Ditɛronɔmi 23 - EBƆRƐ BE KAWƆL

Kusɔ nɛ k beeŋ lara esa Ebɔrɛ be basa to be asheŋ

¹ Enyɛn kama nɛ b fɛl mo ŋko ŋ ku mbe kenyɛnsɔ so maŋ naŋ ti Enyɛnpe Ebɔrɛ na be basa so.

² Esa kama nɛ mo tuto nɛ mo nio maŋ kil pɔɛŋ nseŋ kurge mo nɛ mbe kaman to ebi n ya fo mbe kenana kudusopo kikɛ, maŋ naŋ ti Enyɛnpe Ebɔrɛ na be basa so.

³ Ammɔn ŋko Mowab be basa ŋko bumo be kamanebi n ya fo bumo be kenana kudusopo kikɛ maŋ ti Enyɛnpe Ebɔrɛ na be basa so.

⁴ Ŋkpal manɛ so, b daŋ kini kesa menyi ajibi nɛ nchu jemanɛ nɛ men daŋ lar Ijipt be efuli so a ba na nna. Kumo be kaman nɛ b ya haya kanyɛn nɛ baa tre Balaam nɛ e la Biyɔɔ pibinyɛn na nseŋ shi kadegboŋ nɛ baa tre Peto ashi Mɛsopoteemia be efuli so na fanɛ e ba sho menyi kɔnɔ.

⁵ Ama Enyɛnpe menyi be Ebɔrɛ na daŋ maŋ nu n sa Balaam. Kusɔ nɛ e daŋ wora e la fanɛ e kilgi shoduu na nna ŋ ki nɛfa ŋkpal e ka bee sha menyi so.

⁶ Amoso menyi nɛ Mowabebi ŋko Ammɔnebi e sa maŋ kaa wora kayurwushi be kebaawɔtɔ be kɔnɔkoŋwule be ŋkre kikɛ.

⁷ Ama Edɔmebi bre la men kurgepoana nna nɛ menyi alɛ daa la befɔ Ijipt be efuli so. Amoso men sa maa keni Edɔmebi nɛ Ijiptebi na jiga.

⁸ Yili bumo be kenanafofo mbaanaayɔ, bumo be kaman to ebi ti Enyɛnpe Ebɔrɛ na be basa, Israɛlebi so.

Benapo be keeyi to be farfarbi be asheŋ

⁹ Nɛ men yɔ kena to n ya wora menyi be keeyi to, men sa maa wora eyurpisheŋ kikɛ ashi keeyi to.

¹⁰ Nɛ enyɛn ku edare nseŋ m ba eyur nɛ k shin nɛ e maŋ walɛ so daŋkare be ekpa so, a daga fanɛ e lar keeyi na to n ya kaa wɔ kumo be ekarso.

¹¹ Ta a ba kaaseso nɛ e bɛr nchu, nseŋ bɛta m ba keeyi na to saŋɛ nɛ kaboŋ bee pɛ anishi na.

¹² Menyeeŋ fin kaboŋ ko ashi keeyi na be ekarso nɛ k baa la ejɔŋɛkpa.

¹³ Nɛ menyee yɔ nɛ men ya jɔŋɛ malɛ, men baa ta ntɔkɔrɔ n ya kur a jɔŋɛ a puli.

¹⁴ Ŋkpal menyi nɛ Enyɛnpe menyi be Ebɔrɛ na ka wɔ keeyi na to nɛ e bee kuŋ menyi nsaa shin nɛ menyee kɔ a pɔɔ men doŋana so so, a daga fanɛ men baa keni keeyi na so nɛnɛ nɛ k baa du farfarbi nsaa walɛ so daŋkare be ekpa so. Amoso men sa maŋ kaa wora ekishisheŋ nɛ k beeŋ shin nɛ Enyɛnpe Ebɔrɛ na e pal kaman n sa menyi kikɛ.

Mbra be yiri yiri be asheŋ

¹⁵ Nɛ fanɛ efuli ko so be anya shile m ba buu menyi a fin kekuŋ, men sa maŋ bɛta bumo a sa bumo nyɛnpeana.

¹⁶ Men shin nɛ b chena menyi be ndeana na be kekama nɛ baa sha to. Menyi alɛ e sa maa kɔrfɛ bumo.

¹⁷ Israɛl be kusɔnyɛn ŋko kusɔche kikɛ maŋ daga fanɛ e ki sakale ashi agbirlambu to kikɛ.

¹⁸ Kumo be kaman, ekama nɛ e wora loŋ n nya amansherbi e sa maŋ ta amo m ba Enyɛnpe Ebɔrɛ na kutɔ nɛ e ba tia kɔnɔ naseso kikɛ. Ŋkpal manɛ so, Enyɛnpe Ebɔrɛ na kishi agbirlambu to be esakale ga.

¹⁹ Fo kama nɛ fo ta amansherbi ŋko ajibi ŋko kusɔ ko m paŋ fo barkasa Israɛl be esa, fo sa maŋ kaŋ wɔtɔ mo nchu.

²⁰ Menyeeŋ tiŋ a wɔtɔ befɔ nɛ b paŋ menyi asɔ nchu, ama mannɛ men braana Israɛl be basa bre. Nɛ men wora mbra ere kasonu, Enyɛnpe menyi be Ebɔrɛ na beeŋ baa nɛfa kusɔ kama nɛ menyeeŋ baa wora ashi kasawule nɛ menyee yɔ nɛ men ya sɔ n chena so na.

²¹ Nɛ men baŋ nase Enyɛnpe menyi be Ebɔrɛ na kɔnɔ, a daga fanɛ men wora kumo m bɔlɔ so manaŋ. Nɛ mannɛ aloŋ Enyɛnpe menyi be Ebɔrɛ na beeŋ bishi menyi kumo nɛ k ki kulubi n sa menyi.

²² Nɛ esa maŋ nase Enyɛnpe Ebɔrɛ na kɔnɔ k maŋ la kulubi n sa mo.

²³ Ama nɛ esa nase kɔnɔ mbe keparso, a daga fanɛ e tia kumo, ŋkpal manɛ so, mannɛ esa ko e tintiŋ mo nɛ e nase kɔnɔ na.

²⁴ Nɛ menyi be eko bɔla esa ko be ndibi sɔrso be kudɔ to a choŋ, e beeŋ tiŋ n chuge asɔrso na be ako n ji kanaŋkamaso nɛ e bee sha, ama e sa maŋ chuge amo n wɔtɔ kusɔ to n yɔ.

²⁵ Nɛ esa bɔla esa pɔtɛ be ayu be kudɔ to a choŋ, e beeŋ tiŋ m buri amo n we kanaŋkamaso nɛ e bee sha, ama e sa maŋ teŋi ayu na n sulɔ n yɔ epe.