Ezikɛl 13 - EBƆRƐ BE KAWƆL

B ka malga ŋ gbiti anebi fɛpoana be atre be asheŋ

¹ Ndoŋ nna nɛ Enyɛnpe Ebɔrɛ na kaŋɛ ma:

² “Dimɛdi pibi, malga ŋ gbiti Israɛl to be anebiana nɛ baa ta bumo gbagba be mmalga fanɛ kewuŋkaŋɛ na nɛ ekama e pin. Kaŋɛ bumo fanɛ b baa kaŋ kusoe a nu Enyɛnpe Ebɔrɛ na be kubɔya.”

³ Kusɔ nɛ Enyɛnpetale Ebɔrɛ na bee kaŋɛ nde: “Asheŋ maaŋ nyalɛ n sa anebi fɛpoana na. B maa ku ebɔrɛdare. Bumo gbagba be abɔya nɛ baa malga!

⁴ Israɛl to be anebiana du fanɛ ejiŋkaamu nɛ e wɔ kadegboŋ nɛ k bure a dese to a fin kusɔ nɛ baaŋ ji nna.

⁵ B maa kpele basa na kusoe a laŋɛ tɔrɔ nɛ k bee ba ŋko a kaŋɛ bumo kananɛ kewora n da ma so beeŋ tiŋ n shin nɛ b wu be asheŋ.

⁶ Bumo be ebɔrɛdare nɛ baa ku na kikɛ maŋ la kashenteŋ. Bumo be asheŋ nɛ baa kaŋɛ fanɛ a beeŋ wora na kikɛ la efɛ nna. Baa kaŋɛ nna fanɛ ma kubɔya nɛ baa malga, ama ma alɛ maaŋ shuŋi bumo. Amo nɛ amo kikɛ, baa sha fanɛ bumo be mmalga e baa la kashenteŋ nna.

⁷ Amoso nɛ ŋ kaŋɛ bumo na fanɛ, ebɔrɛdare nɛ baa ku na maaŋ la kashenteŋ na. Asheŋ nɛ baa kaŋɛ fanɛ a beeŋ wora na malɛ la efɛ nna. Baa kaŋɛ fanɛ ma mmalga nna, ama ma alɛ maaŋ malga bumo kutɔ.”

⁸ To, kusɔ nɛ Enyɛnpetale Ebɔrɛ na kaŋɛ bumo nde: “Menyi be mmalga la kafule nna nɛ menyi be ebɔrɛdare malɛ la efɛ. Amoso m maaŋ yige menyi kikɛ.

⁹ Meeŋ gberge menyi anebiana nɛ menyee ku efɛ be ebɔrɛdare nseŋ naa fule a kpal a malga asheŋ na kusoe. Menyi maŋ naŋ ti ma basa so, menyi alɛ be atre maŋ ti Israɛl be basa be atre so. Menyi maaŋ naŋ bɛta n yɔ menyi be kasawule so. Ndoŋ nɛ menyeeŋ pin fanɛ ma e la Enyɛnpetale Ebɔrɛ na.

¹⁰ Anebiana na bee fule a kaŋɛ ma basa nna fanɛ kayurwushi bee ba, jemanɛ nɛ kayurwushi maŋ wɔtɔ. Ma basa pɔr egbal pɔso, nɛ anebiana na ta asɔ nyɔɔso fuful n nyɔɔ egbalana na.

¹¹ Kaŋɛ anebiana na fanɛ bumo be egbal na beeŋ tɔr. Abɔrɛjembubi beeŋ tɔr kumo so nɛ afugboŋ e ber kumo so

¹² nɛ k tɔr nɛ ekama e bishi menyi fanɛ asɔ fuful nɛ men ta n nyɔɔ egbal na be tɔnɔ e la manɛ?”

¹³ To, egbal na e la Jerusalɛm be kadegboŋ na. Kusɔ nɛ ma, Enyɛnpetale Ebɔrɛ na kaŋɛ nde: “Meeŋ kaa agbo ga n shin nɛ afugboŋ nɛ bɔrɛgboŋ nɛ abɔrɛjembubi a bure egbal na.

