Ezikɛl 22 - EBƆRƐ BE KAWƆL

Jerusalɛm be alubi be asheŋ

¹ Ndoŋ nna nɛ Enyɛnpe Ebɔrɛ na kaŋɛ ma:

² “Dimɛdi pibi, Ezikɛl, fo wora shiriya nɛ fo kaŋɛ Jerusalɛm nɛ k la kadegboŋ nɛ basa nɛ baa mɔ basa bɔlɔ kumo to na fanɛ k maŋ wora n nyalɛ a? Kumo ere shin nɛ basa na e pin bumo be ekishisheŋ nɛ b wora na be asheŋ.

³ Kumo be kaman nɛ fo kaŋɛ bumo kusɔ nɛ, ma, Enyɛnpetale Ebɔrɛ na bee kaŋɛ na fanɛ ŋkpal fo basa ka mɔ fo gbagba to be basa damta nseŋ naŋ ta kagbirshuŋ n jija fo so, fo kasogberge be saŋɛ bee ba.

⁴ Basa be kemɔ na shin nɛ fo basa wora n jija nɛ agbirana nɛ b lɔŋɛ a shuŋ na malɛ shin nɛ b jija bumo be amu. Basa be kasogberge be kachɛ taga to nna na. Amoso nɛ n shin nɛ efuli pɔtɛana be basa bee wora fo basa eyurto nsaa malga mmalga jiga a gbiti bumo na.

⁵ Efuli nɛ a taga to nɛ amo nɛ a wɔ kufɔ kikɛ to be basa beeŋ wora fo basa eyurto, ŋkpal b ka maa bɛ mbraana so so.

⁶ Israɛl be bejuŋkparpoana na be ekama ta eleŋ nɛ e kɔ nna a mɔ basa.

⁷ Menyi basa nɛ men wɔ kadegboŋ na to na maa sa men tutoana nɛ men nioana bunyaŋ. Menyee puni befɔ nna nsaa kɔrfɛ amunibi nɛ bekulpoche.

⁸ Menyi maa sa mboŋ cheembi na bunyaŋ. Menyi alɛ maa bɛ ma kewushiachɛ na so.

⁹ Fo basa na be beko bee ku efɛ nna a deŋi beko a fin bumo be kamɔ. Beko malɛ bee ji agbirjibi nna nɛ beko malɛ wɔtɔ a wora kusɔjiya be asheŋ.

¹⁰ Basa na be beko wɔtɔ nna a di bumo tutoana be beche nɛ beko malɛ bee tintiŋ a di beche nɛ baa lar ntamaŋ.

¹¹ Basa ko wɔtɔ nna a ji kubojua nɛ beko bee di bumo be bibinyɛn be beche. Bede malɛ wɔtɔ a di bumo sipocheana nɛ bumo nɛ bumo la kututo ŋko kenio koŋwule.

¹² Ade kikɛ be kaman, basa na be beko wɔtɔ nna a sɔ amansherbi nsaa mɔ basa, nɛ beko malɛ bee wɔtɔ amansherbi nɛ b ta m paŋ bumo braana Israɛl be basa nchu ga a dii kedama nɛ kumo be loŋ maŋ daga. B teŋ ma, Enyɛnpetale Ebɔrɛ na so nna.

¹³ Ŋkpal ade kikɛ ere so ma agbo beeŋ basa nɛ baa suge nɛ bumo nɛ baa mɔ ere kikɛ so.

¹⁴ Ma agbo kaŋ ba fo basa ere so, b maŋ naa kɔ kenyɛn nseŋ nya eleŋ m maŋ enɔ so gba. Ma Enyɛnpetale Ebɔrɛ na e kaŋɛ, ma alɛ beeŋ wora kumo.

¹⁵ Ma alɛ beeŋ naŋ shin nɛ b pesaŋ to n yɔ efuli pɔtɛana so nɛ bumo be asheŋ lubi na kikɛ e ba ekar.

¹⁶ Efuli pɔtɛana so be basa beeŋ keni bumo jiga, nɛ fo basa e pin fanɛ ma, e la Enyɛnpe Ebɔrɛ na.”

