Ditɛronɔmi 29 - EBƆRƐ BE KAWƆL

Enyɛnpe Ebɔrɛ nɛ Israɛlebi be kɔnɔkoŋwule be ŋkre be asheŋ

¹ Kananɛ Enyɛnpe Ebɔrɛ na nɛ Israɛlebi na be kɔnɔkoŋwule be ŋkre, nɛ e kaŋɛ Mosis kenishipere so ashi Mowab be kasawule so na, bee nite nde. Le be ŋkre ere gba ti amo nɛ bumo nɛ Enyɛnpe Ebɔrɛ na daŋ kre ashi kebeegboŋ nɛ baa tre Sainai na ase na so nna.

² Mosis tre Israɛl be basa na kikɛ nna n shɛr nseŋ kaŋɛ bumo le: Menyi gbagba daŋ wu kusɔ nɛ Enyɛnpe Ebɔrɛ na wora Ijipt be ewura nɛ mbe benimuana nɛ bekama nɛ b wɔ mbe efuli so na.

³ Menyi alɛ naŋ wu alɔ lubi nɛ emamachisheŋ nɛ Enyɛnpe Ebɔrɛ na wora ashi Ijipt be efuli so ndoŋ.

⁴ Ama hale nɛ mbre loŋ be asɔ kraa maŋ shin nɛ men pin asheŋ nɛ men wu nseŋ nu na kikɛ to.

⁵ Nfɛ adena nɛ Enyɛnpe Ebɔrɛ na juŋkpar menyi m bɔla keshishɛrsawule so na, menyi be asɔbuuso nɛ asɛbta malɛ daŋ maŋ wu kikɛ.

⁶ Men daŋ maŋ kɔ ajibi nɛ men ji ŋko yabra belbelso ŋko nsa be yiri kikɛ nɛ men nuu. Ama Enyɛnpe Ebɔrɛ na daŋ sa menyi ajibi jiso nɛ asɔnuuso ŋ ŋini menyi fanɛ mo e la menyi be Ebɔrɛ.

⁷ Ade be kaman, anyi ka ba nfe, Amɔriebi be ewura nɛ b daa tre Sihɔn nɛ e daŋ chena kade nɛ baa tre Hɛshbɔn a ji kuwura na nɛ Bashan be ewura Ɔg kikɛ lar nna m ba kɔ anyi kena. Ama an daŋ pɔɔ bumo so,

⁸ nseŋ daŋ sɔ bumo be nsawule m barga to n sa Ruben nɛ Gad be yiri to ebi nɛ Manase be yiri be bargato ebi.

⁹ Amoso, men baa bɛ menyi nɛ Enyɛnpe Ebɔrɛ na be kɔnɔkoŋwule be ŋkre na be atande so nɛnɛ, nɛ kusɔ kama nɛ menyeeŋ wora e nite nɛnɛ n sa menyi.

¹⁰ Enyɛnpe menyi be Ebɔrɛ na be anishito nɛ menyi nɛ men be bejuŋkparpo nɛ benimu nɛ benyɛn

¹¹ nɛ beche nɛ mbia nɛ befɔ nɛ baa kil ndibi nsaa sulɔ nchu a sa menyi na kikɛ yil kabre na.

¹² Men wɔ nfe kabre nna nɛ men nase kɔnɔ fanɛ menyeeŋ wora m bɔlɔ kɔnɔkoŋwule be ŋkre nɛ menyi nɛ Enyɛnpe, men be Ebɔrɛ na bee kre na so,

¹³ saŋɛ na so, Enyɛnpe Ebɔrɛ na beeŋ ber kagbene ŋ kaŋɛ fanɛ men la mbe basa nna nɛ mo alɛ la men be Ebɔrɛ, fanɛ kananɛ e nase kumo be kɔnɔ n sa men nananyɛnana na, Eebraham nɛ Aizek nɛ Jeekɔb.

¹⁴ Mannɛ menyi nawule nɛ Enyɛnpe Ebɔrɛ na bee nase kɔnɔkoŋwule be ŋkre ere be atande a sa.

¹⁵ Ama anyi nɛ an yil nfe kabre ere nɛ anyi be kaman to ebi nɛ b kraa ba kikɛ nɛ e bee nase amo a sa.

¹⁶ Men baa nyiŋi kananɛ kebaawɔtɔ daa du n sa menyi ashi Ijipt be efuli so nɛ jemanɛ nɛ an daŋ bɔla efuliana ko to a choŋ na.

