Ezikɛl 20 - EBƆRƐ BE KAWƆL

Israɛl ka wora kagbene kpakpaso be asheŋ

¹ B ka pɛ ewura Jehowachin nɛ anyi be beko n yɔ Babilɔn be efuli so na be kafɛ shunusopo to be kufɔl nusopo to be kachɛ kudusopo na nɛ Israɛl be benimuana ko ba chena ma anishi to a fin kenu kusɔ nɛ Enyɛnpe Ebɔrɛ na kɔ nɛ e kaŋɛ bumo.

² Ndoŋ nna nɛ Enyɛnpe Ebɔrɛ na kaŋɛ ma

³ fanɛ ŋ kaŋɛ Israɛl be benimuana na fanɛ kusɔ nɛ Enyɛnpetale Ebɔrɛ na kaŋɛ nde: “Men ba nna nɛ men ba pin kusɔ nɛ mee sha fanɛ men wora a? Ŋ ka baa la Enyɛnpetale Ebɔrɛ nɛ e bee sa ŋkpa ere, m maaŋ shin nɛ men pin kusɔ nɛ mee sha fanɛ men wora.

⁴ Dimɛdi pibi, fo wora shiriya nɛ fo kpele bumo kusoe a? Kumo ere nyiŋi bumo ekishisheŋ nɛ bumo tutoana daŋ wora na be asheŋ,

⁵ nseŋ naŋ kaŋɛ bumo fanɛ kusɔ nɛ Enyɛnpetale Ebɔrɛ na bee kaŋɛ e la fanɛ kachɛ nɛ e lara menyi nɛ men baa la mbe basa na, e daŋ bɔ ntaŋ nna n nase kɔnɔ n sa Jeekɔb nɛ men tutoana nseŋ lara mbe kumu ŋ ŋini bumo ashi Ijipt be efuli so ŋ kaŋɛ fanɛ e beeŋ baa la menyi nɛ men be kaman to ebi be Ebɔrɛ.

⁶ Loŋ be kachɛ na nɛ e nase kɔnɔ fanɛ e beeŋ lara bumo Ijipt be efuli so n yɔ kasawule nɛ k kɔ kanya alegaiso nsaa wora adɔjibi ga nseŋ naa la kasawule nɛ k walɛ a chɔ nsawule kikɛ nɛ mo gbagba fin n yili bumo na so.

⁷ Kumo be kaman, nɛ e naŋ kaŋɛ bumo fanɛ bumo be ekama e yige agbirana nɛ men ta menyi be anishi n yuu so, nɛ amo be asheŋ bee nu ma agbo nɛ ŋ kishi amo ga na be kebaashuŋ; saŋɛ na so, menyi maaŋ ta Ijipt be efuli so be agbirana n jija menyi be kebaawɔtɔ. Ŋkpal manɛ so, ma e la Enyɛnpe menyi be Ebɔrɛ na.”

⁸ Ama b pal kaman n sa ma nseŋ kini kenu n sa ma. B daŋ maŋ lara asɔ nɛ b ta ŋ ki agbirana ashuŋ nseŋ ta bumo be anishi n yuu amo so na ashi bumo to. Bumo alɛ daa maŋ naŋ kini Ijipt be efuli so be agbirana na gba. Amoso nɛ n daŋ kaŋɛ fanɛ meeŋ shin nɛ ma agbo a ba bumo so nɛ ŋ gberge bumo kusoe ashi Ijipt ndoŋ na.

⁹ Ama n daa maŋ wora loŋ, ŋkpal ŋ ka daa maa sha fanɛ ma ketre e jija efuliana nɛ baaŋ wu kananɛ meeŋ lara ma kumu ŋ ŋini Israɛl be basa nseŋ juŋkpar bumo n lar Ijipt be efuli so na be anishito so.

¹⁰ Amoso nɛ n daŋ juŋkpar bumo n lar Ijipt be efuli so n yɔ keshishɛrsawule so na.

¹¹ Ndoŋ nɛ n sa bumo ma mbraana nɛ ma keŋini, nɛ b wora amo kasonu nseŋ pin kananɛ baŋ baa keta bumo be amu.

