Ezikɛl 18 - EBƆRƐ BE KAWƆL

Esa nɛ e wora kulubi e naaŋ wu

¹ Nɛ Enyɛnpe Ebɔrɛ na kaŋɛ ma:

² “Ezikɛl, mee kaa nu Israɛl be basa ka bee bɔ keŋasa ere e kaŋɛ fanɛ; bekurgepo e ji anyinyembi nɛ a bee nyiri bumo be mbia be anyi.

³ Naniere kaŋɛ bumo fanɛ ma, Enyɛnpetale Ebɔrɛ nɛ e bee sa ŋkpa na e kaŋɛ na fanɛ b maaŋ naa bɔ loŋ be keŋasa na Israɛl be efuli so.

⁴ Dimɛdi kikɛ be ŋkpa bɔɔ ma enɔ nna, bekurgepo nɛ bumo be mbia kikɛ. Amoso, esa nɛ e wora kulubi e naaŋ wu kumo be luwu.

⁵ Nɛ fanɛ esa lela koso a ji kashenteŋ nsaa wora kusɔ nɛ k daga jemanɛ kikɛ.

⁶ E maa ji agbirjibi ŋko a shuŋ Israɛl be basa be agbirana na. Mo alɛ maa sha mo barkasa be eche ŋko a di eche jemanɛ nɛ e bee lar ntamaŋ.

⁷ Amodoŋwura malɛ maa puni ŋko a suge esa, mo alɛ maa sɔ tarma pɔɛŋ nseŋ sa esa mpaŋ. Ade be kaman mo alɛ naa chɛ betirpo to a sa bumo ajibi nɛ asɔbuuso.

⁸ Loŋ be esa na maa wɔtɔ amansherbi nɛ e ta m paŋ esa nchu, mo alɛ maa wora kulubi nseŋ naa ji asheŋ nɛ amo be ekpa so a sa ekama.

⁹ Ade kikɛ be kaman, mo alɛ de so nna nɛ e maaŋ wora n da ma mbra nɛ ma keŋini so. Le be esa la esa lela nna nsaa beeŋ ji efute n chɛr.” Ma, Enyɛnpetale Ebɔrɛ e kaŋɛ na.

¹⁰ Ama nɛ fanɛ esa lela ere kurge ebi nɛ e bee suge nsaa mɔ basa, nsaa wora

¹¹ asheŋ nɛ mo tuto bre maaŋ wora na. Ebi na bee ji agbirjibi nsaa di mo braana be beche.

¹² E bee puni betirpo nsaa suge basa. Nɛ esa ta kusɔ ko m ba yili tarma gba e maaŋ naŋ laŋɛ kumo n sa kumo wura. Mo alɛ bee shuŋ agbirana nsaa wora ekishisheŋ.

¹³ Ade kikɛ be kaman, e bee wɔtɔ mpaŋ kama nɛ e sa esa nchu ga nna. Esa kikɛ nɛ e la esa lubi fanɛ mo maa ba nɛ e ji efute n chɛr. Mo gbagba e wora le be ekishisheŋ ere, amoso mo e daga amo be luwu. Mo luwu na be turju beeŋ baa bɛ mo gbagba nna.

¹⁴ Ama nɛ fanɛ esa lubi ere pibi wu asheŋ nɛ mo tuto bee wora na nseŋ kini kewora asheŋ fanɛ mo tuto,

¹⁵ nsaa maa ji agbirjibi ŋko a shuŋ Israɛl be agbirana, mo alɛ maaŋ di mo barkasa be eche.

¹⁶ E maaŋ suge ŋko m puni esa kikɛ, mo alɛ maaŋ sɔ tarma pɔɛŋ nseŋ sa esa mpaŋ. Mo alɛ bee sa betirpo ajibi nɛ asɔbuuso nna

¹⁷ nsaa kini asheŋ lubi be kewora. Kusɔ nɛ e bee wora e la fanɛ e bee nu nna nsaa bɛ ma mbraana nɛ ma keŋini so. Le be esa beeŋ ji efute n chɛr. Mo tuto e wora alubi, nɛ le be esa lela ere maaŋ wu ŋkpal mo tuto be asheŋ lubi so.

