Ezikɛl 26 - EBƆRƐ BE KAWƆL

Tayɛ be kaplɛa so be kewuŋkaŋɛ be asheŋ

¹ B ka pɛ ewura Jehowachin nɛ anyi be galeŋga kenya n yɔ Babilɔn be efuli so na be kafɛ kudukakosopo na to be kufɔl na be kachɛ juŋkparso na nɛ Enyɛnpe Ebɔrɛ na kaŋɛ ma le:

² “Dimɛdi pibi, Ezikɛl, kadegboŋ nɛ baa tre Tayɛ na be basa daŋ ji eyur nna nseŋ boŋ kashɛ ere ŋkpal Jerusalɛm ka daŋ kɔ n tɔr so: ‘Jerusalɛm bure n tɔr! Nɛ kumo be yawu be keji be eleŋ loge! Amoso k maaŋ naa kɔ anyi kukɔrkɔ ŋkpal yawu be keji so!’

³ Kusɔ nɛ ma, Enyɛnpetale Ebɔrɛ na bee kaŋɛ e la fanɛ menyi Tayɛ be basa ki n doŋana nna na, nɛ meeŋ shin nɛ efuli damtaana e kre kena m ba kɔ menyi fanɛ kananɛ teku so bee ku atili a ba kaa gbuŋ teku be kɔnɔ na.

⁴ Baaŋ bure egbalana nɛ men pɔr ŋ kulti menyi be kadegboŋ na nɛ menyi be ebu jeŋgreŋana nɛ menyee yili so a wu kufɔ na. Kumo be kaman nɛ ŋ gbare kumo be shishɛr na n lɛ nseŋ ka kefalta fuloŋ n nase.

⁵ Ekɔrɔtɔ pɛpo beeŋ ta ndoŋ a fata bumo be ashewu ashi teku ase. Ma, Enyɛnpetale Ebɔrɛ na e nase kɔnɔ na fanɛ efuliana na beeŋ ba kɔ n suge Tayɛ be basa be asɔ,

⁶ nseŋ mɔ basa kama nɛ chena nde nɛ a wɔ teku ase na kikɛ. Ndoŋ nɛ Tayɛ be basa beeŋ pin fanɛ ma, e la Enyɛnpe Ebɔrɛ na.”

⁷ Kumo be kaman, nɛ Enyɛnpetale Ebɔrɛ na naŋ kaŋɛ: “Meeŋ shin nɛ Babilɔn be ewura Nebukadneeza, nɛ e la bewura to be ewura na, e shi kelargato be esoso be kaba so m ba kɔ Tayɛ be basa. E beeŋ keta benapo damta nɛ b kɔ egbaŋɛ nɛ egbaŋɛturko nɛ egbaŋɛ diipoana nna m ba.

⁸ E beeŋ juŋkpar ŋ kɔ basa nɛ b chena teku ase na m mɔ bumo. Kumo be kaman nɛ e gbare eshishɛr n deŋi abar so nɛ a fo menyi be ndeana na be egbalana be esoso nɛ mbe benapo e keta bumo be abɛlso be asɔ kuŋamuso m bɛ abar so ŋ kulti menyi n wɔtɔ fanɛ egbal lempo na.

⁹ Ade be kaman nɛ mbe benapo na e ta ndibi gbɛgbɛso n da egbalana na n lɛ nseŋ ta akɔsɔ m bure m bure menyi be ebu jeŋgreŋana nɛ menyee yili so a keni a wu kufɔ na.

¹⁰ Mbe egbaŋɛ be keshi ga so amo be kalabɛr beeŋ buu menyi so fanɛ kunyɔlɔ na. Benapo na kaa luri menyi be ndeana to, bumo be egbaŋɛ nɛ egbaŋɛturko wurbi nɛ agboŋi kikɛ be egbri beeŋ shin nɛ menyi be ebuana be egbalana a gbuŋgbuŋ fɔŋfɔŋ saŋɛ nɛ b wɔ men be nde nɛ b bure na to na.

