Ezikɛl 27 - EBƆRƐ BE KAWƆL

Keli be kashɛ a laŋɛ Tayɛ be kaplɛa so be asheŋ

¹ Nɛ Enyɛnpe Ebɔrɛ na kaŋɛ ma le:

² “Dimɛdi pibi, Ezikɛl, boŋ keeli be kashɛ ere a laŋɛ Tayɛ nɛ k la

³ kadegboŋ nɛ k chena m mata teku ase nsaa tu basa nɛ b chena teku ase nɛ mboŋ damta a ji yawu na be kaplɛa so. Kusɔ nɛ Enyɛnpetale Ebɔrɛ na bee kaŋɛ a laŋɛ Tayɛ be kaplɛa so e la fanɛ Tayɛ, fee puchi ŋkpal kananɛ fo walɛ kebita ga so nna.

⁴ Teku kulti fo echenakpa nna n wɔtɔ. B pɔr fo, fanɛ nchu so be kuloŋ lela nna;

⁵ Ndibi nɛ baa tre fir nɛ a shi kebee nɛ baa tre Hɛɛmɔn so na nɛ b ta n lɔŋɛ fo; Nseŋ ta ndibi nɛ baa tre sida nɛ a shi Lebanɔn be efuli so na n wora ndibi tenteŋ nɛ baa chɛ ewajɛ a kre amo nɛ a bee pɛ afu a keta kuloŋ a nite na n sa fo.

⁶ Kedibi gboŋgboŋi nɛ b ku ashi Bashan be efuli so n shɛl ebaŋɛ; Ndibi kpakpaso fanɛ chɛchɛdibi nɛ b ku ashi Saiprus be efuli so n wora fo kaseto Nseŋ baŋɛ ejebotenyi n fɛga n fɛga amo to nɛ a baa walɛ.

⁷ Wajɛchɛbi lela nɛ b lue nɛ k shi Ijipt be efuli so nɛ b ta n chɛ nɛ afu bee ber kumo a keta fo a nite. Esa wɔ kufɔ nseŋ wu kumo gba e beeŋ pin fanɛ k la feya nna. Kechɛbi gbɛgbɛso nɛ k walɛ ga nɛ b ta n chɛ m buu fo so a kuŋ epeŋi, Kechɛbi buru nɛ kepeper kunɔkunɔ nɛ k shi Saiprus be keplasawule so e la kumo.

⁸ Basa nɛ baa far fo na shi Sidɔn nɛ Aavad be ndegboŋ to nna. Fo basa nɛ b nyi nchu to e la bumo be benimu.

⁹ Basa nɛ b lɔŋɛ nchu so be ekuloŋgboŋ na la basa nɛ b koya kushuŋ na nɛnɛ nna nseŋ shi kadegboŋ nɛ baa tre Biblɔs na. Basa nɛ baa shuŋ nchu so kikɛ bee ba kaa tu fo ashi Tayɛ nna a ji yawu.

¹⁰ Pɛshiya nɛ Lidiya nɛ Libiya be efuliana so be benapo gba ti fo benapo so. Kakpa nɛ fo benapo daŋ chena na nɛ b daa ta bumo be abɛlso be asɔ kuŋamuso nɛ abɛlso be akpaŋwuro a shiga. Benapo na e daa kɔ a sa fo nɛ fo bɔla bumo so n nya ketre.

¹¹ Benapo nɛ b shi Aavad e daa kuŋ fo egbalana nɛ bumo nɛ b shi Gamad malɛ daa kuŋ fo ebu jeŋgreŋana na nsaa ta bumo be abɛlso be asɔ kuŋamuso a shiga egbalana so nɛ k shin nɛ fo nyalɛ kebita.

¹² Fo nɛ Speen be efuli so be basa daŋ ji yawu nna nɛ b ta gbiti nɛ abɛlso nɛ anyembi nɛ epal kikɛ ŋ ka fo asɔ damtaana be kukɔ.

¹³ Fo daŋ naŋ tu Griis nɛ Tubal nɛ Mɛshɛk be efuliana so ebi n ji yawu nɛ bumo alɛ ta anya nɛ danyaŋ be asɔ ko ŋ ka fo kukɔ.

¹⁴ Fo alɛ daŋ fa fo asɔ n sa Bɛf Togaama be efuli so ebi n sɔ egbaŋɛshuŋso nɛ egbaŋɛ nɛ baa ta a yɔ kena to nɛ ekurma.

¹⁵ Roodis be efuli so be basa gba daŋ tu fo n ji yawu nɛ basa nɛ b chena teku be ekarso be efuli damtaana ta ejebotenyi nɛ ndibi lembir lela ga n chɛr fo asɔ.

¹⁶ Siriya be basa daŋ tɔ fo asɔ faso damta nseŋ ta yawu kpakpaso be kejembu nɛ k la kefitiribumbuŋ nɛ baa tre ‘ɛmeraldi’ na nɛ ewajɛ peper kunɔkunɔ nɛ ewajɛ nɛ jɔɔ nɛ ewajɛchɛbi lela nɛ nchu to be kefalta jembu nɛ baa tre ‘koral’ na nɛ yawu kpakpaso be ajembu peper nɛ baa tre ‘rubi’ na ŋ ka amo be kukɔ.

