Ezikɛl 16 - EBƆRƐ BE KAWƆL

Jerusalɛm ka maŋ ji kashenteŋ n sa Ebɔrɛ be asheŋ

¹ Nɛ Enyɛnpe Ebɔrɛ na kaŋɛ ma le:

² “Dimɛdi pibi, Ezikɛl, shin nɛ Jerusalɛm be basa e pin ekishisheŋ nɛ baa wora na be asheŋ,

³ nseŋ kaŋɛ bumo kusɔ nɛ ma, Enyɛnpetale Ebɔrɛ na bee kaŋɛ a laŋɛ Jerusalɛm be kaplɛa so na fanɛ Keenan be kasawule so nɛ b kurge fo nɛ fo tuto la Amɔri be esa nɛ fo nio malɛ la Hiti be esa.

⁴ Kachɛ nɛ b kurge fo, esa kikɛ maŋ ku fo enyaŋ, ŋko m bɛr fo nchu ŋko n wora nfɔl ŋ gbiti fo eyur so ŋko n ta wajɛ m buu fo so.

⁵ Esa kikɛ daa maŋ wu fo kuwɔr gba a bishi nɛ e bee wora fo asheŋ ere be kekama. Kachɛ nɛ b kurge fo gbagba na esa kikɛ maŋ nya kasha n sa fo. B ta fo nna n lɛ kupuŋ to.

⁶ Ndoŋ nna nɛ m bɔla ndoŋ a choŋ nseŋ wu fo nɛ fo dese fo gbagba be ŋklaŋ to a to aya to nɛ ŋ kaŋɛ fanɛ m maaŋ shin nɛ fo wu.

⁷ Kumo be kaman nɛ n ta fo n ya bela fo fanɛ kusɔ duuso popɔrbi na. Ndoŋ nna nɛ fo daŋ nɛnɛ ŋ ki suŋguru n nyalɛ kebita. Nɛ fo anyipo koso n yili fo kagbene to nɛ fo emin daŋ m ba buu fo abatimu so, ama nɛ fo kraa maa dela shɛŋ.

⁸ Ŋ ka naŋ ba wu fo nɛ m pin fanɛ naniere fo ki eche nna n loge na, nɛ n ta ŋ gbagba be kusɔbuuso m buu fo kayurkpaŋ so. Kumo be kaman nɛ n nase kɔnɔ n sa fo nseŋ bɔ ntaŋ fanɛ feeŋ baa la meya nɛ ma, Enyɛnpetale Ebɔrɛ na e baa keni fo so.

⁹ Kumo be kaman nɛ m bɛr fo nchu n fɔr fo ŋklaŋ na kikɛ nseŋ gbiti fo ɔlif be ŋku.

¹⁰ Kumo be kaman nɛ n ta kale nɛ b jɔɔ m buu fo nseŋ wɔtɔ fo asɔbɔya be kawɔl lela be asɛbta. Nseŋ naŋ sa fo chimu nɛ k bee nyɛkpɛso pɛlpɛl nɛ fo chɛ nɛ yawu kpakpaso be epiŋi.

¹¹ Ade kikɛ be kaman nɛ n sa fo enɔ to be mpinibi nɛ kubɔtoshembi

¹² nɛ kamuna to be kepinibi nɛ akonde nɛ kuwurwuro lela ga nɛ fo ta m buu fo kumu so.

¹³ Shuwa nɛ gbiti be abitasɔ nɛ fo daa wɔtɔ nsaa buu epiŋi nɛ b jɔɔ nɛ yawu kpakpaso be asɔbuuso. Nyifu lela nɛ fo daa ta a wora bodobodo nseŋ daa ji mushoŋ nɛ ɔlif be ŋku. Ŋkpal loŋ so, nɛ fo kebita lar nɛnɛ nɛ fo ki ewurche.

¹⁴ Ndoŋ nna nɛ fo asheŋ sɔ kaplɛkama nɛ ekama bee ji fo kebita be asheŋ ashi efuliana na kikɛ so, ŋkpal kananɛ ma, Enyɛnpetale Ebɔrɛ na shin nɛ fo kela lar nɛ ekama bee wu kumo so.

¹⁵ Ama fo shin nɛ fo kela na luri fo kumu to nɛ fo ki sakaleche nsaa ta fo kumu a sa enyɛn kama nɛ e kra fo a choŋ.