¹¹ Mbe benapo beeŋ dii bumo be egbaŋɛ n sɔ menyi be agbembi kikɛ so n ta etokobi a mɔ menyi be basa bena nɛ jiso, nɛ menyi be eshabɔrɛ lempo kikɛ a bure n tɔr kasawule.

¹² Ade kikɛ be kaman, baaŋ suge menyi be kedama nɛ menyi be asɔ faso. Bumo alɛ beeŋ bure menyi be egbalana nɛ menyi be nwu lela kikɛ nseŋ gbare ajembu na nɛ ndibi na nɛ eshishɛr na n ya lɛ teku to.

¹³ Nɛ n shin nɛ nshɛ nɛ menyee boŋ a cha awɔr na e ku nɛ esa maaŋ naŋ nu menyi be ejaŋjilaŋ be kushu kikɛ.

¹⁴ Ma alɛ beeŋ shin nɛ menyi be kasawule na a dese fanɛ kefalta fuloŋ nɛ ekɔrɔtɔ pɛpo e baa fata bumo be ashewu kumo so. Menyi maaŋ naŋ tiŋ n lɔŋɛ m pɔr menyi be kadegboŋ na kikɛ. Ma, Enyɛnpetale Ebɔrɛ na e kaŋɛ na.”

¹⁵ Kusɔ nɛ Enyɛnpetale Ebɔrɛ na naŋ kaŋɛ Tayɛ be basa e la fanɛ basa nɛ b chena teku ase na kaŋ nu menyi be basa nɛ baa mɔ na be kushu kufu beeŋ pɛ bumo nɛ b baa chicha.

¹⁶ Saŋɛ na so nɛ bekama nɛ baa ji kuwura efuliana nɛ a chena m mata teku ase na e gbelge bumo be nwurputi so. Kumo be kaman nɛ b gbaŋ bumo be bewura be epiŋiana nɛ bumo be asɔbuuso nɛ b jɔɔ amo na kikɛ nseŋ chena kasawule a chicha. Ŋkpal kusɔ nɛ k beeŋ tu menyi na so, kufu beeŋ pɛ bumo ga hale nɛ b maŋ tiŋ n yige kebaachicha.

¹⁷ Saŋɛ na so nɛ b boŋ keeli be kashɛ ere n laŋɛ menyi kaplɛa so. Kadegboŋ nɛ k nya ketre ga na mur! Kumo be nchu so be ekuloŋgboŋ kikɛ mur teku so. Kumo to be basa e daa ji eteku so kuwura nseŋ daa ta kufu a wɔtɔ basa nɛ b chena teku ase na.

¹⁸ Kachɛ nɛ k tɔr na ka fo, basa nɛ b chena teku ase na bee chicha nna. Nɛ kumo be kemur na chinchiŋ bumo ga.

¹⁹ Ndoŋ nna nɛ Enyɛnpetale Ebɔrɛ na naŋ kaŋɛ le: “Meeŋ shin nɛ menyi be ndegboŋ e bure a dese nɛ esa kikɛ maŋ naa wɔ amo to. Meeŋ shin nɛ teku be nchugboŋ e buu menyi so.

²⁰ Ade kikɛ be kaman, nɛ n shin nɛ men wu n yɔ bubuni to n ya tu bumo nɛ b juŋkpar n yɔ ndoŋ na nɛ nde nɛ a daŋ mur dra dra na kikɛ na. Menyeeŋ ya kaa wɔ bubuni to nɛ esa maaŋ naŋ sɔ menyi so n chena menyi be ndegboŋana to.

²¹ Meeŋ shin nɛ men be kebaa maaŋ naa wɔtɔ na e baa la tɔɔnɛ nɛ k bee ta kufu a pɛ basa. Basa beeŋ fin menyi, ama b maŋ naŋ wu menyi.” Ma, Enyɛnpetale Ebɔrɛ na e kaŋɛ na.