Ezikɛl 24 - EBƆRƐ BE KAWƆL

Kapuliya daŋɛso na be asheŋ

¹ B ka daŋ pɛ anyi be galeŋga nɛ ewura Jehowachin kenya n yɔ Babilɔn be efuli so na be kafɛ kpanusopo na to be kufɔl kudusopo na be kachɛ kudusopo na, nɛ Enyɛnpe Ebɔrɛ na kaŋɛ ma le:

² “Dimɛdi pibi, Ezikɛl, sibɛ kabre be kachɛ ere n nase, ŋkpal manɛ so, k la kachɛ nɛ Babilɔn be ewura kre kena m ba kulti Jerusalɛm n wɔtɔ a kɔ nna.

³ Amoso bɔ keŋasa ere ŋ kaŋɛ ma basa nɛ b pal kaman n sa ma na. Kaŋɛ bumo fanɛ kusɔ nɛ Enyɛnpetale Ebɔrɛ na bee kaŋɛ e la fanɛ Wɔtɔ nchu kadaŋɛ na to, n ta kumo m bɛ edɛ so.

⁴ Nseŋ ta eblaŋ na be alela fanɛ ebɛaŋ nɛ aba n wɔtɔ to. Bela awibi lela na gba n wɔtɔ nɛ k bɔlɔ.

⁵ Kubɔlpo lela ga be eblaŋ nɛ awibi e daga fanɛ fo ta n wɔtɔ kadaŋɛ na to. Nseŋ gbar ndibi n wɔtɔ edɛ na to, saŋɛ na so a beeŋ falte nɛ eblaŋ na nɛ awibi na e bel.

⁶ Kusɔ nɛ Enyɛnpetale Ebɔrɛ na bee kaŋɛ e la fanɛ asheŋ maaŋ nyalɛ n sa Jerusalɛm be kadegboŋ nɛ kumo to be basa bee mɔ basa ere! K du fanɛ kadaŋɛ kreŋ so nɛ b maŋ naŋ fɔr kumo na nna. Baa lara eblaŋ na kukoko to nna nɛ esa kikɛ be shɛŋ maŋ wɔ kusɔ nɛ k bee wora na to.

⁷ Jerusalɛm to be basa mɔ basa nɛ b maŋ wora shɛŋ ashi kadegboŋ na to, ama b maŋ wora ania nɛ b wora eshishɛr m buu bumo be ŋklaŋ nɛ a wurge kefalta so gba.

⁸ Ndoŋ nna nɛ ma alɛ gba yige ŋklaŋ na kefalta na so, kakpa nɛ a maaŋ tiŋ ŋ ŋana. Nɛ amo alɛ bee fin fanɛ ŋ kɔ n sa amo.”

⁹ Ade be kaman kusɔ nɛ Enyɛnpetale Ebɔrɛ na bee kaŋɛ e la fanɛ; “Asheŋ maaŋ nyalɛ n sa kadegboŋ nɛ baa mɔ basa kumo to na. Ŋ gbagba e naŋ ber ndibi damta n wɔtɔ edɛ na to.

¹⁰ Amoso kil ndibi damta m ba nseŋ foŋ edɛ na to n wɔtɔ! Daŋɛ eblaŋ na nɛnɛ nseŋ shin nɛ amo be epochu na a feeto nɛ awibi na a chɔɔ!

¹¹ Kumo be kaman nɛ fo ta danyaŋ be kadaŋɛ fuloŋ na m bɛ ajanwulɛ so hale nɛ k ya bel m pere, saŋɛ na so kumo be kananɛ k kreŋ so na beeŋ chɔɔ m mur nɛ k naŋ nyalɛ so.

¹² Ama edɛ wuloŋ wuloŋ na gba kra maaŋ tiŋ n shin nɛ kumo be kekreŋso na kikɛ e lar kumo so.

¹³ Naniere fo, Jerusalɛm, be kusɔ jigaya be kebaawɔtɔ e shin nɛ fo wora eyurpi. Ŋkpal ŋ ka wora ania nɛ n fɔr fo so nɛ fo nyalɛ so nɛ fo kraa kini nsaa wɔ fo eyurpi to so, fo maaŋ naŋ nyalɛ so kikɛ n ya fo fanɛ ma agbo gboŋ ka beeŋ ba fo so.

¹⁴ Ma, Enyɛnpetale Ebɔrɛ na e kaŋɛ na fanɛ saŋɛ fo nɛ n wora kusɔ nɛ ŋ kaŋɛ fanɛ meeŋ wora na. M maaŋ kplaŋ fo lubi so ŋko n wu fo kuwɔr ŋko n chɛrga ma nfɛra. Meeŋ gberge fo kusoe ŋkpal kusɔ nɛ fo wora so.”