¹⁴ Mee kre kebure egbal nɛ men nyɔɔ n fuli na nɛ k bure cheche n tɔr nɛ kumo be gbaltɔlase nawule e ka a dese. Egbal na beeŋ tɔr menyi so m mɔ menyi kikɛ. Ndoŋ nɛ menyeeŋ pin fanɛ ma e la Enyɛnpe Ebɔrɛ na.

¹⁵ Meeŋ shin nɛ ma agbogboŋ e gbelge egbal na nɛ basa nɛ b nyɔ kumo nɛ k fuli na kikɛ so. Saŋɛ na so nɛ ŋ kaŋɛ menyi fanɛ egbal na tɔr nɛ bumo nɛ b nyɔ kumo nɛ k fuli na kikɛ wu.

¹⁶ Israɛl be anebiana nɛ b ku ebɔrɛdare nseŋ wu ŋ kaŋɛ fanɛ kayurwushi wɔ Jerusalɛm to jemanɛ nɛ kayurwushi maaŋ wɔ kumo to na nɛ n de na. Ma, Enyɛnpetale Ebɔrɛ na e kaŋɛ na.”

¹⁷ Ade be kaman nɛ Enyɛnpe Ebɔrɛ na naŋ kaŋɛ ma: “Naniere, dimɛdi pibi, kilgi fo anishi n yuu Israɛl be beche nɛ baa bɔla bumo gbagba be aparsheŋ so a wu asheŋ a kaŋɛ na so. Malga ŋ gbiti bumo

¹⁸ nseŋ kaŋɛ bumo kusɔ nɛ Enyɛnpetale Ebɔrɛ na bee kaŋɛ bumo. Asheŋ maaŋ nyalɛ n sa menyi beche. Menyee bɔla ŋkilgi be ekpa so nna a wora adur a wɔtɔ ebaŋɛ nɛ echimu to a sa ekama nɛ baa ta a chɛ amu so ŋko a wɔtɔ enɔ to, saŋɛ na so menyeeŋ nya eleŋ basa be ŋkpa so. Menyee sha fanɛ menyi e baa kɔ ŋkpa nɛ luwu be eleŋ ma basa so nseŋ ta eleŋ na a wora asɔ nɛ menyee sha.

¹⁹ Men keni ma jiga ma basa be anishito, ŋkpal shiŋkafa nɛ ajibi gbrɛbi nɛ menyeeŋ nya so. Ma basa kaa bee nu efɛ so, men bɔla efɛ so m mɔ basa nɛ b daŋ maŋ daga luwu nseŋ shin nɛ bumo nɛ b daga luwu bre ji efute.”

²⁰ Amoso kusɔ nɛ Enyɛnpetale Ebɔrɛ na kaŋɛ nde: “Ŋ kishi menyi be ŋkilgi be adur be ebaŋɛ nɛ menyee bɔla so a fule ma basa nɛ baa yirda menyi be efɛsheŋ na ga. Ma alɛ beeŋ gberge amo n tuge ashi menyi be mbre so nseŋ shin nɛ basa nɛ men fule m pɛ fanɛ mbuibi na e nya bumo be amu.

²¹ Meeŋ kpɛa menyi be echimu na to nɛ ma basa e nya bumo be amu ashi menyi be eleŋ to. Ndoŋ nɛ menyeeŋ pin fanɛ ma, e la Enyɛnpe Ebɔrɛ na.

²² Men bɔla efɛ so n shin nɛ basa lela nɛ m maŋ kre ketɔrɔ bumo pɔ aba nseŋ kuŋ basa lubi ekpa nɛ b maŋ lar bumo be asheŋ lubi to m mɔlga bumo be amu.

²³ Amoso menyi be efɛ be ebɔrɛdare nɛ kafule be ŋkpal na kikɛ fo ekar. Meeŋ mɔlga ma basa ashi men be eleŋ to nɛ men pin fanɛ ma e la Enyɛnpe Ebɔrɛ na.”