¹⁷ Men daŋ wu bumo be agbirana nɛ b ta ndibi ŋko ajembu ŋko shuwa ŋko gbiti n lɔŋɛ. An ka daŋ wu amo kenishiso na gba k daa la ekishi nna n sa anyi.

¹⁸ Men baa da so nɛ enyɛn ŋko eche ŋko kanaŋ ŋko yiri kikɛ nɛ k yil nfe kabre ere be kekama maaŋ lar Enyɛnpe menyi be Ebɔrɛ na kaman nseŋ ya kaa shuŋ efuli pɔtɛana be agbirana. Loŋ kaŋ wora, k beeŋ baa du fanɛ kaliŋi ka kɔr n daŋ ŋ ki keya nɛ kumo be asɔrso du kekra nsaa kɔ kɔrtɔ nna.

¹⁹ Menyi alɛ e baa da so nɛ menyi to be esa kikɛ nɛ e wɔ nfe kabre nsaa nu kɔnɔkoŋwule be ŋkre ere be atande ere maaŋ fɛ fanɛ hale nɛ e wora mbe aparsheŋ gba, asheŋ kraa beeŋ nite nɛnɛ n sa mo. Kumo be loŋ beeŋ tiŋ m mur basa lela nɛ basa lubi kikɛ.

^20-21 Enyɛnpe Ebɔrɛ na maaŋ ta m paŋ esa nɛ e beeŋ wora loŋ na. E beeŋ nya agbo ga n wora amodoŋwura nseŋ shin nɛ eshoduu nɛ a wɔ Ebɔrɛ na be mbra be kawɔl ere to a ba mo so nɛ e mur mo cheche. Saŋɛ na so, k beeŋ baa la kasokpele n sa Israɛl be eyiriana na kikɛ.

²² Aloŋ beeŋ shin nɛ menyi be mbia nɛ baaŋ koso echefoso nɛ befɔ nɛ baaŋ shi efuli wɔfɔ so m ba na e wu kumu lubi gboŋgboŋi nɛ etɔrɔ nɛ Enyɛnpe Ebɔrɛ na daŋ shin nɛ a ba men be kasawule so. Nfɔl nɛ jɛrbi beeŋ jija men be adɔsawule kikɛ nɛ a ki jiga a dese nɛ b maaŋ tiŋ n duu shɛŋ amo so. Afitiri gba maaŋ naŋ tiŋ ŋ kɔr adɔsawule na so.

²³ Menyi be kasawule na beeŋ ki fanɛ Sodɔm nɛ Gomɔra nɛ Adma nɛ Zeboyim nɛ Enyɛnpe Ebɔrɛ na daŋ nya agbo ga nseŋ mur amo jemanɛ ko na.

²⁴ Efuli pɔtɛana so be basa kikɛ beeŋ bishi le: “Manɛ nna nɛ Enyɛnpe Ebɔrɛ na wora bumo be kasawule loŋ? Manɛ e bar mbe kanya agbo?”

²⁵ Kusɔ nɛ beko beeŋ kaŋɛ e la: “Basa ere ka lar bumo Nyɛnpe, nɛ e la bumo nananyɛnana be Ebɔrɛ na be kɔnɔkoŋwule be ŋkre nɛ mo nɛ bumo kre jemanɛ nɛ e lara bumo Ijipt be efuli so kaman

²⁶ nseŋ ya kaa shuŋ agbirana nɛ Enyɛnpe Ebɔrɛ na daŋ kaŋɛ bumo fanɛ b sa maŋ kaŋ shuŋ na so

²⁷ nɛ e nya agbo n wora bumo nseŋ shin nɛ eshoduu nɛ a wɔ Ebɔrɛ be mbra be kawɔl ere to ba kasawule na so na.

²⁸ Enyɛnpe Ebɔrɛ na daŋ nya agbo ga nna nseŋ lara bumo ashi bumo gbagba be kasawule so n ya lɛ efuli pɔtɛ nɛ b wɔ kumo so kabre ere so.”

²⁹ Asheŋ ko wɔtɔ nna nɛ Enyɛnpe, anyi be Ebɔrɛ na, ta n yili ashiri to, ama e lara mbe mbraana bre ŋ ŋini anyi, saŋɛ na so, anyi nɛ anyi be kaman to ebi beeŋ baa wora amo kasonu mbaanaayɔ.