Ashuŋ Shunso 3 - EBƆRƐ BE KAWƆLB ka chɛ bobinyɛn ko be asheŋ 1 Kachako Pita nɛ Jɔn ka bee yɔ bɔrɛlambu na to kapaso kerfi asa, jemanɛ nɛ basa daa yɔ n ya kaa bunyaŋ Ebɔrɛ bumo be kabɔrɛkule to na 2 nɛ kanyɛn ko nɛ e daa la bobi mbe kakurgeachɛ kikɛ na wɔ bɔrɛlambu na be kabuna nɛ b daa tre Kabuna Lela na akpa. Kachɛ kama b daa sulɔ mo nna a ba kabuna na akpa nɛ e ba kaa kule basa nɛ b daa luri bɔrɛlambu na to na amansherbi. 3 E ka wu Pita nɛ Jɔn ka bee luri bɔrɛlambu na to nɛ e kule bumo fanɛ b sa mo kusɔ ko. 4 Nɛ b keni mbe anishito nɛ Pita kaŋɛ mo: “Keni anyi so.” 5 Nɛ e keni bumo boeŋ a tama kenya kusɔ ko. 6 Nɛ Pita kaŋɛ mo: “M maŋ kɔ kubo, ama meeŋ sa fo kusɔ nɛ ŋ kɔ. Nazarɛt be Yesu Kristo be eleŋ to so, niŋi to n nite!” 7 Ndoŋ nna nɛ Pita pɛ mbe enɔ to n chɛ mo to nɛ e niŋi to epul na to nɛ mbe aya nya eleŋ. 8 Ndoŋ nna nɛ e tɛ to n yuu mbe aya so nseŋ fara a nite a kilgi to. Kumo be kaman nɛ mo nɛ Pita nɛ Jɔn luri bɔrɛlambu na to nɛ e bee nite nsaa tɛ to a di Ebɔrɛ epaŋ. 9 Jimaŋ na kikɛ daŋ wu e ka na nsaa di Ebɔrɛ epaŋ. 10 B ka pin fanɛ mo e daa tase bɔrɛlambu na be kabuna nɛ baa tre Kabuna Lela na akpa na nɛ bumo be nnɔ mɔ bumo ŋkpal kusɔ nɛ k wora mo na so. Pita be kamalga ashi bɔrɛlambu to be asheŋ 11 Basa na ka wu kananɛ kanyɛn na far n chɛ Pita nɛ Jɔn na nɛ k chinchiŋ bumo kikɛ ga nɛ b shile n yɔ bumo kutɔ ashi kakpa nɛ b daa tre Sɔlɔmɔn be kedɛdɛ na. 12 Pita ka wu bumo nɛ e kaŋɛ bumo: “Israɛlebi, manɛ e ba nɛ kesheŋ ere bee chinchiŋ menyi nɛ menyee keni anyi loŋ? Menyee tama fanɛ anyi gbagba be eleŋ ŋko anyi be kelela so so nɛ an tiŋ n chɛ kanyɛn ere nɛ e bee nite le ere a? 13 An nananyɛnana Eebraham nɛ Aizek nɛ Jeekɔb nɛ anyi be kanaŋ to ebi kikɛ be Ebɔrɛ na e sa mbe Kenya Yesu kemaŋkura. Mo nɛ men daŋ ta m bɔɔ belempo enɔ nseŋ kini mo Pailat be anishito, saŋɛ nɛ Pailat gbagba daa sha keyige mo na. 14 Esa cheembi nɛ Esa Lela e daa la mo ama men kini mo nseŋ kule Pailat fanɛ e sɔ emɔpo n yige n sa menyi. 15 Amoso, men mɔ esa nɛ e bee sa basa Ebɔrɛ be ŋkpa. Ama Ebɔrɛ shin nɛ e tiŋi luwu na to nɛ anyi gbagba ji kumo be loŋ be shɛda. 16 Mo, Yesu koŋwule na be eleŋ e chɛ bobinyɛn ere na. Kusɔ nɛ men wu nseŋ nu ere tiŋ n wora nna ŋkpal keyirda mbe ketre na so so. Keyirda Yesu na e tiŋ n chɛ mo menyi kikɛ be anishito le ere na. 17 To, ŋ kurgepoana, n nyi fanɛ kusɔ nɛ menyi nɛ menyi be benimuana wora Yesu na daa la kamaanyi be kusɔ nna. 18 Dra na kikɛ nɛ Ebɔrɛ shin nɛ anebiana kikɛ wu ŋ kaŋɛ fanɛ mbe Kristo na beeŋ ba ji awurfoŋ, kumo nɛ e shin nɛ k bɔla ekpa le ere na. 19 Amoso, men lar menyi be alubi to nseŋ bɛta m ba Ebɔrɛ kutɔ nɛ e kpra menyi be alubi kikɛ n lɛ. 20 Nɛ Enyɛnpe Ebɔrɛ e shin nɛ ewushi e shi mo kutɔ m ba menyi be ayoyu to nɛ e shin nɛ Yesu nɛ e la Kristo nɛ Ebɔrɛ teŋ lara n sa menyi na e ba menyi kutɔ. 21 Ama e beeŋ baa wɔ ebɔrɛso hale nɛ saŋɛ nɛ Ebɔrɛ beeŋ shin nɛ asɔ kikɛ e ki apopɔr fanɛ kananɛ e shin nɛ mbe dra na be anebi cheembiana na kikɛ wu mbe asheŋ ŋ kaŋɛ fanɛ loŋ beeŋ wora na be jemanɛ e fo. 22 Anebi Mosis le daŋ kaŋɛ fanɛ: ‘Menyi be Ebɔrɛ Enyɛnpe beeŋ shin nɛ anebi e ba menyi kutɔ fanɛ kananɛ e daŋ shin nɛ m ba na. E beeŋ ba kaa la menyi be efuli ere so be esa nna. E kaŋ ba, men baa nu a sa mo kusɔ kama to. 23 Ekama nɛ e kini kenu kusɔ nɛ anebi na beeŋ kaŋɛ menyi, baaŋ lara mo Ebɔrɛ be basa to n shin nɛ e mur.’ 24 Baŋ fara Samuɛl n ta anebiana nɛ b daŋ bɛ mo so na nɛ anebiana nɛ b ka na kikɛ nyam nɛ Ebɔrɛ daŋ shin nɛ b bɔ mbe kubɔya na daŋ wu naniere be asheŋ ere ŋ kaŋɛ. 25 Nnɔ nɛ Ebɔrɛ daŋ shin nɛ mbe anebiana nase na la menyi alɛ gba peya nna. Le nɛ e daŋ kaŋɛ Eebraham: ‘Fo kanaŋ to nɛ meeŋ bɔla n nɛfa durnya ere to be basa kikɛ.’ 26 Amoso nɛ Ebɔrɛ lara mbe kenya Yesu n shin nɛ e ba menyi kutɔ pɔɛŋ m ba nɛfa menyi a shin nɛ menyi kikɛ bee lar menyi be alubi to na.” |
© 2015 GILLBT Ghana Institute of Linguistics, Literacy and Bible Translation