Ditɛronɔmi 24 - EBƆRƐ BE KAWƆL

Kakilgboŋi nɛ kenaŋ n laŋɛ ŋ kil be asheŋ

¹ Nɛ fanɛ enyɛn ta eche nseŋ wu fanɛ eche na kɔ kebaawɔtɔ ko nɛ e maa sha nɛ e kpal loŋ so n sibɛ kakilgboŋi be kawɔl ŋ kini eche na fanɛ e baa yɔ.

² Kumo be kaman nɛ eche na naaŋ ya kil enyɛn pɔtɛ,

³ nɛ mo alɛ gba naaŋ wu kusɔ ko eche na so nseŋ kini mo n sibɛ kakilgboŋi be kawɔl n sa eche na n lara mo mbe laŋ to, ŋko enyɛn nyɔsopo na wu nna ŋ ka eche na,

⁴ eche na maaŋ naŋ tiŋ m bɛta n ya kil mo kul dra na kikɛ, ŋkpal e ka tiŋ n tu enyɛn nyɔsopo na n di so. Bumo be kenaŋ kil abar beeŋ jija kasawule nɛ Enyɛnpe menyi be Ebɔrɛ na ta a sa menyi na. Ŋkpal manɛ so, Enyɛnpe Ebɔrɛ na kishi loŋ nna.

Mbra be yiri yiri be asheŋ

⁵ Nɛ enyɛn ta eche nɛ k maŋ naŋ fo kafɛ, kumo ere a maŋ daga enyɛn na ka yɔ kena to ŋko n yɔ kushuŋ nɛ k beeŋ barga mo nɛ mbe eche na to. Menyeeŋ sa enyɛn na kafɛ lelemu be ekpa nɛ e chena epe saŋɛ na so e beeŋ deŋi mbe eche na anishito.

⁶ Nɛ menyi be ekama bee paŋ mo barkasa amansherbi e beeŋ tiŋ n sɔ kusɔ ko n yili tarma, ama e sa maŋ kaŋ sɔ amodoŋwura be kuboo kɔr nyifu ŋko kumo be ebi. K beeŋ shin nɛ akoŋ e mɔ esa na nɛ mbe kanaŋ, ŋkpal manɛ so kumo nɛ baa ta a kɔr ayu a wora ajibi a ji.

⁷ Menyi to be ekama nɛ e beeŋ pɛ mo barkasa Israɛl be esa ŋ ki mbe kenya ŋko n fa fanɛ kenya, a daga fanɛ men mɔ esa nɛ e fa mo barkasa na. Kananɛ menyeeŋ wora n lara le be kulubi ere efuli na so nna na.

⁸ Nɛ menyi to be ekama bee lɔ eyur so be kulɔ lubi kama fanɛ keboti a daga fanɛ e bɛ kusɔ nɛ bɔrɛmatapoana nɛ b shi Livai be yiri to na beeŋ kaŋɛ mo kikɛ so. Men baa bɛ mbraana nɛ n ta n sa menyi na so.

⁹ Men baa nyiŋi kusɔ nɛ Enyɛnpe menyi be Ebɔrɛ na daŋ wora Miriam jemanɛ nɛ men daŋ shi Ijipt be efuli so a ba na.

¹⁰ Nɛ menyi to be ekama bee paŋ fo kusɔ ko, fo nɛ e bee paŋ fo na e sa maŋ sɔ esa na be wajɛ buuso n yili tarma.

¹¹ Fo jo kowushina nɛ esa na gbagba e ta kumo n lar m ba sa fo.

¹² Nɛ esa nɛ e bee paŋ na la etirpo nna, kumo ere fo nɛ e bee paŋ fo na e sa maŋ shin nɛ wajɛ buuso na e di fo kutɔ ŋ klade.

¹³ A daga fanɛ fo bɛta kumo n ya sa kumowura kaaseso, saŋɛ na so e beeŋ nya kumo m buu n dese nseŋ kule Enyɛnpe Ebɔrɛ na nɛ e nɛfa fo. Aloŋ nɛ Enyɛnpe menyi be Ebɔrɛ na be kagbene beeŋ fuli fo so.

¹⁴ Men sa maa puni betirpo nɛ menyeeŋ ber paa. B la Israɛl be basa ŋko befɔ nɛ menyi nɛ bumo chena abar so menyi be ndeana to gba, a daga fanɛ men baa ka bumo kukɔ nɛ k daga bumo nna.

¹⁵ Ŋkpal b ka la betirpo n daga fanɛ b nya amansherbi pɔɛŋ nseŋ tiŋ n nya bumo be kusɔ jisoso, a daga fanɛ men ka bumo karechɛ kama be kushuŋ be kukɔ pɔɛŋ nɛ epeŋi e tɔr. Nɛ menyi maŋ ka bumo, baaŋ shu ŋ ŋini Enyɛnpe Ebɔrɛ na nɛ kumo be kulubi e baa bɛ menyi.

¹⁶ A maŋ daga fanɛ b mɔ betuto nɛ benio ŋkpal alubi nɛ bumo be mbia wora so. Kumo alɛ maŋ daga fanɛ b mɔ mbia ŋkpal alubi nɛ bumo tutoana nɛ bumo nioana wora so. Ekama daga fanɛ e wu nna ŋkpal mo gbagba be alubi nɛ e wora so.

¹⁷ Men sa maa mɔn befɔ nɛ amunibi kusɔ nɛ k daga bumo kikɛ. Menyi alɛ e sa maa sɔ ekulpoche be kusɔbuuso a yili tarma pɔɛŋ nsaa sa mo mpaŋ.

¹⁸ Men baa nyiŋi fanɛ men daa la anya ashi Ijipt be efuli so nna nɛ Enyɛnpe menyi be Ebɔrɛ na sɔ menyi n yige. Amoso nɛ mee sa menyi mbra ere na.

¹⁹ Nɛ men teŋi menyi be adɔjibi n sulɔ amo m ba epe nseŋ teŋ ako so ashi ndɔ na to, men sa maŋ naŋ bɛta n ya ta amo. Men yige amo n sa befɔ nɛ amunibi nɛ bekulpoche, saŋɛ na so Enyɛnpe menyi be Ebɔrɛ na beeŋ nɛfa kusɔ kama nɛ menyee wora.

²⁰ Nɛ menyee chuge menyi be ɔlif be asɔrso men sa maa chuge amo kikɛ ndibi na so, ama men baa yige ako a sa betirpo nɛ bumo alɛ e baa shishi amo a ji.

²¹ Kumo be kaman, nɛ men ya chuge menyi be asɔrso nɛ baa tre greep na, men sa maŋ naŋ bɛta n ya chuge amo nɛ a beeŋ ka afeelebi na so na kela nyɔsopo. Men yige amo n sa befɔ nɛ amunibi nɛ bekulpoche nɛ bumo alɛ e ya chuge n ta.

²² Men sa maŋ kaŋ teŋ so fanɛ menyi alɛ gba daa la befɔ nna ashi Ijipt be efuli so nna. Amoso nɛ mee sa menyi mbra ere na.