Ezikɛl 12 - EBƆRƐ BE KAWƆL

B ka beeŋ pɛ Israɛlebi n yɔ efuli pɔtɛ so be tɔɔnɛ be asheŋ

¹ Ndoŋ nna nɛ Enyɛnpe Ebɔrɛ na naaŋ kaŋɛ ma:

² “Dimɛdi pibi, Ezikɛl, fo nɛ basa nɛ b pal kaman n sa ma e wɔtɔ. B kɔ anishi, bumo alɛ kini kewu asɔ nɛ mee ŋini bumo. B kɔ asoe, bumo alɛ kini kenu ma mmalga. Ŋkpal manɛ so b pal kaman nna n sa ma.

³ Amoso, dimɛdi pibi, bela fo adiiku nseŋ wora fanɛ b ka nyaŋ fo a yɔ efuli pɔtɛ wɔfɔ so. Wora le pɔɛŋ nɛ epeŋi e tɔr. Kumo be kaman nɛ fo yɔ kakpa nɛ ekama beeŋ wu fo n ya kaa nite a yɔ a ba. B kaŋ wu fo kaa bee wora loŋ, ashere baaŋ pin fanɛ b la basa nɛ b pal kaman n sa ma nna.

⁴ Fo kaŋ wora ade kikɛ n loge nɛ fo bɛta n yɔ fo laŋ to. Kaaseso kaŋ fo nɛ fo wora shiriya fanɛ feeŋ yɔ efuli pɔtɛ wɔfɔ.

⁵ Futi fo kowu be egbal jemanɛ nɛ baa keni fo n ta fo adiiku m bɔla kumo to m bɔl.

⁶ Shin nɛ b baa keni fo nɛ fo ta fo adiiku na n di keba nseŋ ta kusɔ m buu fo anishi so n lar n luri tentembiri to a yɔ, saŋɛ na so fo maaŋ wu m pin kakpa nɛ fee yɔ na. Kusɔ nɛ feeŋ wora na beeŋ baa la kusoe kpele n sa Israɛl be basa na.”

⁷ Nɛ n wora kananɛ Enyɛnpe Ebɔrɛ kaŋɛ ma na. Epeŋi ka ya ka tɔr nɛ m bela ma adiiku nseŋ wora keyɔ efuli pɔtɛ so be shiriya. Kaase ka fo nɛ n ta enɔ ŋ kur n futi ma laŋ to be egbal nseŋ ta ma adiiku n di keba m bɔla ndoŋ n lar jemanɛ nɛ ekama bee keni ma na n choŋ.

⁸ Kaarɛ ka chɛ kachipurso nɛ Enyɛnpe Ebɔrɛ na naŋ kaŋɛ ma:

⁹ “Dimɛdi pibi, Israɛl be basa nɛ b pal kaman n sa ma na maŋ bishi fo kusɔ nɛ fo daa wora a?

¹⁰ To, ya kaŋɛ bumo fanɛ kusɔ nɛ Enyɛnpetale Ebɔrɛ na kaŋɛ nde: ‘Kubɔya ere bee yɔ ejuŋkparpo nɛ e wɔ Jerusalɛm to na nɛ Israɛl be basa nɛ b wɔ ndoŋ na kikɛ nna.

¹¹ Kaŋɛ bumo fanɛ kusɔ nɛ fo wora n ŋini bumo na la tɔɔnɛ nna a ŋini kusɔ nɛ k beeŋ wora bumo echefoso. Kusɔ nɛ n wora ere e naaŋ tu menyi echefoso. Baaŋ pɛ menyi n tintiŋ menyi n yɔ efuli pɔtɛana so.

¹² Jerusalɛm be ejuŋkparpo na gbagba beeŋ shin nɛ b futi egbal n sa mo kaaseso belebela nɛ e bɔla kumo to n m bɔl n ta mbe adiiku n di keba a yɔ. E beeŋ ta kusɔ m buu mbe anishi so saŋɛ na so e maaŋ wu kasawule nɛ e bee yige a shile na.

¹³ Ma, Enyɛnpe Ebɔrɛ na beeŋ to kashewu m pɛ mo jemanɛ nɛ e bee lar Jerusalɛm to a shile na nseŋ yɛr mo kadegboŋ nɛ baa tre Babilɔn na to, ama e maaŋ wu kadegboŋ na kenishiso hale nɛ e ya wu ndoŋ.

