Ezikɛl 21 - EBƆRƐ BE KAWƆL

Babilɔn ka la Ebɔrɛ be tokobi be asheŋ

¹ Ndoŋ nna nɛ Enyɛnpe Ebɔrɛ na kaŋɛ ma le:

² “Dimɛdi pibi, Ezikɛl, kilgi fo anishi n shoŋi Jerusalɛm m malga ŋ gbiti kakpa nɛ basa na bee shuŋ be Ebɔrɛ na. Kpele Israɛl be basa kikɛ kusoe

³ nseŋ kaŋɛ bumo fanɛ ma, Enyɛnpe Ebɔrɛ na bee kaŋɛ fanɛ b ki ndoŋana nna. Amoso meeŋ pee ma tokobi kumo be efar to m mɔ bumo to be basa lela nɛ belubi kikɛ.

⁴ Ma tokobi na beeŋ yili kelargato be kaseto be kaba so m ba choŋ kelargato be esoso na kikɛ m mɔ basa kama nɛ b wɔ ndoŋ

⁵ Nɛ ekama e pin fanɛ ma, Enyɛnpe Ebɔrɛ na maaŋ naŋ bɛta ma tokobi nɛ n pee na n wɔtɔ kumo be efar to kikɛ.

⁶ Amoso, dimɛdi pibi, shin nɛ fo kagbene e jija fo nɛ fo baa shu ashi kakpa nɛ ekama beeŋ wu fo.

⁷ B kaŋ bishi fo kusɔ nɛ k ba nɛ fee shu fo kaŋɛ bumo le: ‘Baru nɛ k bee ba na so nɛ mee shu.’ Kumo jemanɛ kaŋ fo ekama be kagbene beeŋ jija mo nɛ kufu e tɔr ekama so nɛ bumo be aba e pɔ bumo nɛ b baa chicha a maaŋ naŋ tiŋ n wora shɛŋ. Kachɛ na bee ba! K maaŋ naŋ chɛr nseŋ ba. Ma, Enyɛnpetale Ebɔrɛ na e kaŋɛ na.”

⁸ Kumo be kaman nɛ Enyɛnpe na naŋ kaŋɛ ma le:

⁹ “Dimɛdi pibi, kaŋɛ Jerusalɛm be basa na fanɛ; N wora ma tokobi shiriya n loge, n yee kumo nɛ k bee kpa edɛ.

¹⁰ N yee kumo nɛ n mɔ; n fifɛa kumo so nɛ k bee kpa edɛ fanɛ bɔrɛ ka nyɛkpɛ na! Kayurji maŋ naa wɔtɔ, ŋkpal manɛ so, ma basa kplaŋ ma kasokpele nɛ kasogberge kikɛ so nna.

¹¹ Mee yee ma tokobi nna, a wora kumo shiriya a jo, esa nɛ e beeŋ ta kumo m mɔ na.

¹² Dimɛdi pibi, boŋ to awɔrso, ŋkpal manɛ so tokobi na bee ba ma basa nɛ Israɛl be benimuana so nna. Bumo kikɛ beeŋ wu, bumo nɛ basa nɛ b ka na kikɛ. Amoso, ta enɔ n deŋi kumu a shu!”

¹³ Kede be kaman nɛ Enyɛnpetale Ebɔrɛ na naŋ kaŋɛ le: “Mee wora ma basa a keni nna na, nɛ b kaŋ kini ketuba, kumo ere asheŋ ere kikɛ beeŋ ba bumo so.”

¹⁴ “Amoso, dimɛdi pibi, kpele bumo kusoe, nseŋ ber enɔbelaŋ ŋkpal ŋ ka kɔ m pɔɔ so so. Tokobi na beeŋ baa mɔ bena nɛ jiso kikɛ, nseŋ ta kufu m pɛ basa na. Kamɔ be tokobi e la kumo k la kamɔ damta be tokobi nna, bena nɛ jiso nɛ k bee mɔ.

¹⁵ Saŋɛ na so kufu beeŋ pɛ basa; nɛ galeŋga e chicha n fiti n tɔr. N wora ma tokobi shiriya nɛ k mɔ ashi bumo be mbunaana kikɛ ase. N tiŋ n yee kumo nna nɛ k bee kpa edɛ fanɛ bɔrɛ ka bee nyɛkpɛ na, nseŋ pɛ kumo to nɛ m mɔ.

¹⁶ K beeŋ baa ŋe bena nɛ jiso; kaplɛkama nɛ kumo be jisoso kilgi n shoŋi nɛ k beeŋ ŋe.

¹⁷ Ma alɛ gba beeŋ ber enɔbelaŋ, nɛ ma agbo e yɔɔso. Ma, Enyɛnpe e kaŋɛ na.”

