Ezikɛl 23 - EBƆRƐ BE KAWƆL

Ebojuache anyɔ be asheŋ

¹ Nɛ Enyɛnpe Ebɔrɛ naŋ kaŋɛ ma le:

² “Dimɛdi pibi, Ezikɛl, beche anyɔ ko nɛ b daa la eche koŋwule be mbia e daa wɔtɔ.

³ Bumo be kebia to kikɛ nɛ b ki esakaleche ashi Ijipt be efuli so. Ndoŋ nɛ benyɛn daŋ ta bumo ŋ ki beche.

⁴ Enimu so na e daa la Ohola nɛ e yili n sa kadegboŋ nɛ baa tre Samɛria na nɛ ekekarso na malɛ daa la Oholiba, nɛ mo alɛ yili n sa Jerusalɛm. B daa la ma beche nna nseŋ daŋ kurge mbia n sa ma.

⁵ Ohola daŋ kra la ma eche nna nsaa ji kesakalea nsaa kɔ kayɛlga lubi n sa mo jipoana nɛ b shi Asiriya be efuli so na.

⁶ Mo jipoana na daa la benapo nɛ baa buu epiŋi nɛ a nyɔ buru nɛ gomena be benimuana nɛ benapo nimuso nɛ benapo nɛ baa dii egbaŋɛ nɛ bumo kikɛ daa la mbrantiɛ nɛ b walɛ ayɛrbi nna.

⁷ Asiriya be efuli so be benimu nɛ e daa tu a ji kesakalea nɛ mbe kayɛlga lubi na shin nɛ e tu bumo a shuŋ bumo be agbirana nseŋ jija mbe kumu.

⁸ Jemanɛ nɛ benyɛn jija mo nseŋ ta mo ŋ ki eche ashi Ijipt be efuli so mbe kebia to kikɛ hale nɛ mbre e maŋ naŋ yige mbe kesakalea na.

⁹ Amoso nɛ n kini mo n sa mo jipoana nɛ e daa sha ga ashi Asiriya be efuli so na.

¹⁰ Ndoŋ nna nɛ bumo alɛ delge mo so kesaria nseŋ pɛ mbe mbia n yɔ. Kumo be kaman nɛ b mɔ mo gbagba nɛ kaplɛkama be beche bee kuli Ohola ŋkpal kusɔ nɛ k nya mo so.

¹¹ Mo sipo Oholiba gba daŋ wu kusɔ nɛ k wora, ama mbe kesakalea daa chɔɔ mo da, Ohola peya.

¹² Mo alɛ gba daa kɔ kayɛlga lubi nna n sa Asiriya be efuli so be benimuana nɛ b walɛ ayɛrbi nɛ benapo nɛ baa kre to nɛnɛ nɛ benapo nɛ baa dii egbaŋɛ nsaa la mbrantiɛ nɛ b walɛ ayɛrbi na.

¹³ Ndoŋ nna nɛ n wu fanɛ kusɔ jigaya be kebaawɔtɔ nɛ mo da daa kɔ na nɛ mo alɛ gba kɔ.

¹⁴ Ama Oholiba bre be kebaawɔtɔ daŋ naŋ lubi a chɔ mo da Ohola peya. E daŋ wu b ka wora Babilɔn be efuli so be benyɛn be efoto n deŋi egbal so nseŋ nyɔɔ amo apeper.

¹⁵ Benyɛn nɛ b daŋ wora n deŋi egbalana na so na daŋ mɛa to nna ŋ kre ekreso kashɛr to nseŋ mɛa eneemugboŋ malɛ bumo be amu so, nɛ kumo be loŋ shin nɛ mbe nfɛra laŋɛ Babilɔn be efuli so be benapo nimuso nɛ baa dii egbaŋɛturko na so.

¹⁶ E ka baŋ wu efoto na nɛ kayɛlga lubi luri mo to nɛ e shuŋi mbɔ Babilɔn be efuli so be benapo be benimuana na kutɔ.

¹⁷ Ndoŋ nna nɛ b ba tu mo n di n jija mo. B daŋ di mo hale nɛ bumo be asheŋ ya kilgi a nu mo agbo.

¹⁸ Oholiba shin nɛ ekama wu mbe kesaria nseŋ pin fanɛ sakaleche e daa la mo. Mbe asheŋ daŋ ba kaa nu ma agbo nna ga nɛ m pal kaman n sa mo fanɛ kananɛ n daŋ wora mo da, Ohola na.

¹⁹ Ama amo nɛ amo kikɛ, e kraa ji kesakalea na nna a ti so, nseŋ daa wora asheŋ fanɛ kananɛ e daa wora amo jemanɛ nɛ e daa la kasuŋgurbia ashi Ijipt be efuli so na gbagba.