¹⁶ Fo alɛ lɔŋɛ agbirshuŋkpa nseŋ ta fo asɔbuuso na be ako n lɔŋɛ ndoŋ nsaa keta fo benyɛn a yɔ ndoŋ n ya kaa ji kesakalea. Le be asheŋ daa maŋ daga fanɛ a wora kikɛ.

¹⁷ Fo ta shuwa nɛ gbiti be abitasɔ nɛ n sa fo na n lɔŋɛ agbir nyɛnsoana nsaa yɔ amo ase n ya kaa ji kesakalea.

¹⁸ Fo alɛ ta epiŋi nɛ b jɔɔ nɛ n sa fo na a buu agbirana na nsaa ta ɔlif be ŋku nɛ duwu nɛ n sa fo na a lara sarga a sa amo.

¹⁹ Fo ta nyifu lela nɛ ɔlif be ŋku nɛ mushoŋ nɛ n sa fo fanɛ fo baa ji na n lara sarga n sa agbirana na a fin fanɛ fo asheŋ e par amo. Ma, Enyɛnpetale Ebɔrɛ na gbagba e wu k ka bee wora.

²⁰ Ade kikɛ be kaman, nɛ fo ta fo mbia nɛ fo kurge n sa ma na n lara sarga n sa agbirana na. Fo kubojua na nawule maŋ kukwe a?

²¹ Fo mɔ ma mbia n lara sarga n sa agbirana.

²² Fo ka pere kenishi a wora ekishisheŋ ere nsaa ji fo kubojua ere kikɛ na, fo teŋ fo kebia to so; jemanɛ nɛ fo daŋ delge so a dese ŋklaŋ to a to aya to na.

²³ To, ma Enyɛnpetale Ebɔrɛ na e kaŋɛ fanɛ kumu lubi gboŋgboŋi bee ba fo so! Asheŋ maaŋ nyalɛ n sa fo kikɛ. Fo ekar fo nna na! Asheŋ lubi nɛ fee wora ere kikɛ be kaman,

²⁴ fo kraa pɔr agbirshuŋkpaana a yili alɔnɛ so nna.

²⁵ Kubɔrbi kikɛ ase fo pɔr kegbirshuŋkpa n yili ndoŋ n ya kaa jija fo kela nsaa tu enyɛn kikɛ nɛ e bɔla ndoŋ a choŋ a ŋaba fo kumu.

²⁶ Fo tu Ijipt be efuli so be basa nɛ b pere kenishi a fin kananɛ baaŋ nya n di fo na n ji kubojua nɛ ma kagbene kaa ŋkpal loŋ so.

²⁷ Amoso nɛ ŋ gberge fo kusoe nseŋ shin nɛ ma nɛfa lar fo so nɛ Filisti be basa nɛ b la fo doŋana nɛ fo asheŋ bee nu bumo agbo na ba ku fo kasawule so.

²⁸ Ŋkpal benyɛn nɛ fo kɔ na ka maa kukwe fo so fo kra naŋ ya tu Asiriya be basa malɛ gba nna n ji kesakalea. Bumo alɛ gba maŋ kukwe fo.

²⁹ Kumo be kaman nɛ fo naŋ yɔ Babilɔn, nɛ k la eyawujipo be efuli na, malɛ gba nɛ fo kubojuaji na wora keshi n ti so. Ama amo kikɛ be kaman, fo kraa maŋ nya fo kepar.

³⁰ Amoso nɛ ma nɛ Enyɛnpetale Ebɔrɛ kaŋɛ fanɛ fo to fo kumu pasaa! Fo wora asheŋ ere kikɛ fanɛ sakaleche nɛ e paŋ anishinyɔr pasaa!

³¹ Fo daŋ pɔr mboŋ nɛ feeŋ baa shuŋ agbirana nsaa ji kubojua n yili kubɔrbi kikɛ ase nna. Ama mannɛ amansherbi so nɛ fo daa wora loŋ, ŋkpal manɛ so fo daa maa sɔ amansherbi.

³² Fo du fanɛ eche nɛ e bee sha kebaatu befɔ nna a ji kubojua a chɔ kebaa sha mo kul nawule.

³³ Sakaleche kikɛ bee sɔ amansherbi nna, ama fo ere e naa sa fo jipoana asɔ, a lɔlɔ bumo nɛ b baa shi kaplɛkama a ba m ba kaa di fo.

³⁴ Fo ere be kubojuaji na baa kɔr bekama peya to nna. Benyɛn maa kɔ a fin fo, ama fo ere e naa fin bumo nsaa ka bumo kukɔ gba kuraa.”