¹⁷ Kede be kaman nɛ Enyɛnpe Ebɔrɛ na naŋ kaŋɛ ma le:

¹⁸ “Dimɛdi pibi, Israɛl be basa na maŋ naa kɔ tɔnɔ n sa ma. B ki fanɛ danyaŋ ŋko kebɛlso ŋko epal ŋko gbiti nɛ b ŋalga n lɔŋɛ so be ebin nna.

¹⁹ Amoso meeŋ gama bumo kikɛ abar so ashi Jerusalɛm to

^20-21 fanɛ kananɛ baa chala gbiti ŋko danyaŋ ŋko abɛlso ŋko epal a wɔtɔ edɛ to a lɔŋɛ amo so nna. Ma agbo gboŋ beeŋ ba bumo so ashi Jerusalɛm to, fanɛ edɛ nɛ k bee ŋalga abɛlso be yiri yiri na.

²² Kananɛ gbiti bee ŋalga edɛ to na nɛ bumo alɛ gba beeŋ ji awurfoŋ Jerusalɛm to. Aloŋ nɛ baaŋ pin fanɛ ma, Enyɛnpe Ebɔrɛ na e nya agbo a gberge bumo kusoe na.”

Israɛl be bejuŋkparpoana be alubi be asheŋ

²³ Ade kikɛ be kaman nɛ Enyɛnpe Ebɔrɛ na naŋ kaŋɛ ma le:

²⁴ “Dimɛdi pibi, kaŋɛ Israɛl be basa na fanɛ bumo be kasawule na maŋ du cheembi. Alubi e bɔlɔ kumo to, amoso nɛ n nya agbo a gberge kumo be basa kusoe na.

²⁵ Bumo be bejuŋkparpoana ŋko anebiana du fanɛ ebuluŋ nɛ a pɛ kusɔbɔya a kpɛa to a we nsaa munto nna. Baa mɔ basa na nna nseŋ suge amansherbi nɛ mpetɛsɔ kikɛ nɛ baaŋ tiŋ n nya n sɔ. Bumo alɛ bee mɔ bekulana nna nɛ beche damta e ki bekulpoche.

²⁶ Israɛl be bɔrɛmatapoana bee gal ma mbraana nna a nase nsaa keni ma asɔ cheembi jiga. B maa barga asɔ nɛ a du cheembi nɛ amo nɛ a maŋ du cheembi to. Bumo alɛ maa ŋini basa kananɛ asɔ nɛ a walɛ so nɛ amo nɛ a maŋ walɛ so kɔr abar to. Ade kikɛ be kaman, b maa bɛ ma kewushiachɛ na so. Israɛl be basa maa sa ma bunyaŋ.

²⁷ Israɛl be benimuana na gba du fanɛ ekuntuŋ nɛ baa pɛ asɔbɔya a kpɛa to a we nna. Baa mɔ basa nna nsaa bɔla ekpa nɛ k maŋ daga so a dii dama.

²⁸ Nɛ bumo be anebiana malɛ bee bɔla efɛ be ebɔrɛdare nɛ kafule be kewuŋkaŋɛ so a da a buu le be asheŋ lubi ere so fanɛ b ka ta asɔ fuful n nyɔɔ egbal na. Ma, Enyɛnpe Ebɔrɛ na maŋ malga bumo kutɔ, ama baa ku efɛ a kaŋɛ fanɛ b nya kubɔya ashi ŋ kutɔ nna.

²⁹ Basa na baa wɔ kapuni nɛ kasuge be kebaawɔtɔ to nna. B wɔtɔ nna a kɔrfɛ betirpo nsaa puni befɔ, a mɔn bumo kashenteŋ ashi demuji to.

³⁰ Ade kikɛ so nɛ n fin esa nɛ e beeŋ kɔ n sa kadegboŋ na nseŋ kuŋ kumo, nɛ ma agbo maaŋ ba kumo so nɛ k mur. Ama m maŋ nya esa kikɛ.

³¹ Amoso ma agbogboŋ beeŋ mur Israɛl be basa ŋkpal kusɔ nɛ b wora so. Ma, Enyɛnpetale Ebɔrɛ e kaŋɛ na.”