Ezikɛl 28 - EBƆRƐ BE KAWƆL

Tayɛ be ewura be kaplɛa so be kewuŋkaŋɛ be asheŋ

¹ Nɛ Enyɛnpe Ebɔrɛ na kaŋɛ ma le:

² Dimɛdi pibi, Ezikɛl, kaŋɛ Tayɛ be ewura kusɔ nɛ ma, Enyɛnpetale Ebɔrɛ na bee kaŋɛ mo. Kamoowu shin nɛ fee fɛ fanɛ fo la kegbir nna nsaa kaŋɛ fanɛ fo ka la kegbir so nɛ fo chena kuwurputi so nɛ eteku kulti fo n wɔtɔ. Feeŋ tiŋ n ta fo kumu fanɛ kegbir e la fo, ama dimɛdi e la fo, mannɛ kegbir.

³ Fo alɛ naa fɛ fanɛ fo nyi asheŋ nna a chɔ Danɛl nɛ Babilɔn be ewura daŋ ta n wɔtɔ ebuluŋ to na, ŋko ashiri kikɛ maŋ ŋana fo so.

⁴ Fo yɛ fo kanyiasheŋ nɛ kashennyi e shin nɛ fo dii kedama nseŋ nya shuwa nɛ gbiti m bɔlɔ ebu na.

⁵ Fo yɛ fo yawu be keji be kenyigboŋ na so nɛ fo ji yawu n nya tɔnɔ na. Fo kedama na shin nɛ kamoowu luri m bɔlɔ fo to nɛ fee puchi.

⁶ “To, naniere kusɔ nɛ ma, Enyɛnpetale Ebɔrɛ na bee kaŋɛ nde. Ŋkpal fo ka bee fɛ fanɛ fo nyi asheŋ fanɛ kegbir so,

⁷ meeŋ shin nɛ bedoŋ nɛ b maŋ kɔ kushuso e ba kɔ fo. Baaŋ mur asɔ lela nɛ fo bɔla kanyiasheŋ nɛ kashennyi so n nya na kikɛ kuraa.

⁸ Bumo alɛ beeŋ mɔ fo nseŋ ta fo n lɛ teku to nɛ k ki fo nchaŋ.

⁹ Jemanɛ nɛ baaŋ ba mɔ fo na, fo kraa beeŋ baa fɛ fanɛ kegbir e la fo a? Jemanɛ nɛ feeŋ yili fo bemɔpo be anishito na, dimɛdi e naaŋ baa la fo mannɛ kegbir.

¹⁰ Befɔ beeŋ mɔ fo, nɛ fo wu fanɛ bumo nɛ b maa shuŋ ma na. Ma, Enyɛnpetale Ebɔrɛ na e kaŋɛ na.”

Kananɛ Tayɛ be ewura loge to be asheŋ

¹¹ Kumo be kaman, nɛ Enyɛnpe Ebɔrɛ na naŋ kaŋɛ ma le:

¹² “Dimɛdi pibi, boŋ awɔba n sa Tayɛ be ewura, nseŋ kaŋɛ mo kusɔ nɛ ma, Enyɛnpetale Ebɔrɛ na bee kaŋɛ na fanɛ, jemanɛ ko fo kusɔ kama daa bɛ abar so dede nna nsaa la tɔɔnɛ. Fo alɛ daa nyi asheŋ ga nseŋ daa walɛ keyɛrbi nna.

¹³ K daa du fanɛ Ebɔrɛ be kudɔbi nɛ baa tre Iden na to nɛ fo daa wɔ. Yawu kpakpaso be asɔ lela nyɛkpɛso be yiri yiri fanɛ shuwa be abitasɔ nɛ fo daa ta a mɛa to. Kachɛ nɛ b kurge fo na nɛ b bela amo kikɛ ase n sa fo.

¹⁴ Ndoŋ nna nɛ n shin nɛ malaika bee kuŋ fo kowu jemanɛ nɛ fo daa na ajembu nyɛkpɛso to ashi ma kebee cheembi na so na.

¹⁵ Yili kachɛ nɛ b kurge fo kikɛ, fo kasheŋwora daa walɛ nna ga n ya fo saŋɛ nɛ fo fara a asheŋ lubi be kewora.