¹² Kumo be kaman, nɛ n yili ma Kewushiachɛ n sa bumo nɛ k baa la ashi tɔɔnɛ ma nɛ bumo be kefɛato, saŋɛ na so baaŋ pin fanɛ ma, Enyɛnpe Ebɔrɛ na e shin nɛ b ki basa cheembi.

¹³ Ama Israɛl be basa na lar ma kaman keshishɛrsawule na so ndoŋ, nseŋ kini kebɛ ma mbraana nɛ keŋini nɛ a bee shin nɛ esa bee bii kebaawɔtɔ lela na so. Bumo alɛ nseŋ keni ma Kewushiachɛ na jiga. Amoso nɛ n daŋ kaŋɛ fanɛ meeŋ shin nɛ ma agbo e ba bumo so nɛ m mur bumo ashi keshishɛrsawule na so na.

¹⁴ Ama n daa maŋ wora loŋ, ŋkpal ŋ ka daa maa sha fanɛ ma ketre e jija ashi efuliana nɛ b wu kananɛ n lara bumo ashi Ijipt be efuli so na be anishito so.

¹⁵ Amoso nɛ ma alɛ daŋ bɔ ntaŋ ŋ kaŋɛ bumo keshishɛrsawule na so fanɛ m maaŋ naŋ yɛr bumo kasawule lela nɛ k bee wora adɔjibi ga nɛ n daŋ sa bumo na so.

¹⁶ Ŋkpal manɛ so, b kini kebɛ ma mbraana nɛ ma keŋini so nseŋ keni ma Kewushiachɛ na jiga, nɛ bumo be ŋgbene kikɛ malɛ daa wɔ bumo be agbirana na so a chɔ ma.

¹⁷ Ade kikɛ be kaman, n daŋ wu bumo kuwɔr nna a maŋ mur bumo ŋko n shin nɛ b shir keshishɛrsawule na so ndoŋ.

¹⁸ Kusɔ nɛ n daŋ wora e la fanɛ, n daŋ fɛa bumo be mbifɔlbi nɛ b daa wɔ bumo to na so nna, fanɛ b sa maŋ kaŋ kute bumo tutoana to m bɔla agbirana so n jija bumo be amu.

¹⁹ Ma e la Enyɛnpe, menyi be Ebɔrɛ na; men be ma mbraana nɛ ma keŋini so.

²⁰ Men ta ma Kewushiachɛ naŋ ki kachɛ cheembi, saŋɛ na so k beeŋ baa la tɔɔnɛ a ŋini fanɛ men la ma basa nna nɛ ma alɛ la Enyɛnpe menyi be Ebɔrɛ na.

²¹ Ama ashi keshishɛrsawule na so ndoŋ, mbia na gba lar ma kaman nseŋ kini kebɛ ma mbraana nɛ ma keŋini so. Bumo alɛ gba naŋ keni ma Kewushiachɛ na jiga nna. Amoso nɛn daŋ kaŋɛ fanɛ meeŋ shin nɛ ma agbo e ba bumo so ashi kiyi na to ndoŋ.

²² Ama n daa maŋ wora loŋ, ŋkpal ŋ ka daa maa sha fanɛ ma ketre e jija ashi efuliana nɛ b wu kananɛ n juŋkpar bumo n lar Ijipt be efuli so na be anishito so.

²³ Amoso nɛ n daŋ naŋ bɔ ntaŋ ŋ kaŋɛ bumo kiyi na to fanɛ meeŋ shin nɛ b pesaŋ to n sɔ efuliana pɔtɛana so na.

²⁴ Ŋkpal manɛ so, b daŋ kini kebɛ ma mbraana nɛ atande so nsaa maŋ ta ma Kewushiachɛ na n tre sheŋ nna. Bumo tutoana be agbirana e daŋ bɔlɔ bumo kenishi ga nɛ b daa shuŋ amo.

²⁵ Nɛ n daŋ kpal loŋ so n sa bumo mbraana nɛ ŋ gbagba nyi fanɛ b daa maaŋ tiŋ m bɛ amo so n nya ŋkpa.

