɛ na.”