¹⁸ Mo tuto gbagba e naŋ wu ŋkpal mbe kapuni nɛ kasuge nɛ asheŋ lubi so.

¹⁹ Ashere menyeeŋ bishi fanɛ nɛ mannɛ e baa nɛ ebi maaŋ nya mo tuto be asheŋ lubi be kakɔka? Kusɔ nɛ k ba e la fanɛ ebi na wora kusɔ nɛ k daga nseŋ wora ma mbraana kasonu nna.

²⁰ Basa nɛ b wora alubi e naa wu alubi be luwu. Mbia maaŋ ji awurfoŋ ŋkpal bumo tutoana be alubi so nɛ bekurgepo gba maaŋ ji awurfoŋ ŋkpal bumo be mbia be alubi so. Basa lela beeŋ nya bumo be alelasheŋ be kakɔka nɛ basa lubi malɛ e nya kasogberge ŋkpal bumo be alubi so.

²¹ Nɛ fanɛ basa lubi yige asheŋ lubi be kewora nseŋ fara a wora ma mbraana kasonu nseŋ naa wora asheŋ nɛ a daga, b maaŋ wu manaŋ.

²² Baaŋ nya bumo be alubi kikɛ be ketampaŋ, ŋkpal b ka wora asheŋ nɛ a daga so.

²³ Basa lubi be luwu maa par ma Enyɛnpe Ebɔrɛ na kikɛ. Kusɔ nɛ mee sha e la fanɛ b ka beeŋ tuba n lar bumo be alubi to nseŋ ji efute n chɛr.

²⁴ Ama nɛ fanɛ basa lela yige alela be kewora nseŋ fara a wora ekishisheŋ nɛ basa lubi bee wora na, a daga fanɛ b ji efute n chɛr a? Ayai! B maaŋ nyiŋi bumo alelasheŋ dra na. Baaŋ wu ŋkpal bumo be asheŋ lubi na so.

²⁵ Menyi Israɛl be basa bee kaa kaŋɛ fanɛ, kusɔ nɛ Enyɛnpe bee wora na maŋ walɛ. Ama men nu nfe, mannɛ ma e naa wora asɔ nɛ a maŋ walɛ. Menyi e naa wora asɔ nɛ a maŋ walɛ!

²⁶ Nɛ fanɛ basa lela fara asheŋ lubi be kewora, a daga fanɛ b wu ŋkpal bumo be alubi so.

²⁷ Nɛ fanɛ basa lubi malɛ yige asheŋ lubi be kewora nsaa wora asheŋ lela, baaŋ mɔlga bumo be amu ashi kasogberge to.

²⁸ Ŋkpal b ka fɛ bumo be asheŋ wora so na be asheŋ nseŋ yige asheŋ lubi na be kewora so nɛ baaŋ ji efute.

²⁹ Ama men kraa kaŋɛ fanɛ asɔ nɛ mee wora na maŋ walɛ. Menyi e wora n jija nsaa wora asɔ nɛ a maŋ walɛ.

³⁰ “Ma, Enyɛnpetale Ebɔrɛ na e naa kaŋɛ menyi Israɛl be basa fanɛ meeŋ ji menyi be ekama demu ŋkpal kusɔ nɛ e wora so. Amoso, men tuba ashi menyi be asheŋ woraso lubi to. Nɛ mannɛ aloŋ, a beeŋ yɛr menyi kemur to.

³¹ Men lar men be asheŋ lubi na to nseŋ fara a fɛ asheŋ lela be kewora be asheŋ menyi be ŋgbene to. Menyi alɛ e baa ji kashenteŋ a sa ma. Men sa maŋ shin nɛ menyi be alubi e mɔ menyi.

³² Ma, Enyɛnpe Ebɔrɛ na maa sha fanɛ men be ekama e wu. Amoso men tuba nseŋ ji efute n chɛr!”