²⁰ E daa kɔ kayɛlga lubi be kasha nna n sa Ijipt be efuli so be benyɛn nɛ b daa di beche fanɛ ekurma nɛ egbaŋɛ na nna.”

²¹ Amoso e kraa yɛlga mbe kebia to be kusɔ jigaya be kebaawɔtɔ nɛ e daa kɔ ashi Ijipt be efuli so na nna. Ndoŋ nɛ benyɛn daŋ fɔnɔ mbe anyipo nseŋ jija mbe tumba na.

²² Amoso kusɔ nɛ ma, Enyɛnpetale Ebɔrɛ na bee kaŋɛ Oholiba nɛ fo yili n sa Jerusalɛm na e la fanɛ meeŋ shin nɛ fo jipoana nɛ bumo be asheŋ fi fo ere e nya agbo n wɔtɔ fo nseŋ ba kulti fo n wɔtɔ fanɛ bedoŋ na.

²³ Meeŋ gama benapo nimuso nɛ benapo nɛ baa far egbaŋɛturko be benimuana nɛ basa gboŋ nɛ baa dii egbaŋɛ na kikɛ nɛ b shi Babilɔn be efuli so nɛ Asiriya be efuli so nɛ Chaldian be yiri to be basa nɛ b shi nde nɛ baa tre Pɛkɔd nɛ Showa nɛ Kowa na m ba abar so.

²⁴ Kumo be kaman nɛ b ta egbaŋɛturko wurbi nɛ agboŋi kikɛ n sulɔ akɔsɔ nɛ benapo damta n shi kelargato be esoso m ba kulti fo n wɔtɔ ŋ kɔ fo kena. Baaŋ keta abɛlso be asɔ kuŋamuso wurbi nɛ agboŋi kikɛ nseŋ buu abɛlso be akpaŋwuro bumo be amu so nna m ba. Ma alɛ beeŋ ta fo m bɔɔ bumo enɔ nɛ b gberge fo kusoe kananɛ bumo be mbraana bee ŋini.

²⁵ Ŋkpal ŋ ka nya agbo n wɔtɔ fo so, meeŋ shin nɛ benapo na e kaa kagbene n tɔrɔ fo ga. Benapo na beeŋ ku fo kamuna nɛ asoe nseŋ mɔ fo mbia. Kashenteŋto, baaŋ suge fo mbia n yɔ n ya chɔɔ bumo m mɔ.

²⁶ Kumo be kaman, benapo na beeŋ suge fo asɔbuuso nɛ yawu kpakpaso be abitasɔ kikɛ.

²⁷ Saŋɛ na so nɛ n shin nɛ fo yige fo kayɛlga lubi nɛ kusɔ jigaya be kebaawɔtɔ nɛ kesakalea nɛ fo fara a ji ashi Ijipt be efuli so na. Fo maaŋ naa nyiŋi asheŋ ere nsaa yɛlga amo ŋko a nyiŋi Ijipt be efuli so gba kuraa.

²⁸ Ade be kaman, nɛ Enyɛnpetale Ebɔrɛ na naŋ kaŋɛ fanɛ meeŋ ta fo m bɔɔ basa nɛ fo kishi nsaa maa sha kewu bumo kikɛ na enɔ.

²⁹ Ŋkpal b ka kishi fo so, baaŋ suge asɔ kama nɛ fo gben n nya kikɛ n yɔ ŋ ka fo kesaria. Saŋɛ na so nɛ ekama e wu fanɛ sakaleche e la fo kashenteŋto. Fo gbagba be kayɛlga lubi nɛ kesakalea

³⁰ e bar le be asheŋ ere fo so na. Fo daa la sakaleche nna n sa efuli pɔtɛ so be basa nseŋ daa shuŋ bumo be agbirana n jija fo kumu.

³¹ Fo daŋ bɔla ekpa nɛ fo da, Ohola nɛ e yili n sa kade nɛ baa tre Samɛria na, bɔla so na nna, amoso kasogberge nɛ e nya na nɛ fo alɛ gba beeŋ nya.

³² Ade kikɛ be kaman, nɛ Enyɛnpetale Ebɔrɛ na kaŋɛ fanɛ “Kurwa nɛ fo da nuu to na nɛ fo alɛ gba beeŋ nuu to, k la kurwa nɛ k shi nsaa du chuŋguluŋ nna. Ekama beeŋ keni fo jiga nseŋ wora fo eyur to, ŋkpal manɛ so, ma agbogboŋ e bɔlɔ kurwa na to.

³³ Feeŋ nuu kurwa na to m boo nɛ kagbenejija e tɔr fo so, ŋkpal kemur nɛ kufusheŋ ka bɔlɔ kurwa na to so. K la fo da Samɛria be kurwa nna.

