Ezikɛl 17 - EBƆRƐ BE KAWƆL

Ŋjɔnɔkoso anyɔ be keŋasa be asheŋ

¹ Nɛ Enyɛnpe Ebɔrɛ na kaŋɛ ma le:

² “Dimɛdi pibi, Ezikɛl, bɔ Israɛl be basa na keŋasa

³ n shin nɛ b pin fanɛ kusɔ nɛ ma, Enyɛnpetale Ebɔrɛ, bee kaŋɛ bumo e la fanɛ kajɔnɔkoso gboŋ ko nɛ e daa kɔ aba lempo nɛ atɛ lela ga e daŋ firgi n yɔ Lebanɔn be abee so n ya bu kedibi nɛ baa tre sida na be awɔlto be keyabi.

⁴ Nseŋ ta keyabi na n yɔ eyawujipo be kasawule so n ya fɛa bumo kadegboŋ to.

⁵ Kumo be kaman nɛ kajɔnɔkoso na ta Israɛl be efuli so be keduuso n ya duu kasawule lela nɛ k mata kabombi so, kakpa nɛ k beeŋ baa nya nchu jemanɛ kikɛ nseŋ tiŋ n daŋ nɛnɛ na.

⁶ Ndoŋ nna nɛ keduuso na kɔr n daŋ ŋ ki kefeelebi a sɔr asɔrso nɛ baa tre greep na. Nɛ kumo be ayabi daŋ esoso a shoŋi kajɔnɔkoso na, nɛ kumo be nliŋi yɔ nchiŋ kasawule to. Nɛ kefeelebi na wora ayabi damta nseŋ purge afantaŋ.

⁷ Kajɔnɔkoso nyɔsopo ko malɛ gba daa wɔtɔ a kɔ aba lempo nɛ atɛ damta. Nɛ kefeelebi na be ayabi nɛ nliŋi salga to a yɔ kajɔnɔkoso nyɔsopo na kutɔ, a tama fanɛ k beeŋ nya nchu kumo kutɔ a chɔ kudɔbi nɛ k daa wɔ kumo to na.

⁸ Ama kasawule lela nɛ k kɔ nchu nɛnɛ so nɛ b daŋ duu kumo nɛ k tiŋ n daŋ nɛnɛ ŋ ki kefeelebi lela nseŋ tiŋ n sɔr nɛnɛ.

⁹ Naniere, Ezikɛl, kaŋɛ ma, fo tama fanɛ kefeelebi ere beeŋ pete a? Kajɔnɔkoso juŋkparso na maaŋ nya agbo n tia kumo nseŋ kuya kumo be ayabi to n lɛ nɛ a wɔl a? Kajɔnɔkoso na beeŋ tiŋ n tia kefeelebi na nɛ k maŋ fin benapo lempo damta be kechɛto gba.

¹⁰ Kefeelebi na kɔ eleŋ nɛ alenfia nɛnɛ, ama nɛ fanɛ epeŋilarkpa be afu ber kumo so, k maaŋ chɛr nɛ k bolo.”

Enyɛnpe Ebɔrɛ na ka bugi keŋasa na to be asheŋ

¹¹ Kumo be kaman, nɛ Enyɛnpe Ebɔrɛ kaŋɛ ma le:

¹² “Bishi Israɛl be basa nɛ b pal kaman n sa ma ere fanɛ b pin keŋasa ere be kefito a? Kaŋɛ bumo fanɛ Babilɔn be efuli so be ewurgboŋ e ba Jerusalɛm to m ba pɛ Juda be ewura nɛ mbe benimuana m bɛta n yɔ Babilɔn be efuli so.

¹³ Babilɔn be ewurgboŋ na daŋ ta Juda be ewura be kanaŋ to be esa ko nna n shin nɛ e bɔ ntaŋ fanɛ e beeŋ baa nu a sa mo, nseŋ shin nɛ mo nɛ mo wora kɔnɔkoŋwule be ŋkre. Kumo be kaman nɛ e pɛ kade na be basa gboŋ n ti so n yɔ,

¹⁴ saŋɛ na so Juda be efuli so be basa nɛ b ka na beeŋ baa wɔ mbe kaseto a nu a sa mo nawule nsaa maaŋ naŋ tiŋ n nya eleŋ bumo gbagba be efuli na so kikɛ.

