Ezikɛl 15 - EBƆRƐ BE KAWƆL

B ka ta Jerusalɛm m ber kefeelebi jiga be asheŋ

¹ Nɛ Enyɛnpe Ebɔrɛ na kaŋɛ ma le:

² “Dimɛdi pibi, Ezikɛl, nuso nɛ baa ta kefeelebi a ber kedibi? Kefeelebi be keyabi nɛ kupuŋ to be kedibi be keyabi be kumo e kɔ tɔnɔ?

³ Esa beeŋ tiŋ ŋ ku kefeelebi be keyabi n wora kusɔ ko a? Esa beeŋ tiŋ ŋ ku kumo n shɛl keyir ŋ gbir a ta asɔ a shiga so a?

⁴ K baa walɛ nna n sa kebaa puga edɛ. Nɛ kumo be mba anyɔ nɛ nferinto kikɛ ji edɛ, esa maaŋ naŋ tiŋ n ta kumo n wora shɛŋ.

⁵ K ka daa maŋ chɔɔ gba k daa maa kɔ tɔnɔ. K ka chɔɔ bre nɛ k beeŋ baa kɔ tɔnɔ a?”

⁶ “To, kusɔ nɛ Enyɛnpetale Ebɔrɛ na bee kaŋɛ e la fanɛ, kananɛ m baa ta kefeelebi be keyabi kupuŋ to a wɔtɔ edɛ to nɛ k bee chɔɔ na aloŋ nɛ meeŋ ta edɛ

⁷ ŋ gberge basa nɛ b wɔ Jerusalɛm to kusoe. B tiŋ n luri edɛ ko to n lar, ama edɛ malɛ kraa beeŋ chɔɔ bumo m mur. Ŋ kaŋ gberge bumo kusoe na nɛ fo, Ezikɛl, beeŋ pin fanɛ ma e la Enyɛnpe Ebɔrɛ na.

⁸ B ka maŋ ji kashenteŋ n sa ma so, meeŋ shin nɛ efuli na a ki kasawule fuloŋ a dese jiga. Ma, Enyɛnpetale Ebɔrɛ e kaŋɛ na.”