Ezikɛl 14 - EBƆRƐ BE KAWƆL

Ebɔrɛ ka malga ŋ gbiti kagbirshuŋ be asheŋ

¹ Kachako nɛ Israɛl be benimuana na be beko ba chena ma anishi to a fin kubɔya nɛ k shi Enyɛnpe Ebɔrɛ na kutɔ.

² Ndoŋ nna nɛ Enyɛnpe Ebɔrɛ na kaŋɛ ma le:

³ “Dimɛdi pibi, Ezikɛl, basa ere ta bumo be ŋgbene nna n wɔtɔ kagbirshuŋ to n shin nɛ k bee yɛr bumo kulubi to. A daga ŋ ka tuge bumo a?

⁴ Amoso kaŋɛ bumo kusɔ nɛ ma Enyɛnpetale Ebɔrɛ na kaŋɛ. Kumo e la fanɛ Israɛl be esa kikɛ nɛ e ta mbe kagbene n wɔtɔ kagbirshuŋ to nseŋ shin nɛ k yɛr mo kulubi to, kumo be kaman nɛ e yɔ anebi kutɔ n ya kaa fin e nu ma kɔnɔ to be kamalga, ma Enyɛnpe Ebɔrɛ na beeŋ sa mo kubɔya nɛ k daga mo.

⁵ Loŋ e naŋ shin nɛ Israɛl be basa nɛ b kini ma nseŋ ta bumo be ŋgbene n wɔtɔ kagbirshuŋ to na e kini agbirana na nseŋ bɛta m ba ma kutɔ.

⁶ Amoso, Ezikɛl, kaŋɛ Israɛl be basa na kikɛ kusɔ nɛ ma Enyɛnpetale Ebɔrɛ na kaŋɛ. Kumo e la fanɛ b tuba nseŋ yige bumo be agbirana nɛ amo be asheŋ bee nu agbo nɛ menyi be ekishisheŋ na!

⁷ Nɛ fanɛ Israɛl be esa ko ŋko efɔ ko nɛ e wɔ Israɛl be efuli so kini ma nseŋ ya kaa shuŋ agbir, kumo be kaman nɛ e yɔ anebi kutɔ n ya kaa fin ma kɔnɔ to be kamalga be kenu, ma Enyɛnpe Ebɔrɛ gbagba e naŋ tuge mo.

⁸ M maaŋ sa mo kashuli. Ma alɛ beeŋ gberge mo kusoe nɛ k baa la kefiɛso n sa ekama nɛ e daa fɛ kewora kusɔ nɛ e wora na. Kumo be kaman nɛ n lara mo ashi ma basa to saŋɛ na so nɛ men pin fanɛ ma e la Enyɛnpe Ebɔrɛ na.”

Demuji nɛ k maŋ kɔ ŋgelge na be asheŋ

⁹ “Nɛ fanɛ anebi ko sa efɛ be kubɔya, ma Enyɛnpe Ebɔrɛ na e sa anebi na ekpa nɛ e ku efɛ. Ama ma alɛ kraa beeŋ kini anebi na nseŋ lara mo ashi ma basa Israɛlebi to.

¹⁰ Anebi na nɛ esa nɛ e yɔ mo kutɔ n ya bishi so na kikɛ beeŋ nya kasogberge koŋwule.

¹¹ Meeŋ wora loŋ, saŋɛ na so, Israɛl be basa na maaŋ kini ma nseŋ ta bumo be amu n ya wɔtɔ asheŋ lubiana to. Baaŋ baa la ma basa, nɛ ma alɛ e baa la bumo be Ebɔrɛ.” Ma, Enyɛnpetale Ebɔrɛ e kaŋɛ na.

Efuli lubi be demuji be asheŋ

¹² Ade be kaman, nɛ Enyɛnpe Ebɔrɛ na naŋ kaŋɛ ma le:

¹³ “Dimɛdi pibi, nɛ efuli ko so be basa wora alubi n da ma so nsaa maŋ ji kashenteŋ n sa ma, nɛ n shin nɛ bumo be adɔjibi jija nɛ akoŋ tɔr m mɔ basa na nɛ bumo be asɔbɔya kikɛ,

¹⁴ hale nɛ Nowa nɛ Danɛl nɛ Job, gba daŋ ti bumo so, bumo be alelasheŋ daa beeŋ tiŋ m mɔlga bumo gbagba nawule nna ama mannɛ basa na kikɛ.” Ma, Enyɛnpetale Ebɔrɛ e kaŋɛ na.

¹⁵ “Ŋko nɛ n shin nɛ asɔbɔya lubi yɔ efuli na so n ya mɔ kumo so be basa nna nɛ kasawule na ki kakpa ŋana so n sa bekama nɛ baa bɔla ndoŋ a choŋ ŋkpal asɔbɔya lubi na so,

¹⁶ kashenteŋ nɛ ma, Enyɛnpetale Ebɔrɛ bee kaŋɛ menyi na fanɛ nɛ basa asa ere, Nowa nɛ Danɛl nɛ Job, gba daa wɔ efuli na so, b daa maaŋ tiŋ m mɔlga bumo be mbia gba. Bumo gbagba nawule e daa beeŋ nya kumɔlga nɛ kasawule na e ki kakpa fuloŋ a dese.

¹⁷ Ŋko nɛ fanɛ n shin nɛ bedoŋ kre kena n ya kɔ efuli nɛ kumo so be basa wora alubi nseŋ mɔ basa na nɛ bumo be asɔbɔya kikɛ gba,

¹⁸ kashenteŋ nɛ ma, Enyɛnpetale Ebɔrɛ bee kaŋɛ menyi na fanɛ nɛ basa asa na daa wɔ efuli na so gba, b daa maaŋ tiŋ m mɔlga bumo be mbia gba, ama bumo gbagba nawule e daa beeŋ nya kumɔlga.

¹⁹ Ŋko nɛ fanɛ n nya agbo nna nseŋ shin nɛ kulɔ mɔso tɔr efuli na so a mɔ basa nɛ asɔbɔya kikɛ,

²⁰ ma, Enyɛnpetale Ebɔrɛ na bee kaŋɛ kashenteŋto na fanɛ, nɛ Nowa nɛ Danɛl nɛ Job gba daa wɔ efuli na so, b daa maaŋ tiŋ m mɔlga bumo be mbia. Bumo gbagba nawule e daa beeŋ nya kumɔlga ŋkpal bumo be alelasheŋ so.”

²¹ Ŋkpal ade kikɛ so, kusɔ nɛ ma Enyɛnpetale Ebɔrɛ na bee kaŋɛ e la fanɛ ekpa nɛ meeŋ bɔla kumo so ŋ gberge Jerusalɛm to be basa kusoe kenishipere so nde: “Meeŋ shin nɛ kena nɛ akoŋgboŋ nɛ asɔbɔya lubi nɛ kulɔ mɔso e ba mɔ basa nɛ asɔbɔya kikɛ.

²² Nɛ esa ko kaŋ ji efute nseŋ mɔlga mbe mbia gba, baaŋ bar bumo Babilɔn be efuli so. Ezikɛl, nɛ fo wu kebaawɔtɔ lubi nɛ fo be basa kɔ na nɛ feeŋ pin kusɔ nɛ k ba nɛ m mur Jerusalɛm to be basa.

²³ Ndoŋ nɛ feeŋ pin geeŋ fanɛ ŋ kɔ ekpa nɛ n wora kusɔ nɛ n wora na.” Ma, Enyɛnpetale Ebɔrɛ na e kaŋɛ na.