¹⁴ Ma alɛ beeŋ shin nɛ mbe benimuana nɛ mbe benapo nɛ b wɔ Jerusalɛm to na e pesaŋ to n sɔ kaplɛkama nɛ basa e bɛ so n fin bumo mɔ.

¹⁵ Ŋ kaŋ shin nɛ bumo nɛ b ka na pesaŋ to n yɔ efuli pɔtɛ wɔfɔ so na nɛ baaŋ pin fanɛ ma, e la Enyɛnpe Ebɔrɛ na.

¹⁶ Ama meeŋ shin nɛ bumo be gbrɛbi ko e ji efute ashi kena nɛ akoŋ nɛ alɔ na to, saŋɛ na so baaŋ pin kananɛ bumo be ekishisheŋ nɛ b wora na be asheŋ daŋ nu ma agbo ga, nseŋ naŋ pin fanɛ ma e la Enyɛnpe Ebɔrɛ na nseŋ shuŋ ma ashi efuli pɔtɛana na so.’ ”

¹⁷ Ade be kaman nɛ Enyɛnpe Ebɔrɛ na naŋ kaŋɛ ma le:

¹⁸ “Dimɛdi pibi, baa chicha jemanɛ nɛ fee ji ajibi nseŋ shin nɛ kufu e baa kɔ fo jemanɛ nɛ fee nuu nchu.

¹⁹ Kaŋɛ Israɛl be basa na fanɛ kusɔ nɛ Enyɛnpetale Ebɔrɛ na bee kaŋɛ a sa Jerusalɛm to be basa nɛ b kra wɔ Israɛl be efuli so na e la fanɛ, baaŋ baa ji bumo be ajibi nɛ kafɔŋ nna nsaa nuu bumo nchu malɛ kufuso, ŋkpal manɛ so, bumo be efuli na nɛ kumo so be asɔ kikɛ beeŋ mur n dese fuloŋ ŋkpal bumo be amu kpakpaso nɛ asheŋ lubi so.

²⁰ Ndegboŋ nɛ basa bɔlɔ amo to naniere kikɛ beeŋ mur nɛ efuli na kikɛ e ki kasawule a dese loŋ nɛ esa kikɛ maŋ wɔ kumo so. Ndoŋ nɛ baaŋ pin fanɛ ma e la Enyɛnpe Ebɔrɛ na.”

²¹ Nɛ Enyɛnpe Ebɔrɛ na naŋ kaŋɛ ma le:

²² “Dimɛdi pibi, manɛ so nɛ Israɛl be basa bee kaa kaŋɛ keŋasa ere: ‘Nchɛ na bee choŋ, nɛ kewuŋkaŋɛ malɛ maa wora a bɔlɔ so!’

²³ To, kaŋɛ bumo kusɔ nɛ ma, Enyɛnpetale Ebɔrɛ na kɔ a kaŋɛ a laŋɛ kumo be kaplɛa so. Meeŋ shin nɛ keŋasa na e ba ekar nɛ b maaŋ naa bɔ kumo ashi Israɛl be efuli so. K maŋ chɛr nɛ kusɔ kama nɛ ŋ kaŋɛ kikɛ e wora m bɔlɔ so.

²⁴ Ŋkpal manɛ so, efɛ be ebɔrɛdare ŋko kafule be kewuŋkaŋɛ maaŋ naa wɔ Israɛl be basa to kikɛ.

²⁵ Ma, Enyɛnpe Ebɔrɛ na e naŋ malga n sa bumo nɛ kusɔ nɛ meeŋ kaŋɛ na a wora. Menyi basa nɛ men pal kaman n sa ma ere bre be jemanɛ to, meeŋ wora kusɔ kama nɛ ŋ kpele menyi kumo be kusoe fanɛ meeŋ wora na. Ma, Enyɛnpetale Ebɔrɛ e kaŋɛ na.”

²⁶ Ndoŋ nna nɛ Enyɛnpe Ebɔrɛ na naŋ kaŋɛ ma le:

²⁷ “Dimɛdi pibi, Israɛl be basa na bee fɛ nna fanɛ, fo ebɔrɛdare na nɛ kewuŋkaŋɛ na la echefoso be asheŋ nna.

²⁸ Amoso kaŋɛ bumo kusɔ nɛ ma, Enyɛnpetale Ebɔrɛ na bee kaŋɛ. Ma mmalga ere be kekama maaŋ chɛr nseŋ wora m bɔlɔ so. Kusɔ kama nɛ ŋ kaŋɛ beeŋ wora m bɔlɔ so. Ma, Enyɛnpetale Ebɔrɛ e kaŋɛ na.”