Ditɛronɔmi 20 - EBƆRƐ BE KAWƆL

Keyɔ kena to be asheŋ

¹ Nɛ men kaŋ yɔ nɛ men ya kɔ men doŋana kena nseŋ wu fanɛ bumo be egbaŋɛ nɛ egbaŋɛturko nɛ benapo shi a chɔ menyeya, men sa maa ŋana bumo. Ŋkpal manɛ so, Enyɛnpe menyi be Ebɔrɛ nɛ e kɔ n suge menyi ashi Ijipt be efuli so na beeŋ chɛ menyi to ŋ kɔ.

² Pɔɛŋ nɛ men fara kekɔ kena na, a daga fanɛ bɔrɛmatapo e ba yili benapo na be anishito nseŋ kaŋɛ bumo le:

³ Israɛl be benapo, men nu nfe! Menyee yɔ kena to kabre nna na, ama men sa maŋ kpal men doŋana so a lɔ kufu ŋko a jija kenyɛn ŋko a chicha.

⁴ Menyi nɛ Enyɛnpe menyi be Ebɔrɛ na e naa yɔ kena na to; mo alɛ beeŋ shin nɛ men kɔ m pɔɔ so.

⁵ Kumo be kaman nɛ benapo na be bejuŋkparpoana malɛ e malga n sa benapo na ŋ kaŋɛ bumo le: “Esa ko wɔ nfe nɛ e pɔr kowu popɔr, ama mo alɛ maŋ naŋ ta kumo m bɔɔ Ebɔrɛ enɔ nseŋ bela n luri kumo to a? Kumo ere e bɛta a yɔ epe. Nɛ mannɛ aloŋ e kaŋ ya wu kena to, esa pɔtɛ e naaŋ ta mbe kowu na m bɔɔ Ebɔrɛ enɔ nseŋ bela n luri kumo to.

⁶ Ŋko esa ko wɔ nfe nɛ kraŋ baŋ dɔ ndibi sɔrso be kudɔ, mo alɛ maŋ naŋ chuge amo be asɔrso a? Kumo ere e bɛta a yɔ epe. Nɛ mannɛ aloŋ e kaŋ n ya wu kena to, esa pɔtɛ e naaŋ ji asɔrso na be tɔnɔ.

⁷ Ŋko esa ko wɔ nfe nɛ e tiŋ n ji eche be kesha nsaa sha keta eche na a? Kumo ere e bɛta a yɔ epe. Nɛ mannɛ aloŋ e kaŋ ya wu kena to, esa pɔtɛ e naaŋ ta eche nɛ e kre keta na.”

⁸ Ade be kaman, nɛ benimuana na e naŋ kaŋɛ benapo na le: “Esa ko wɔ nfe nɛ kagbenejija shin nɛ kufu pɛ mo a? Kumo ere e bɛta a yɔ epe. Nɛ mannɛ aloŋ e beeŋ ta kufu m pɛ benapo nɛ b ka na nɛ b pɔ aba.”

⁹ Benimuana na kaŋ malga n sa benapo na n loge, baaŋ lara basa nɛ baaŋ baa juŋkpar benapo na ntuŋso.

¹⁰ Pɔɛŋ nɛ menyeeŋ kɔ kade ko to be basa kena, menyeeŋ juŋkpar n sa bumo ekpa nɛ b shuli fanɛ b tuba nna.

¹¹ Nɛ b kaŋ shuli fanɛ b tuba nseŋ bugi bumo be mbunaana n sa menyi nɛ men luri kade na to, kumo ere kade na to be basa kikɛ beeŋ ki menyi be anya nsaa shuŋ menyi.

¹² Ama nɛ fanɛ kade na to be basa kini ketuba nseŋ yili fanɛ bumo alɛ gba beeŋ kɔ, kumo ere menyi be benapo beeŋ kulti kade n wɔtɔ.

¹³ Kumo be kaman, nɛ Enyɛnpe Ebɔrɛ na kaŋ shin nɛ men kɔ n sɔ kade na, men mɔ kade na to be benyɛn kikɛ.

¹⁴ Ama menyeeŋ tiŋ m pɛ bumo be beche nɛ mbia kenya nseŋ ta bumo be asɔbɔya nɛ asɔ lela nɛ menyee sha. Menyeeŋ tiŋ n ta men doŋana na be asɔ n wora kusɔ kama nɛ menyee sha, ŋkpal manɛ so, Enyɛnpe Ebɔrɛ na e ta amo n sa menyi.

¹⁵ Kananɛ menyeeŋ wora ndegboŋ nɛ a maŋ taga kasawule nɛ menyeeŋ chena so na to nna na.

¹⁶ Ama menyi kaŋ kɔ n sɔ ndegboŋ nɛ a wɔ kasawule nɛ Enyɛnpe menyi be Ebɔrɛ na ta a sa menyi ere so bre, men mɔ basa na nɛ bumo be asɔbɔya kikɛ.

¹⁷ Ŋkpal manɛ so, Enyɛnpe Ebɔrɛ na teŋ yili kumo fanɛ men mur Hitebi nɛ Amɔriebi nɛ Keenanebi nɛ Pɛrizebi nɛ Hivebi nɛ Jebusiebi na kikɛ nna.

¹⁸ Nɛ menyi baŋ maŋ mɔ bumo nseŋ yige bumo, baaŋ fule menyi nɛ men baa wora ekishisheŋ nɛ baa wora ashi bumo be kagbirshuŋ to na n shin nɛ men wora kulubi ŋ gbiti Enyɛnpe menyi be Ebɔrɛ na.

¹⁹ Nɛ menyi kaŋ ya kulti kade n wɔtɔ a sha kekɔ kumo to be basa kena, men sa maŋ ku bumo be ndibi sɔrso n lɛ. Hale nɛ men kulti kumo n chɛr gba, men sa maŋ wora loŋ. Ama men baa ji ndibi na be asɔrso na nsaa maŋ mur amo ere. Ŋkpal manɛ so, ndibi na bre maŋ la men doŋana.

²⁰ Menyeeŋ tiŋ ŋ ku ndibi pɔtɛ n lɔŋɛ nsakpar nɛ ajaŋ jeŋgreŋ m bɔla so n dii egbalana na so n luri kade na to ŋ kɔ n suge kumo.