Ezikɛl be eche be luwu be asheŋ

¹⁵ Ade kikɛ be kaman, nɛ Enyɛnpe Ebɔrɛ na kaŋɛ ma le:

¹⁶ “Dimɛdi pibi, Ezikɛl, kachɛ koŋwule meeŋ sɔ esa nɛ fee sha ga na be ŋkpa. Ama fo alɛ e sa maŋ kaŋ fubel m bile asheŋ ŋko n shu ŋko n shin nɛ anishichubi a lar fo anishito gba kuraa.

¹⁷ Fo alɛ e sa maŋ shin nɛ esa e nu fo ka bee shuto gba. Sa maŋ kaŋ shɛŋi fo neemu fo kumu so ŋko n lara fo asɛbta nsaa na aya fuloŋ a ŋini fanɛ fee shu keeli nna. Fo alɛ e sa maŋ buu fo anishiakpa so ŋko n ji daŋkare be ajibi nɛ basa nɛ baa shu nli bee ji na.”

¹⁸ Kachipurso be jemanɛ nɛ n yaŋ ya ka malga basa na kutɔ fanɛ kananɛ n chɛr a wora na. Kumo be kaaseso nɛ ma eche wu. Kumo be ŋklade nɛ n wora kananɛ Enyɛnpe Ebɔrɛ kaŋɛ ma na.

¹⁹ Basa na ka wu ma nɛ b bishi ma le: “Manɛ nna nɛ fo maa shu fo eche be keeli?”

²⁰ Ndoŋ nna nɛ ŋ kaŋɛ bumo le: “Enyɛnpe Ebɔrɛ na e kaŋɛ ma fanɛ

²¹ ŋ kaŋɛ menyi, Israɛl be basa kubɔya ere fanɛ menyee puchi bɔrɛlambu na be eleŋ so na nna. Menyi alɛ nseŋ naa sha kebaa wu kumo nsaa yɔ kumo to, ama Enyɛnpe Ebɔrɛ na bee shin nɛ e jija kumo nna nɛ k maaŋ naaŋ daga keshuŋ Ebɔrɛ kumo to. Menyi be mbia nɛ b wɔ Jerusalɛm to naniere na malɛ beeŋ wu kena to.

²² Saŋɛ na so nɛ menyi alɛ gba e wora kananɛ n wora ere. Menyi maaŋ ta asɔ m buu menyi be anishiakpaana so ŋko n ji daŋkare jibi nɛ basa nɛ baa shu nli bee ji na.

²³ Menyi alɛ maaŋ shɛŋi menyi be eneemu ashi menyi be amu so ŋko n lara asɛbta menyi be aya to nsaa nite aya fuloŋ. Ade kikɛ be kaman, menyi maaŋ wora kuwɔrsheŋ ŋko n shu nɛ anishichubi e lar, ama menyi be asheŋ lubi so menyeeŋ foe eyur to nsaa nite a kulti a shu epun to.

²⁴ Saŋɛ na so nɛ ma, Ezikɛl e baa la tɔɔnɛ n sa menyi. Nɛ menyi alɛ gba e wora asheŋ nɛ n wora na kikɛ. Ndoŋ nɛ menyeeŋ pin fanɛ Enyɛnpe Ebɔrɛ na e shin nɛ asheŋ ere kikɛ wora.”

²⁵ Ade kikɛ be kaman, nɛ Enyɛnpe Ebɔrɛ na naŋ kaŋɛ le: “Dimɛdi pibi, Ezikɛl, meeŋ mur bɔrɛlambu nɛ basa na be ŋgbene bee fuli so nɛ baa puchi kumo so nsaa sha kumo to be kebaayɔ ga na. Ma alɛ beeŋ lara bumo be mbia ashi bumo to.

²⁶ Kachɛ nɛ loŋ beeŋ wora na kaŋ fo, esa nɛ e beeŋ nya n shile kadegboŋ na to e naŋ ba kaŋɛ fo kusɔ nɛ k wora.

²⁷ Loŋ be kachɛ na gbagba nɛ fo kɔnɔ beeŋ bugi nɛ fo nɛ esa nɛ e bar kubɔya na e malga abar kutɔ. Amoso feeŋ baa la tɔɔnɛ n sa basa na, nɛ b pin fanɛ ma e la Enyɛnpe Ebɔrɛ na.”