¹⁵ Ama ewura popɔr nɛ Babilɔn be ewurgboŋ lara na pal kaman n sa mo nseŋ shuŋi mbɔ Ijipt be efuli so a fin egbaŋɛ nɛ benapo damta. Fo tama fanɛ ewura ere beeŋ ji n lar kusɔ nɛ e bee wora ere to a? E maaŋ tiŋ n lar kɔnɔkoŋwule be ŋkre na kaman nsaa maŋ nya kumo be kasogberge!”

¹⁶ Kumo be kaman nɛ Enyɛnpetale Ebɔrɛ kaŋɛ le: “Ŋ ka baa la Enyɛnpetale Ebɔrɛ nɛ e bee sa ŋkpa ere bre, Juda be ewura ere beeŋ wu ashi Babilɔn be efuli so, ŋkpal e ka lar kɔnɔkoŋwule be ŋkre nɛ mo nɛ Babilɔn be ewurgboŋ kre na kaman so nseŋ wora n da mo gbagba be ntaŋ nɛ e bɔ na so so.

¹⁷ Fɛɛro nɛ e la Ijipt be ewurgboŋ na nɛ mbe benapo lempo kikɛ maaŋ tiŋ n chɛ Juda be basa to ŋ kɔ jemanɛ nɛ Babilɔn be basa beeŋ ba gbare eshishɛr n deŋi abar so m mata Jerusalɛm be egbal na a fin keluri kade na to ŋ kɔ m mɔ basa na.

¹⁸ Juda be ewura gbagba e wora n da mbe ntaŋ so nseŋ lar kɔnɔkoŋwule be ŋkre nɛ mo nɛ Babilɔn be ewurgboŋ kre na kaman, ŋkpal loŋ so, e beeŋ nya kasogberge.

¹⁹ Amoso kusɔ nɛ ma Enyɛnpetale Ebɔrɛ nɛ mee sa ŋkpa na kaŋɛ e la fanɛ meeŋ gberge Juda be ewura kusoe ŋkpal e ka wora n da mo gbagba be ntaŋ nɛ e bɔ so nseŋ lar kɔnɔkoŋwule be ŋkre na kaman so so.

²⁰ Kewora fanɛ kashewu nɛ n ta m pɛ mo nseŋ yɛr mo Babilɔn be efuli so n ya ji mo demu ndoŋ ŋkpal e ka maŋ ji kashenteŋ n sa ma so.

²¹ Mbe benapo kpakpaso kama nɛ baaŋ shile na beeŋ wu kena to nɛ bumo nɛ baaŋ ji efute na malɛ e pesaŋ to n sɔ kaplɛkama. Ndoŋ nɛ menyeeŋ pin fanɛ ma, Enyɛnpe Ebɔrɛ na e kaŋɛ na.”

Ebɔrɛ ka nase tama be kɔnɔ n sa Israɛl be asheŋ

²² Kusɔ nɛ Enyɛnpetale Ebɔrɛ na kaŋɛ nde: “Ŋ gbagba beeŋ ku kedibi nɛ baa tre sida na be keyabi n fɛa; keyabi popɔrbi nɛ meeŋ ku ashi kumo be awɔlto n ya fɛa kebee jeŋgreŋ so.

²³ Israɛl be kebee nɛ k du jeŋgreŋ ga na be awɔlto nɛ meeŋ fɛa kumo. Nɛ k daŋ n wora ayabi nseŋ sɔr asɔrso nseŋ ki sida be kedibi lela. Nɛ mbuibi be yiri kikɛ e ba tɔ asha kumo so; nseŋ nya edikpa kumo be ayabi so.

²⁴ Ndoŋ nɛ ndibi nɛ a wɔ kasawule na so beeŋ pin fanɛ ma, Enyɛnpe Ebɔrɛ na e naa ku ndibi tenteŋ a lɛ nsaa shin nɛ ndibi shiimbi bee daŋ nteŋ. Mee naa shin nɛ ndibi bumbuŋ bee wɔl nsaa shin nɛ ndibi wɔlso bee purge. Ma, Enyɛnpe Ebɔrɛ e malga na; ma alɛ beeŋ wora kusɔ nɛ ŋ kaŋɛ na kikɛ.”