¹⁸ Kumo be kaman nɛ Enyɛnpe na be kubɔya ba ma kutɔ:

¹⁹ E yɛ: “Dimɛdi pibi, ŋini ekpa anyɔ nɛ Babilɔn be efuli so be ewura beeŋ ta mbe tokobi na m bɔla so m ba. Ekpa anyɔ na daga fanɛ a fara efuli koŋwule so nna. Dulgi kakpa nɛ ekpa na barga to anyɔ na,

²⁰ a ŋini ekpa nɛ k bee yɔ Ammɔnebi be kadegboŋ nɛ baa tre Raba na, nɛ kumo nɛ kumo alɛ bee yɔ Juda be kadegboŋ nɛ baa tre Jerusalɛm nɛ b pɔr egbal ŋ kulti kumo na; nɛ Babilɔn be ewura na e bɔla so n yɛr mbe tokobi na.

²¹ Babilɔn be ewura kaŋ baa fo ekpa anyɔ na be ŋkpancheri na, e beeŋ bɔla mbe atanyembi so nɛ mbe agbirana so nɛ kusɔbɔya nɛ b mɔ n lara sarga be kegbirche so m bishi so m pin kusɔ nɛ e beeŋ wora.

²² Nɛ e baaŋ ta enɔjiso m pee ketanyembi nɛ b sibɛ ‘Jerusalɛm’ n deŋi kumo so a ŋini fanɛ b kɔ kumo kena, e beeŋ shin nɛ b foŋ kabel n sa benapo ekpa nɛ b ya kulti kadegboŋ na n wɔtɔ, nseŋ koli eshishɛr n deŋi abar so ŋ gbuŋ egbal nɛ k kulti kade na, saŋɛ na so baaŋ bɔla amo so n dii n luri kade na to ŋ kɔ basa na kena. Bumo alɛ beeŋ naaŋ ta ndibi gbɛgbɛso n da kade na be mbunagboŋ na m bugi n n luri to.

²³ Ekama nɛ e wɔ Jerusalɛm beeŋ baa fɛ fanɛ efɛ be kubɔya e la kumo, ŋkpal manɛ so, bumo nɛ Babilɔn be ewura nase nnɔ nna n sa abar. Ama e beeŋ nyiŋi bumo asheŋ lubi nɛ b wora na nseŋ yili amo so pɛ bumo ŋ ki anya.

²⁴ Amoso kusɔ nɛ Enyɛnpetale Ebɔrɛ na kaŋɛ e la fanɛ, ŋkpal menyi, Jerusalɛm be basa, nɛ menyi be ewura be alubi ka dii efuli ashi kusɔ kama nɛ menyee wora to so, meeŋ shin nɛ b pɛ menyi ŋ ki anya.

²⁵ Fo, Israɛl be ewura lubi nɛ kumu kpakpaso wura ere, fo kasogberge be kachɛ maaŋ naŋ chɛr nseŋ fo.

²⁶ Ma, Enyɛnpe Ebɔrɛ na e naa kaŋɛ fo na fanɛ fo shɛŋi fo kumu so be neemu na nseŋ lara kuwurwuro na. Ŋkpal manɛ so, asheŋ maaŋ naa du kananɛ a daa du na. Esa nɛ e daa maŋ kɔ eyilikpa beeŋ nya eyilikpa nɛ emo nɛ e daa kɔ eyilikpa e paŋ mbe eyilikpa.

²⁷ Meeŋ shin nɛ kadegboŋ na e mur! Kumo alɛ maaŋ naŋ ki kade kikɛ n ya fo fanɛ esa nɛ k la mo peya na ka beeŋ ba, nɛ n ta kumo n sa mo.

²⁸ Ama fo, dimɛdi pibi, kaŋɛ fanɛ kusɔ nɛ Enyɛnpetale Ebɔrɛ na bee kaŋɛ a laŋɛ Ammɔn be basa nɛ baa tege Israɛl na be kaplɛa so e la fanɛ b gberge tokobi m pe, n wora shiriya nɛ b mɔ; b fifɛa kumo so nna m bela ase nɛ b ta kumo m mɔ. K bee kpa edɛ fanɛ bɔrɛ ka nyɛkpɛ nna!

²⁹ Ebɔrɛdare nɛ menyee ku na la efɛ nna, nɛ asheŋ nɛ men kpal n wu na kikɛ la kafulesheŋ. Menyi amu kpakpasowuraana nɛ basa lubi ere, menyi be kasogberge be kachɛ bee ba; tokobi na beeŋ gbelge menyi be abɔ so.

³⁰ Amoso men bɛta menyi be tokobi n wɔtɔ kumo be efar to. Ŋkpal manɛ so jemanɛ nɛ menyee gberge basa kusoe fo ekar. Meeŋ ji menyi demu kakpa nɛ b kurge menyi, ashi men nanaana be kasawule so na.

³¹ Meeŋ shin nɛ ma agbo e ba menyi so fanɛ edɛ na n chɔɔ menyi. Meeŋ ta menyi m bɔɔ basa nyaŋnyaŋso enɔ, basa nɛ b nyi kamɔ to.

³² Menyeeŋ ki fanɛ ndibi puga edɛ, menyi be ŋklaŋ beeŋ wurge menyi be kasawule so nɛ esa kikɛ maaŋ naŋ nyiŋi menyi kikɛ; ŋkpal manɛ so, ma Enyɛnpe Ebɔrɛ na e malga na.”