³⁴ Feeŋ nuu kumo to be asɔ nseŋ dente kumo kikɛ to; kumo be kaman nɛ fo bure kumo nseŋ ta kumo be abureso na ŋ ku ŋ ku fo anyipo. Ma Enyɛnpetale Ebɔrɛ na e kaŋɛ na.

³⁵ Amoso kusɔ nɛ Enyɛnpetale Ebɔrɛ na bee kaŋɛ fanɛ, Ŋkpal fo ka teŋ ma so nseŋ pal kaman n sa ma so, feeŋ ji awurfoŋ ŋkpal fo kayɛlga lubi be kusɔ jigaya nɛ kesakalea be kebaawɔtɔ na so.”

Ebɔrɛ ka ji eche nɛ mo sipocheso demu be asheŋ

³⁶ Ndoŋ nna nɛ Enyɛnpe Ebɔrɛ na naŋ kaŋɛ ma le: “Dimɛdi pibi, fo wora shiriya nɛ fo kaŋɛ Ohola nɛ Oholiba fanɛ b wora n jija a? Kumo ere shin nɛ b pin bumo be ekishisheŋ nɛ b wora na be asheŋ.

³⁷ B bɔla kagbirshuŋ so n ji kubojua, kumo e la fanɛ b maŋ ji kashenteŋ n sa ma nseŋ ta ma mbia n m mɔ n lara esarga n sa agbirana.

³⁸ B daŋ naŋ keni ma bɔrɛlambu na nɛ ma kewushiachɛ nɛ n yili na jiga nna a maŋ sa amo bunyaŋ.

³⁹ Kachɛ nɛ b mɔ ma mbia n lara esarga n sa agbirana na nɛ b ba ma bɔrɛlambu na to nɛ kumo be loŋ shin nɛ k ki kakpa nɛ k maŋ naŋ daga fanɛ b shuŋ ma ndoŋ.

⁴⁰ Ade malɛ kikɛ be kaman nɛ b shuŋi mbɔ n tre benyɛn nɛ b shi kufɔ kufɔ m ba. Nɛ benyɛn na ka ba, nɛ beche anyɔ ere bɛr nchu nseŋ ŋ ŋe ekele nseŋ ta abitasɔ m mɛa to.

⁴¹ Kumo be kaman nɛ b chena mbɛ lela so nseŋ bela asɔ lela fanɛ eduwu nɛ ɔlif be ŋku nɛ n sa bumo na m bɛ teebɔl so ashi bumo be anishito.

⁴² Kaaseso kikɛ bumo be ebu daŋ baa bɔlɔ keshishɛrsawule so be benyɛn damta nɛ baa cha awɔr nsaa ji bumo be amu nna. Benyɛn na daa sa beche na enɔ to be mpini nɛ awurwuro lela nna.

⁴³ Ndoŋ nna nɛ n wu fanɛ benyɛn na kraŋ pere kenishi nna a sha kedi beche na, ama beche na malɛ teŋ ji kesakalea ga.

⁴⁴ Kananɛ benyɛn baa di esakaleche ale anyɔ nyɔ na nɛ b daa di Ohola nɛ Oholiba, nɛ b la beche jiga na.

⁴⁵ Ama kachako benyɛn lela na beeŋ ji beche anyɔ ere demu ŋ kaŋɛ fanɛ b wora n jija nseŋ daga kubojuaji nɛ basa be kemɔ be kasogberge, ŋkpal manɛ so, b ji kubojua nɛ ŋklaŋ malɛ gbiti bumo be enɔana.”

⁴⁶ “Amoso kusɔ nɛ Enyɛnpetale Ebɔrɛ na bee kaŋɛ e la fanɛ, meeŋ shin nɛ jimaŋ nɛ b nya agbo e ba tɔrɔ bumo nɛ kufugboŋ e pɛ bumo nɛ b suge bumo be asɔ n ti so.

⁴⁷ Kumo be kaman nɛ jimaŋ na e kpa bumo ajembu nseŋ ta etokobi ŋ kɔ bumo, m mɔ bumo be mbia nseŋ chɔɔ bumo be nwu n lɛ.

⁴⁸ Meeŋ lara kusɔjigaya be kebaawɔtɔ kasawule na kikɛ so nɛ k baa la kusoe kpele n sa eche kikɛ nɛ b sa maaŋ naŋ ji kubojua nɛ kesakalea fanɛ kananɛ Ohola nɛ Oholiba wora na.

⁴⁹ Ama meeŋ gberge menyi beche anyɔ nɛ men la kenio pibi ere kusoe kenishipereso, ŋkpal menyi be kusɔ jigaya be kebaawɔtɔ nɛ kagbirshuŋ be kulubi so. Aloŋ nɛ menyeeŋ pin fanɛ ma, e la Enyɛnpetale Ebɔrɛ na.”