²⁶ B daŋ naŋ bɔla bumo gbagba be esarga so n jija bumo be kebaawɔtɔ nna. B daa ta bumo be ewurkoŋ nna a lara esarga. N daŋ shin nɛ loŋ wora nna nɛ kufu e pɛ bumo nɛ b pin fanɛ ma e la Enyɛnpe na.

²⁷ Amoso, dimɛdi pibi, Ezikɛl, kaŋɛ Israɛlebi na fanɛ, kusɔ nɛ Enyɛnpetale Ebɔrɛ na kaŋɛ e la fanɛ kananɛ bumo tutoana daŋ kini ma nseŋ tege ma nna na.

²⁸ Jemanɛ nɛ m bar men tutoana kasawule nɛ n nase kɔnɔ fanɛ meeŋ sa bumo na so n loge na, nɛ b baa wu agoŋgulombi nɛ ndibigboŋ nɛ a kɔ afantaŋ nseŋ ta amo ŋ ki bumo be agbirshuŋkpaana nsaa wɔtɔ a lara esarga amo ase a sa bumo be agbirana. B daa chɔɔ eduwu nna nsaa duga nsa a wurge agbirana na nɛ kumo be loŋ daa nu ma agbo nsaa kaa ma kagbene.

²⁹ Ndoŋ nna nɛ m bishi bumo fanɛ nuso be mboŋ nɛ menyee kaa yɔ na? Nɛ b kaŋɛ, ‘Agbir ase’ nɛ anyee yɔ. Hale nɛ mbre agbirshuŋkpa nɛ baa tre agbir ase.

³⁰ Amoso kaŋɛ Israɛl be basa na fanɛ kusɔ nɛ Enyɛnpetale Ebɔrɛ bee bishi e la fanɛ, manɛ e baa nɛ menyeeŋ jija menyi be amu nɛ kebaawɔtɔ fanɛ kananɛ men tutoana daŋ wora na nsaa shuŋ bumo be agbirana nɛ amo be asheŋ bee nu agbo na?

³¹ Jemanɛ nɛ menyee ta menyi be mbia a lara esarga a sa agbirana na hale nɛ mbre na, menyee jija menyi be amu nɛ menyi be kebaawɔtɔ nna na. O Israɛlebi, a daga ŋ ka naŋ sa menyi ekpa nɛ men bishi ma kusɔ ko a? Ma, Enyɛnpetale Ebɔrɛ e naa kaŋɛ menyi kashenteŋto na fanɛ m maaŋ sa menyi ekpa nɛ men bishi ma shɛŋ.

³² Menyee kaa kaŋɛ le nna: “Anyee sha fanɛ an baa du fanɛ efuliana nɛ amo be basa bee shuŋ ndibi nɛ ajembu na nna.” Ama kusɔ nɛ menyee fɛ na maaŋ tiŋ n wora kikɛ.

³³ Ma Enyɛnpetale Ebɔrɛ na e naa kaŋɛ menyi kashenteŋto na fanɛ meeŋ ta eleŋ n ji kuwura menyi so nɛ men pin kananɛ ma agbogboŋ du.

³⁴ Eleŋ nɛ tintiŋ nɛ agbogboŋ nɛ meeŋ ta n lara menyi ashi efuliana nɛ men pesaŋ to n yɔ na, m ba gama abar so.

³⁵ Nseŋ bar menyi keshishɛrsawule nɛ efuliana na kulti kumo na so, nɛ ma nɛ menyi e tu abar ndoŋ nɛ n ji menyi demu nɛ men ji n tɔr.

³⁶ Kananɛ n ji men tutoana demu Ijipt be efuli so be kiyi to nɛ b ji n tɔr nɛ ŋ gberge bumo kusoe na nɛ meeŋ ji menyi alɛ gba demu. Ma, Enyɛnpetale Ebɔrɛ e kaŋɛ na.

³⁷ “Meeŋ ta tintiŋ n shin nɛ men be ekama e wora kusɔ nɛ kɔnɔkoŋwule be ŋkre na bee ŋini.

