Ezikɛl 19 - EBƆRƐ BE KAWƆL

Kagbenejija be kashɛ

¹ Ndoŋ nna nɛ Enyɛnpe Ebɔrɛ kaŋɛ ma fanɛ m boŋ kagbenejija be kashɛ n sa Israɛl be benimu anyɔ ko ŋ kaŋɛ le:

² “Men nio daa la fanɛ buluŋ cheso nɛ e daa kɔ kenyɛn nna nseŋ bela mbe bibi ashi ebuluŋ nyɛnso lempo to!

³ E bela mbe ebi ko nseŋ ŋini kumo kepɛ n ji, nɛ k koya edimɛdi be kepɛ n ji.

⁴ Efuliana na ka nu mbe asheŋ, nɛ b fe mo kekpaala m pɛ mo, nseŋ ta edariwa ŋ gberge mo n yɔ Ijipt be efuli so.

⁵ Kumo nio ka jo nseŋ wu fanɛ tama loge na, nɛ k naŋ ta kumo be bibi na be eko m bela kumo nɛ k ki buluŋ lempo.

⁶ K ka daŋ n yili nɛ k tu kumo braana ebuluŋ e ji kekpaŋ. Nseŋ koya edimɛdi be kepɛ n ji.

⁷ K daa bure basa be ebu lempoana nna, nsaa jija bumo be ndeana. K baaŋ ponte jemanɛ kikɛ, kufugboŋ bee tɔr ekama so efuli na so nna nɛ b baa chicha.

⁸ Ndoŋ nna nɛ efuliana na kre kumo be kemɔ be nia, nɛ basa shi kaplɛkama m ba. Nɛ b sho kashewu m pɛ kumo

⁹ Kumo be kaman nɛ b ta kumo n wɔtɔ katurgegboŋ to nseŋ ta kumo n yɔ Babilɔn be ewura kutɔ. N ya ta mo n ti ebu nɛ ekama maŋ naŋ nu mbe kaponte ashi Israɛl be abee so kikɛ.

¹⁰ Fo nio daa du fanɛ kedibi sɔrso nna nɛ k yil m mata kabombi; K daa sɔr nɛnɛ nna nsaa kɔ ayabi damta ŋkpal k ka daa nya nchu nɛnɛ so.

¹¹ Kumo be ayabi daa kɔ eleŋ nna, nseŋ daa walɛ keku n wora kuwurkpabi. K daŋ daŋ n yɔ awɔlto a chɔ ndibi nɛ a ka na kikɛ nna. Ekama daŋ wu kumo be nteŋ nɛ ayabi damta.

¹² Ama agbo so nɛ n tia kumo n lɛ kasawule. Afu nɛ a shi epeŋilarkpa daŋ shin nɛ k bolo nɛ kumo be asɔrso gbaŋgbaŋ n tɔr; nɛ kumo be ayabi lempo na wɔl nɛ edɛ ji amo.

¹³ Naniere keshishɛrsawule so nɛ n duu kumo, kasawule wɔlso nɛ nchu maŋ wɔ kumo so.

¹⁴ Ndoŋ nna nɛ kumo be keyabi gboŋgboŋi ko pɛ edɛ; nɛ edɛ na bɛ kumo so n chɔɔ kumo be ayabi nɛ asɔrso kikɛ. Keyabi lempo kikɛ daŋ maŋ naŋ ka kumo so nɛ b ku n wora kuwurkpabi. Kashɛ ere la kagbenejija be kashɛ nna n daga kebaaboŋ kagbenejijaso.”