Ebɔrɛ ka ji Jerusalɛm demu be asheŋ

³⁵ Amoso Jerusalɛm, nu kusɔ Enyɛnpe Ebɔrɛ na bee kaŋɛ fo, sakaleche ere!

³⁶ Fo ka delge fo kumu so fanɛ sakaleche nseŋ ta fo kumu n sa fo jipoana nseŋ mɔ fo mbia n lara esarga n sa agbirana nɛ ŋ kishi amo be asheŋ ga na so,

³⁷ meeŋ gama fo jipoana nɛ fee sha nɛ bumo nɛ fo kishi kikɛ abar so. Nseŋ shin nɛ b yili ŋ kulti fo nɛ n delge fo so bumo kikɛ be anishito nɛ b wu fo kayurkpaŋ.

³⁸ Kejimbri be kasogberge beeŋ ba fo so ŋkpal kubojuaji nɛ basa be kemɔ so. Meeŋ nya agbo ga nseŋ ta luwu ŋ gberge fo kusoe.

³⁹ Kumo be kaman, meeŋ shin nɛ fo jipoana e bure m bure mboŋ nɛ fee ji kesakalea na nsaa shuŋ agbirana na kikɛ. Baaŋ suge fo asɔbuuso nɛ abitasɔ na kikɛ ŋ ka fo kayurkpaŋ nɛ enɔfuloŋ.

⁴⁰ “Bumo alɛ beeŋ naŋ we n wɔtɔ jimaŋ nɛ b kpa fo ajembu m mɔ. Kumo be kaman nɛ b ta etokobi ŋ ŋele fo to fanɛ mblaŋkul nseŋ chɔɔ fo nwu.

⁴¹ Meeŋ wora loŋ ashi beche damta be anishito nɛ fo kubojuaji e fo ekar nɛ fo jipoana maaŋ naaŋ nya ŋkɛ ashi fo kutɔ.

⁴² Aloŋ nɛ ma agbo beeŋ wushi nɛ ma kagbene e dese ma nɛ m maaŋ naŋ nya agbo ŋko ŋ kɔ kukɔrkɔ.

⁴³ Fo teŋ so kananɛ ŋ keta fo jemanɛ nɛ fo daa la kebia fɔlbi na nna nseŋ wora ekishisheŋ nɛ agbo pɛ ma ga. Fo daŋ wora amo nɛ a chɔ loŋ gba nseŋ ki sakaleche gba kuraa. Fo daga kasogberge!” Ma, Enyɛnpe Ebɔrɛ e kaŋɛ na.

Ebiche ka du fanɛ kananɛ mo nio du be asheŋ

⁴⁴ Ade kikɛ be kaman, nɛ Enyɛnpe Ebɔrɛ na naŋ kaŋɛ: “Basa beeŋ baa bɔ keŋasa ere a laŋɛ fo, Jerusalɛm be kaplɛa fanɛ kananɛ enio be da baa du, aloŋ nɛ mo pibiche gba be da du.

⁴⁵ Fo baa du fanɛ fo nio gbagba nna. Mo e kishi mo kul nɛ mbe mbia na. Fo alɛ baa naa du fanɛ fo kurgepo chesoana nna. Bumo alɛ gba kishi bumo kulana nɛ mbia na. Fo nio daa la Hiti be esa nna nɛ fo tuto malɛ daa la Amɔri be esa.

⁴⁶ Fo dacheso e la kadegboŋ nɛ baa tre Samɛria na, nɛ kumo nɛ kumo be ndekarso wɔ a laŋɛ fo kelargato be esoso na. Nɛ fo sipocheso malɛ la kadegboŋ nɛ baa tre Sodɔm na, nɛ kumo alɛ nɛ kumo be ndekarso wɔ a laŋɛ fo kelargato be kaseto na.

⁴⁷ Fo baa maŋ kute bumo be kebaawɔtɔ to nna n wora ekishisheŋ nɛ b wora na nawule, ama fo wora amo nɛ a chɔ bumo peya na gba kuraa.”

⁴⁸ Kede be kaman nɛ Enyɛnpetale Ebɔrɛ na naŋ kaŋɛ: “Kashenteŋ nɛ mee kaŋɛ fo, Jerusalɛm na, fanɛ fo sipocheso Sodɔm nɛ kumo be nde kreso to be basa kikɛ maŋ wora asheŋ lubi n fo amo nɛ fo nɛ fo ndekarso to be basa wora so.