³⁸ Meeŋ lara ŋgbene kpakpaso wuraana nɛ baa lar ma kaman na ashi menyi to. Hale nɛ n lara bumo ashi efuliana nɛ b pesaŋ to n yɔ na gba m ba, b maaŋ nya m bɛta n yɔ Israɛl be kasawule so. Ndoŋ nɛ menyeeŋ pin fanɛ ma e la Enyɛnpe Ebɔrɛ na.

³⁹ Kusɔ nɛ Enyɛnpetale Ebɔrɛ bee kaŋɛ menyi nde: Menyi Israɛlebi, be ekama nɛ e bee sha e ya kaa shuŋ mbe agbirana, ŋkpal manɛ so, ade kikɛ be kaman menyeeŋ ba nu n sa ma nseŋ yige kebaa lara esarga a sa menyi be agbirana a jija ma ketre.

⁴⁰ Ŋkpal manɛ so, kachɛ na kaŋ fo ekama ashi Israɛl be efuli so beeŋ shuŋ ma ashi kebee cheembi nɛ baa tre Zayɔn ashi Jerusalɛm to na so, nɛ ma alɛ e sɔ bumo esarga nɛ baaŋ lara n sa ma ndoŋ na. Menyi be asheŋ beeŋ baa par ma nɛ ma alɛ e baa keni menyi be esarga lela nɛ ŋkɛ cheembi na akpa.

⁴¹ Jemanɛ nɛ meeŋ naŋ lara menyi efuliana nɛ men pesaŋ to n yɔ to m bɛta m ba gama abar so na, ma kagbene beeŋ naŋ fuli menyi so nɛ n sɔ menyi be esarga fanɛ duwu nɛ a bee dufɛ viim na. Ndoŋ nɛ efuliana na kikɛ beeŋ wu fanɛ n du cheembi nna.

⁴² Jemanɛ nɛ meeŋ bɛta menyi m ba Israɛl be efuli so, kasawule nɛ n nase kɔnɔ fanɛ meeŋ ta n sa men tutoana na, nɛ menyeeŋ pin fanɛ ma e la Enyɛnpe na.

⁴³ Ndoŋ nɛ menyeeŋ nyiŋi menyi be asheŋ wora so nɛ a shin nɛ men jija menyi be kebaawɔtɔ na, nɛ a shin nɛ menyi be asheŋ e baa nu menyi gbagba agbo ŋkpal asheŋ lubi nɛ men wora so.

⁴⁴ Jemanɛ nɛ meeŋ wora menyi, Israɛlebi, asheŋ nɛ a beeŋ bar ma ketre kemaŋkura nɛ mannɛ men be asheŋ lubi nɛ aworbi jiga so na nɛ menyeeŋ pin fanɛ ma e la Enyɛnpetale Ebɔrɛ na.”

⁴⁵ Kede be kaman nɛ Enyɛnpe Ebɔrɛ na be kubɔya naŋ ba ma kutɔ.

⁴⁶ E yɛ: “Dimɛdi pibi, kilgi a keni kelargato be kaseto nseŋ malga ŋ gbiti kupo nɛ k wɔ ndoŋ na.

⁴⁷ Kaŋɛ kupo na fanɛ k kaŋ kusoe n nu Enyɛnpe na be kubɔya. E yɛ: ‘Mee sha kenya edɛ n wɔtɔ fo to nɛ a chɔɔ fo ndibi bumbuŋ nɛ awɔlso kikɛ m mur nna na. Sheŋ maaŋ tiŋ n duŋ edɛ na saŋɛ nɛ a beeŋ yili kelargato be kaseto n chɔɔ a yɔ kelargato be esoso na. Kusɔkama malɛ nɛ edɛ na beeŋ tu amo be kebɔr so beeŋ ji edɛ m mur.

⁴⁸ Ekama beeŋ pin fanɛ ma Enyɛnpe na e nya edɛ na n wɔtɔ kupo na to nɛ ekama malɛ maaŋ tiŋ n duŋ amo.’ ”

⁴⁹ Ndoŋ nna nɛ n fubel ŋ kaŋɛ: “Enyɛnpetale Ebɔrɛ, sa maŋ shin nɛ n wora loŋ! Ekama bee malga a kaŋɛ fanɛ aŋasa nɛ mee bɔ nɛ a bee wul bumo to.”