Ezikɛl 11 - EBƆRƐ BE KAWƆL

Demuji ka ba Israɛlebi be benimu so be asheŋ

¹ Ade kikɛ be kaman, nɛ Ebɔrɛ be Kiyoyu ta ma m ba Enyɛnpe Ebɔrɛ na be bɔrɛlambu na be kabuna nɛ k shoŋi epeŋilarkpa be kaba so na ase nɛ n wu benyɛn adunyɔ nɛ anu ko nɛ efuli na be bejuŋkparpo anyɔ ti bumo so. Bumo e la kanyɛn nɛ baa tre Jaazania nɛ e la Azzu pibinyɛn na nɛ emo nɛ baa tre Pɛlatiya nɛ mo alɛ la Bɛnaya pibinyɛn na.

² Ndoŋ nna nɛ Enyɛnpe Ebɔrɛ na kaŋɛ ma le: “Dimɛdi pibi, Ezikɛl, basa ere bee kre kulubi nsaa sa Jerusalɛm to be basa kasotoji lubi nna na.

³ Le nɛ kaa kaŋɛ: ‘K maaŋ chɛr nɛ an naa pɔr nwu. Kadegboŋ ere du fanɛ kapuliya nna a bɛ edɛ so nɛ anyi alɛ du fanɛ eblaŋ a wɔ kumo to, ama kanaŋkama nɛ asheŋ du k bee kuŋ anyi nɛ anyi maŋ wɔ edɛ to gbagba.’

⁴ Amoso, dimɛdi pibi, malga ŋ gbiti bumo.”

⁵ Kumo be kaman nɛ Enyɛnpe Ebɔrɛ na be Kiyoyu kaŋɛ ma fanɛ Enyɛnpe Ebɔrɛ na yɛ: “Israɛl be basa, n nyi kusɔ nɛ menyee kaŋɛ nɛ asheŋ nɛ menyee kre menyi be nfɛra to kikɛ.

⁶ Men mɔ basa damta Jerusalɛm to hale nɛ bubuni sɔ kumo be agbembi kikɛ so.”

⁷ “Amoso kusɔ nɛ Enyɛnpetale Ebɔrɛ kaŋɛ e la fanɛ basa nɛ men mɔ n lɛ kaplɛkama na e ki eblaŋ nɛ kadegboŋ na malɛ ki kapuliya ama e beeŋ tintiŋ menyi n lar Jerusalɛm to.

⁸ Ŋkpal menyi kaa bee ŋana tokobi so, kumo nɛ meeŋ shin nɛ basa e ta m ba menyi so.

⁹ Meeŋ lara menyi kadegboŋ na to n ta menyi m bɔɔ befɔ enɔ nɛ b gberge menyi kusoe.

¹⁰ Baaŋ kɔ menyi kena m mɔ menyi ashi menyi gbagba be efuli so. Ndoŋ nɛ ekama beeŋ pin fanɛ ma, e la Enyɛnpe Ebɔrɛ na.

¹¹ Kadegboŋ ere maaŋ kuŋ menyi bejuŋkparpo na fanɛ kananɛ kapuliya bee kuŋ eblaŋ nɛ a wɔ kumo to na. Meeŋ ji menyi demu kaplɛkama nɛ men wɔ ashi Israɛl be efuli so nɛ men ji n tɔr.

¹² Ndoŋ nɛ menyeeŋ pin fanɛ ma e la Enyɛnpe Ebɔrɛ nɛ men kini k bɛ ma mbraana so nseŋ ya kaa bɛ efuli pɔtɛana nɛ a kulti menyi na be mbraana so na.”

¹³ Ŋ kraa malga nna nɛ Pɛlatiya tɔr n wu epul na to. Ndoŋ nna nɛ n ta enɔ m buu ma anishi so nseŋ kurgi kumu n yuu to m boŋ to n shu ŋ kaŋɛ: “O, Enyɛnpetale Ebɔrɛ! Fee sha kemɔ Israɛl be basa gbrɛbi nɛ b ka ere kikɛ nna a?”

¹⁴ Nɛ Enyɛnpe Ebɔrɛ na kaŋɛ ma le:

¹⁵ “Dimɛdi pibi, le nɛ basa nɛ b wɔ Jerusalɛm to ere bee kaŋɛ a laŋɛ fo nɛ Israɛl be basa nɛ b yɛr Babilɔn be efuli so na be kaplɛa so. B yɛ, menyi ere maŋ naŋ taga Enyɛnpe Ebɔrɛ to a bishi nɛ men tiŋ n shuŋ mo. Amoso, Israɛl be kasawule na ki bumo nawule peya nna.

¹⁶ Ama kusɔ nɛ mee sha fanɛ fo, Ezikɛl, e kaŋɛ Israɛl be basa nɛ b wɔ Babilɔn be efuli so na e la fanɛ, ma e shin nɛ b yɔ efuli pɔtɛ so kufɔ kufɔ n ya pesaŋ to a wɔtɔ na. Ama naniere, ma nɛ menyi e naŋ baa la ashi efuliana nɛ men wɔ amo so na.

¹⁷ Kumo be kaman nɛ fo kaŋɛ bumo fanɛ kusɔ nɛ ma Enyɛnpe Ebɔrɛ na kaŋɛ e la fanɛ meeŋ naŋ gama bumo abar so ashi efuli pɔtɛana na so nseŋ bɛta Israɛl be efuli na n naŋ sa bumo nɛ b chena so.

¹⁸ B kaŋ bɛta m ba malɛ, baaŋ lara agbirana nɛ a la ekishisheŋ n sa ma na ashi mboŋ nɛ a wɔ na kikɛ.

¹⁹ Meeŋ lara bumo be ŋgbene nɛ a du kpakpa fanɛ ajembu na bumo to nseŋ sa bumo ŋgbene nɛ nfɛra popɔr, nɛ b maaŋ naa sha keshuŋ agbirana.

²⁰ Ndoŋ nɛ baaŋ bɛ ma mbraana so nsaa wora asɔ nɛ mee ŋini bumo na. Baaŋ baa la ma basa nɛ ma alɛ e baa la bumo be Ebɔrɛ.

²¹ Ama meeŋ gberge bekama nɛ bumo be ŋgbene kraa wɔ bumo be agbirana nɛ ŋ kishi nɛ a la ekishisheŋ n sa ma na kusoe ŋkpal bumo be asheŋ lubi so. Ma, Enyɛnpetale Ebɔrɛ e kaŋɛ na.”

Enyɛnpe Ebɔrɛ na be kemaŋkura ka lar Jerusalɛm to be asheŋ

²² Kumo be kaman nɛ asɔbɔya keniso na fara a firgi, nɛ aya kulkulso na wɔ bumo be akel to, nɛ Israɛl be Ebɔrɛ na be kemaŋkura buu bumo so.

²³ Ndoŋ nna nɛ kefulto nɛ k bee ŋini Enyɛnpe Ebɔrɛ be kemaŋkura na lar Jerusalɛm to n ya buu kebee nɛ k wɔ kadegboŋ na be epeŋilarkpa be kaba so na so.

²⁴ Nɛ Ebɔrɛ be Kiyoyu ta ma m bɛta m ba basa nɛ ma nɛ bumo daa wɔ Babilɔn be efuli so na kutɔ ashi bɔrɛdare na to. Ndoŋ nna nɛ bɔrɛdare nɛ n daa ku na loge,

²⁵ nɛ ŋ kute kusɔ nɛ Enyɛnpe Ebɔrɛ na lara ŋ ŋini ma na kikɛ n sa bumo.