¹⁷ Juda nɛ Israɛl be basa gba daŋ ta ayu nɛ mushoŋ nɛ ɔlif be ŋku nɛ eposɔ ŋ ka fo asɔ faso be kukɔ.

¹⁸ Damaskɔs be basa daŋ wu asɔ damta be yiri yiri nɛ fee fa na, nɛ b shi Hɛlbɔn m bar yabra belbelso nseŋ naŋ shi Zaha m bar mbolpɔ be afuibi m ba tɔ amo.

¹⁹ Nɛ Griik be basa nɛ b shi Uzal be efuli so na malɛ gba ta asɔ nɛ b ta abɛlso n wora nɛ eposɔ m ba tɔ fo asɔ faso.

²⁰ Dedan be basa gba daŋ ta ata nɛ baa ta a wora egaare na n tɔ fo asɔ.

²¹ Nɛ Areebia be efuli so be basa nɛ Kɛda be efuli so be bewura gba ta mbolpɔfɔlbi nɛ mbolpɔ nɛ mboe m ba tɔ fo asɔ faso.

²² Nɛ Shiba nɛ Raama be eyawujipo gba ta yawu kpakpaso be ajembu nɛ baa ta a wora abitasɔ nɛ shuwa nɛ asɔ dufɛso lela ga m ba tu fo n ji yawu.

²³ Ndegboŋ fanɛ Haran nɛ Kanne nɛ Iden nɛ Asshɔ nɛ Chilmad nɛ Shiba be efuli so be eyawujipo kikɛ daŋ ba tu fo n ji yawu.

²⁴ Yawu kpakpaso be ewajɛ nɛ ewajɛ peper kunɔkunɔ nɛ ewajɛ nɛ b ta jese lela ŋ jɔɔ amo be ekarso nɛ achɛbi nɛ b nyɔɔ amo kenyɔɔ be yiri yiri nɛ ejese nɛ a kɔ eleŋ nɛ b daa bar m ba ka fa fo kebɛ to.

²⁵ Nchu so be ekuloŋgboŋ gboŋi e daa sulɔ fo asɔ faso a bɛ abar so a yɔ mboŋ nɛ b daa sha a ka yɔ. Fo daa du fanɛ nchu so be ekuloŋ nɛ k deŋ teku so, nɛ asɔ gbɛgbɛso bɔlɔ kumo to nna.

²⁶ Jemanɛ nɛ fo befarpo far fo n lar teku so na, nɛ afugboŋ shi epeŋilarkpa m ba mur fo.

²⁷ Ndoŋ nna nɛ fo asɔ faso lela na kikɛ, nɛ basa nɛ baa shuŋ ekuloŋ na to na, ekapɛnta nɛ eyawujipoana na kikɛ, nɛ benapo nɛ b wɔ ekuloŋ na to na kikɛ nyam mur teku na so. Jemanɛ nɛ fo nchu so be ekuloŋ na mur na;

²⁸ nɛ basa nɛ baa ji nchu na boŋ to nɛ basa nɛ b wɔ kedeŋi so nu kumo.

²⁹ Naniere bekama beeŋ shile ŋ ka ekuloŋ nawule, Nɛ efarpo kama e dii kedeŋi so.

³⁰ Bumo kikɛ beeŋ shu kagbenejijaso ŋkpal fo so, Baaŋ wora eshishɛr n wurge bumo be amu so nseŋ dese nsunɔ to a melti.

³¹ Bumo alɛ beeŋ she bumo be amu ŋkpal fo so, nseŋ buu kagbenejijaso be asɔbuuso a ŋini bumo be kagbenejija. Baaŋ ta kagbenejija damta n shu ga ŋkpal fo so

³² Baaŋ boŋ awɔba n shu ŋ kaŋɛ le: ‘Wanɛ nɛ anyeeŋ ta ŋ keshɛr Tayɛ so, Tayɛ nɛ e dese teku to shruum le ere?

³³ Jemanɛ kama nɛ fo yɛr fo asɔ faso efuli pɔtɛ so, Efuli kama so ebi bee nya bumo be kepar nna. Bewura bɔla fo asɔ lela so N dii kedama.

³⁴ Ama naniere fo e mur a dese teku to na; Fo ji nchu n ya dese nchugboŋ be kechimbi to. Fo asɔ faso nɛ bekama nɛ baa shuŋ a sa fo na kikɛ; e tu fo n ji nchu teku to n chul na.’

³⁵ Kusɔ nɛ k wora fo na be asheŋ mɔ ekama nɛ e chena teku ase na kɔnɔ. Hale kufu pɛ bumo be bewura gba nɛ baa chicha

³⁶ Durnya to be eyawujipo maŋ tiŋ nɛ b yirda kusɔ nɛ k wora fo ere. Fo luwu na bee keta kufu gboŋgboŋi nna, ŋkpal manɛ so, fo baŋ choŋ nna na nɛ esa maaŋ naŋ wu fo kikɛ.”