¹⁶ Fo daŋ pere kenishi nna n wɔtɔ yawu be keji to nɛ k shin nɛ fo luri keŋkenshi nɛ alubi be kebaawɔtɔ to. Amoso nɛ n tintiŋ fo nɛ fo lar ma kebee cheembi na so nɛ malaika nɛ e daa kuŋ fo na ju fo ashi ajembu nyɛkpɛso na so na.

¹⁷ Fo ka daa walɛ keyɛrbi so, fo daa wu fo kumu nna. Fo ketre ka dii so fo daa wora asheŋ nna fanɛ ewulpo. Amoso nɛ n lara fo n lɛ kasawule so nɛ bewura pɔtɛ e wu kusɔ nɛ n wora fo na nɛ k baa la kusoe kpele n sa bumo.

¹⁸ Fo alɛ daŋ wora alubi nna ga ashi fo yawu be keji to hale nɛ fo kabɔrɛshuŋakpa ki asheŋ lubi be mboŋ. Amoso nɛ n shin nɛ edɛ chɔɔ fo kadegboŋ na m mur na. Naniere nsunɔ nawule nɛ ekama bee wu kakpa nɛ fo kadegboŋ na daa wɔ na.

¹⁹ Fo ere choŋ nna na, nɛ kusɔ nɛ k wora fo ere shin nɛ kufugboŋ tɔr efuliana nɛ b nyi fo na so. Ŋkpal manɛ so, baa fɛ nna fanɛ kusɔ nɛ k nya fo na beeŋ tiŋ n nya bumo alɛ gba.”

Sidɔn be kaplɛa so be kewuŋkaŋɛ be asheŋ

²⁰ Kumo be kaman, nɛ Enyɛnpe Ebɔrɛ na naŋ kaŋɛ ma le:

²¹ “Dimɛdi pibi, kaŋɛ kadegboŋ nɛ baa tre Sidɔn na fanɛ k maŋ wora n nyalɛ.

²² Kaŋɛ basa nɛ b wɔ ndoŋ na fanɛ kusɔ nɛ ma, Enyɛnpetale Ebɔrɛ na kaŋɛ a laŋɛ bumo be kaplɛa so e la fanɛ, Sidɔn be basa, ŋ ki menyi doŋ nna na. Basa malɛ beeŋ maŋkura ma ŋkpal kusɔ nɛ meeŋ wora menyi so. Ŋ kaŋ gberge menyi kusoe ŋ ŋini ma kecheembiya na nɛ basa beeŋ pin fanɛ ma, e la Enyɛnpe Ebɔrɛ na.

²³ Meeŋ shin nɛ alɔ mɔso e ba menyi so nseŋ shin nɛ bedoŋ e ba kɔ menyi kaba kama so m mɔ menyi be basa. Ndoŋ nɛ menyeeŋ pin fanɛ ma e la Enyɛnpe Ebɔrɛ na.”

Israɛl ka beeŋ nya nɛfa be asheŋ

²⁴ Kumo be kaman, nɛ Enyɛnpe Ebɔrɛ na naŋ kaŋɛ le: “Efuliana nɛ a kulti Israɛl be basa n wɔtɔ a keni bumo jiga nsaa tege bumo na be kekama maaŋ naa la fanɛ ewi ŋko gɔŋnyaŋɛ a tɔrɔ Israɛl be basa. Ndoŋ nɛ baaŋ pin fanɛ ma, e la Enyɛnpetale Ebɔrɛ na.”

²⁵ Ade kikɛ be kaman nɛ Enyɛnpe Ebɔrɛ na naŋ kaŋɛ le: “Meeŋ bɛta Israɛl be basa na n shi efuliana nɛ n daŋ pesaŋ bumo to n yɔ na m ba nɛ efuliana na kikɛ e pin fanɛ n du cheembi nna. Israɛl be basa na beeŋ naŋ ba chena bumo gbagba be kasawule so, kumo nɛ n ta n sa ma kayɛrbi Jeekɔb dra dra na.

²⁶ Baaŋ chena ndoŋ kayurwushi so m pɔr nwu nseŋ naŋ nase ndibisɔrso be adɔ. Ma alɛ beeŋ gberge bumo be bechenashapoana nɛ b keni bumo jiga na kusoe nɛ Israɛl be basa na e nya bumo be amu a wɔtɔ. Ndoŋ nɛ baaŋ pin fanɛ ma e la Enyɛnpe bumo be Ebɔrɛ na.”