Ezikɛl 25 - EBƆRƐ BE KAWƆL

Kewuŋkaŋɛ a laŋɛ Ammɔn be kaplɛa so be asheŋ

¹ Ndoŋ nna nɛ Enyɛnpe Ebɔrɛ naŋ kaŋɛ ma le:

² “Dimɛdi pibi, Ezikɛl, kilgi a keni Ammɔn be efuli so be basa ŋ kaŋɛ bumo fanɛ b maŋ wora n nyalɛ.

³ Kaŋɛ bumo fanɛ b kaŋ asoe n nu kusɔ nɛ ma, Enyɛnpetale Ebɔrɛ na bee kaŋɛ: E yɛ menyi be ŋgbene daŋ fuli menyi nna jemanɛ nɛ men daŋ wu ma bɔrɛlambu ka jija kuraa nɛ Israɛl be efuli mur nɛ b pɛ Juda be basa n yɔ efuli wɔfɔ so na nna.

⁴ Meeŋ shin nɛ eyiriana nɛ b wɔ keshishɛrsawule nɛ k wɔ epeŋilarkpa be kaba so na e ba kɔ m pɔɔ menyi so. Baaŋ ba yuu bumo be ewajɛbu n chena menyi be efuli so n ji kumo be asɔrso nseŋ nuu kumo be kenyipo nɛ a daga menyi na.

⁵ Ade be kaman, meeŋ naŋ shin nɛ menyi be kadegboŋ nɛ baa tre Rabba na a ki enyɔma be ejikpa nɛ Ammɔn be efuli so kikɛ malɛ a ki kakpa nɛ baŋ baa bela mbolpɔ. Loŋ nɛ menyeeŋ pin fanɛ ma e la Enyɛnpe Ebɔrɛ na.

⁶ Kusɔ nɛ ma, Enyɛnpetale Ebɔrɛ na bee kaŋɛ e la fanɛ men daŋ kpla enɔ nseŋ daŋ tɛto kagbenefuliso a ŋini kekishi nɛ men kɔ n sa Israɛl be basa nna.

⁷ Amoso meeŋ ta menyi m bɔɔ efuli pɔtɛana be basa enɔ nɛ b suge menyi be asɔ nseŋ sesaŋ menyi to. Ma alɛ beeŋ mur menyi kuraa nɛ men maaŋ naa la efuli a kɔ menyi gbagba be kasawule a wɔtɔ. Ndoŋ nɛ menyeeŋ pin fanɛ ma, e la Enyɛnpe Ebɔrɛ na.”

Mowab be kaplɛa so be kewuŋkaŋɛ be asheŋ

⁸ Kesheŋ ere be kaman nɛ Enyɛnpetale Ebɔrɛ na naŋ kaŋɛ le: “Mowab be efuli so be basa nɛ Edɔm be efuli so be basa daŋ kaŋɛ fanɛ Juda be efuli so gba baa du fanɛ efuli kama nna.

⁹ Amoso meeŋ shin nɛ kena e ba ndegboŋ nɛ a bee kuŋ Mowab be efuli be egbaŋ na nɛ ndegboŋ lela fanɛ Bɛf Jeshimɔf nɛ Baal Mɛɔn nɛ Kiriyateem gba na so.

¹⁰ Kumo be kaman nɛ n shin nɛ eyiriana nɛ b shi epeŋilarkpa be kaba so be keshishɛrsawule so na e ba kɔ m pɔɔ Mowab be efuli so be basa nɛ Ammɔn be efuli so be basa kikɛ so. Kananɛ ŋ gberge Ammɔn be basa kusoe ashi efuliana na so nɛ esa maaŋ naŋ nyiŋi bumo be asheŋ na

¹¹ aloŋ nɛ meeŋ gberge Mowab be basa gba kusoe, nɛ b pin fanɛ ma, e la Enyɛnpe Ebɔrɛ na.”

Edɔm be Kaplɛa so be kewuŋkaŋɛ be asheŋ

¹² Ade be kaman, nɛ Enyɛnpetale Ebɔrɛ na naŋ kaŋɛ le: “Edɔm be efuli so be basa wora n jija ŋkpal b ka daŋ wora n tal Juda be basa to so.

¹³ Amoso meeŋ gberge Edɔm be basa kusoe nseŋ mɔ bumo be basa nɛ asɔbɔya kikɛ kena to nɛ kasawule nɛ k yili kadegboŋ nɛ baa tre Tɛman n dese n ya fo kumo nɛ baa tre Dedan na e dese jiga.

¹⁴ Kumo be kaman nɛ n shin nɛ ma basa Israɛlebi na e wora n tal Edɔm be basa to, nɛ b pin kananɛ kanya agbo gboŋ du. Ŋ kaŋ gberge Edɔm be basa kusoe na, nɛ baaŋ pin fanɛ ma, e la Enyɛnpe Ebɔrɛ na.”

Filistiebi be Kaplɛa so be kewuŋkaŋɛ be asheŋ

¹⁵ Ade kikɛ be kaman, nɛ Enyɛnpetale Ebɔrɛ na kaŋɛ le: “Filisti be efuli so be basa nyaŋnyaŋso na daŋ wora n tal bumo be dra dra be bedoŋana to nna a fin kemur bumo yurkishi so.

¹⁶ Amoso meeŋ gberge Filisti be basa na kusoe m mɔ bumo. Ma alɛ beeŋ mur bumo be bekama nɛ b ka a wɔ teku ase be nde to na.

¹⁷ Meeŋ gberge bumo kusoe kenishipereso nseŋ wora n tal bumo to nɛ b pin kananɛ ma agbo gboŋ du nɛ b pin fanɛ ma, e la Enyɛnpe Ebɔrɛ na.”