⁴⁹ Sodɔm nɛ kumo be ndekarso to be basa daa wu bumo be amu nna ŋkpal b kaa kɔ ajibi damta a ji nseŋ naa wɔ kayurwushi to so. B daa maa keni betirpo nɛ basa nɛ asheŋ maa nyalɛ a sa na so.

⁵⁰ B daŋ kpeŋ nna nsaa wu bumo be amu nseŋ daŋ naa wora ma ekishisheŋ. Amoso nɛ n daŋ mur bumo fanɛ kananɛ fo nyi geeŋ na.

⁵¹ Samɛria to be basa bre daŋ maŋ wora asheŋ lubi nɛ fo basa wora ere be barga to gba. Fo basa wora asheŋ keshiso a chɔ bumo be basa, n shin nɛ k wora fanɛ fo kurgepoana na be basa la basa lela a chɔ fo basa.

⁵² To, naniere e daga fanɛ fo nya fo ŋaba. Ŋkpal fo basa be asheŋ lubi ka shi a chɔ fo kurgepoana be basa peya so, kewora fanɛ b la basa lela a chɔ fo basa.”

⁵³ Kumo be kaman nɛ Enyɛnpe Ebɔrɛ naŋ kaŋɛ Jerusalɛm to be basa le: “Meeŋ naŋ nɛfa Sodɔm nɛ Samɛria nɛ amo be nde kresoana kikɛ to be basa. Ma alɛ beeŋ nɛfa fo alɛ gba be basa ashi Jerusalɛm to,

⁵⁴ saŋɛ na so nyɔmɔ beeŋ pɛ fo basa ŋkpal bumo be asheŋ wora so ka shin nɛ Sodɔm nɛ Samɛria kikɛ to be basa duli basa lela a chɔ bumo so.

⁵⁵ Kachɛ na kaŋ fo, asheŋ beeŋ naŋ nyalɛ n sa fo basa nɛ Sodɔm nɛ Samɛria kikɛ be basa nɛ ndekarsoana na kikɛ to be basa nɛ ekama e bɛta n yɔ kakpa nɛ e daa wɔ dra na.

⁵⁶ Fo, Jerusalɛm, daa wora Sodɔm eyur to nna jemanɛ nɛ fo daa wu fo kumu na,

⁵⁷ kumo be pɔɛŋ nɛ ekama wu fo da lubi na. Naniere fo ki kemɔmɔshia be kusɔ nna n sa Edɔmebi nɛ Filistiebi nɛ efuliana nɛ a kulti fo na kikɛ nɛ baa keni fo jiga.

⁵⁸ Ma, Enyɛnpe Ebɔrɛ e kaŋɛ na, fanɛ, feeŋ ji awurfoŋ ŋkpal asheŋ jiga nɛ asheŋ lubi nɛ fo wora na kikɛ so.”

⁵⁹ Nɛ Enyɛnpe Ebɔrɛ naŋ kaŋɛ: “Meeŋ gberge fo, Jerusalɛm, kusoe ŋkpal fo ka kplaŋ ntaŋ nɛ fo bɔ na so nseŋ jija ma nɛ fo kɔnɔkoŋwule be ŋkre na so.

⁶⁰ Ama ma ere beeŋ wora m bɔlɔ kɔnɔkoŋwule be ŋkre nɛ ma nɛ fo kre fo kebia to kikɛ na so nseŋ naŋ shin nɛ ma nɛ fo e wora kɔnɔkoŋwule be ŋkre nɛ k beeŋ baa wɔtɔ mbaanaayɔ.

⁶¹ Aloŋ nɛ feeŋ nyiŋi asheŋ lubi nɛ fo wora na nɛ nyɔmɔ e pɛ fo jemanɛ nɛ meeŋ shin nɛ fo kurgepoana, Sodɔm nɛ Samɛria, e naŋ bɛta m ba ki fo mbia na, ama mannɛ a loŋ e daa la ma nɛ fo be kɔnɔkoŋwule be ŋkre na.

⁶² To, ma nɛ fo beeŋ naŋ wora kɔnɔkoŋwule be ŋkre nɛ fo pin fanɛ ma e la Enyɛnpe na.

⁶³ Meeŋ ta fo alubi m paŋ fo, ama feeŋ baa nyiŋi amo nɛ nyɔmɔ e pɛ fo nɛ fo maaŋ naŋ tiŋ m bugi kɔnɔ. Ma, Enyɛnpetale Ebɔrɛ e kaŋɛ na.”