Ashuŋ Shunso 1 - EBƆRƐ BE KAWƆL1 N teri lela Tiɔfiles, asɔ nɛ Yesu daŋ wora nseŋ ŋini saŋɛ nɛ e fara mbe kushuŋ n ya fo saŋɛ nɛ Ebɔrɛ daŋ shin nɛ e naŋ bɛta n yɔ ebɔrɛso na kikɛ be asheŋ nɛ n daŋ sibɛ ma kawɔl juŋkparso na to. 2 Ama pɔɛŋ nɛ Ebɔrɛ shin nɛ e yɔ ebɔrɛso na, Yesu daŋ bɔla Kiyoyu Cheeŋ na so nna ŋ ŋini basa nɛ e daŋ lara nɛ b baa la mbe beshuŋipo na ŋ kaŋɛ bumo asɔ nɛ a daga fanɛ b baa wora. 3 Mbe luwu na be kaman, nchɛ adena be kefɛato nɛ e wɔtɔ a bɔla ekpa damtaana so a lara mbe kumu a ŋini mbe beshuŋipoana na hale nɛ b ya pin kashenteŋto geeŋ fanɛ e tiŋi luwu to. B daŋ wu mo hale nɛ mo nɛ bumo malga Ebɔrɛ be kuwura na to be asheŋ. 4 Kachako bumo kikɛ ba shɛr nɛ e sa bumo le be ebɔl: “Men sa maŋ kaŋ lar Jerusalɛm to. Men baa jo kakɛ nɛ ŋ kaŋɛ fanɛ n Tuto yɛ e beeŋ sa na. 5 Nchu nɛ Jɔn kabɔrɛbɛrpo daŋ ta m bɛr basa kabɔrɛbɛr, ama Ebɔrɛ beeŋ shin nɛ Kiyoyu Cheeŋ na e gbelge menyi so nchɛnnyɔ ere to be kefɛato.” Yesu ka yɔ ebɔrɛso be asheŋ 6 Kachako beshuŋipo na nɛ Yesu ka shɛr nɛ b bishi mo: “Enyɛnpe, naniere bre, feeŋ ta kuwurji na m bɛta n sa Israɛlebi a?” 7 Nɛ Yesu kaŋɛ bumo: “N Tuto nawule be enɔ to nɛ kusɔ kama nɛ kumo be jemanɛ wɔ. Amo be asheŋ maŋ la asɔ nɛ a daga men ka pin. 8 Ama men baa nyi fanɛ Kiyoyu Cheeŋ na kaŋ gbelge menyi so, menyeeŋ baa kɔ eleŋ menyi to a malga ma asheŋ a sa basa ashi Jerusalɛm to nɛ Judiya kikɛ to nɛ Samɛria to nɛ durnya ere kikɛ nyam to.” 9 Yesu ka malga kesheŋ ere n loge nɛ Ebɔrɛ shin nɛ e fara a yɔ ebɔrɛso nɛ baa keni mo hale nɛ kuwɔlpa ko ya buu mo so nɛ b maŋ naŋ wu mo. 10 Bumo be anishi kraa yuu awɔlpa na so nna nɛ benyɛn anyɔ ko nɛ b daa la emalaika buu epiŋi fuful m ba yili bumo kutɔ epul na to 11 nseŋ bishi bumo: “Galiliebi, manɛ e ba nɛ men yil a keni esoso loŋ? Yesu koŋwule nɛ Ebɔrɛ shin nɛ e lar menyi kutɔ a yɔ ebɔrɛso ere beeŋ naŋ bɛta loŋ gbagba chap m ba kananɛ men wu mo nɛ e bee yɔ ebɔrɛso ere.” Esa nɛ e sɔ Judas so be asheŋ 12 Ndoŋ nna nɛ beshuŋipoana na lar Ɔlifs be kebee so m bɛta n yɔ Jerusalɛm to. K daa la fanɛ mayɛl be bargato nna. 13 B ka fo Jerusalɛm nɛ b dii n yɔ esoso be ebu be ebu ko to nɛ b daa sha keji nchɛnnyɔ kumo to na. Bumo e daa la: Pita nɛ Jɔn nɛ Jeems nɛ Andru nɛ Filip nɛ Tɔmas nɛ Baatɔlomiu nɛ Matiu nɛ Jeems, Alfias pibi nɛ Saimɔn Zɛlɔt nɛ Judas, Jeems pibi. 14 Bumo kikɛ nɛ beche na nɛ Mɛɛri, Yesu mo nio nɛ Yesu koŋwule na mo sipoana daa wɔtɔ nna a shɛr kɔnɔkoŋwuleso a kule Ebɔrɛ. 15 Kumo be kaman nɛ beyirdapoana na kikɛ, b daŋ fo fanɛ basa kalfa nɛ adunyɔ, shɛr nɛ Pita niŋi to n yili m malga ŋ kaŋɛ: 16 “Ŋ kurgepoana, a daga fanɛ abɔrɛsibɛ na ka bɔla ekpa fanɛ kananɛ Kiyoyu Cheeŋ na shin nɛ Deevid wu ŋ kaŋɛ Judas nɛ e juŋkpar basa nɛ b pɛ Yesu na be asheŋ. 17 Anyi to be eko e daa la Judas, ŋkpal manɛ so, Yesu daŋ lara mo nna nɛ mo alɛ gba e baa wɔ anyi be kushuŋ na to. 18 Kasawule ko nɛ Judas daŋ ta mbe nia be amansherbi nɛ e nya na n tɔ. Ndoŋ malɛ nɛ e daŋ ta kapo n tɔr epun so m pante epun nɛ apumbi lar nɛ e wu. 19 Basa nɛ b daa wɔ Jerusalɛm to na kikɛ daŋ nu kumo be asheŋ nseŋ sa kasawule na ketre: Akɛldama. Bumo be ŋgbar to, kumo be kifito e la: Kakpa nɛ ŋklaŋ lar n wurge.” 20 Nɛ Pita naŋ kaŋɛ: “Le be esa ere be asheŋ nɛ b sibɛ Ebɔrɛ be Nshɛ be Kawɔl na to fanɛ: ‘A daga mbe kowu ka ki lambure nɛ esa kikɛ e sa maŋ kaa wɔ kumo to.’ Abɔrɛsibɛ na kraa kaŋɛ fanɛ: ‘A daga fanɛ esa pɔtɛ ko e sɔ mo so a shuŋ mbe kushuŋ.’ 21 Amoso, a daga fanɛ esa ko e ba ti anyi so a la Enyɛnpe be ketiŋi luwu to be baru na be emalgapo. 22 A daga fanɛ e baa la basa nɛ anyi nɛ bumo daa la saŋkama, saŋɛ nɛ anyi nɛ Yesu daa wɔtɔ, yili saŋɛ nɛ Jɔn daa malga mbe kabɔrɛbɛr be asheŋ na n ya fo kachɛ nɛ Ebɔrɛ shin nɛ Yesu lar anyi kutɔ n yɔ ebɔrɛso na be eko.” 23 Ndoŋ nna nɛ b kaŋɛ fanɛ kanyɛn ko nɛ b daa tre Josɛf na nseŋ naa tre mo Baasabas nseŋ naa tre mo koŋwule na Jɛstes na nɛ kanyɛn ko nɛ baa tre Matayas na be eko e daga kelara. 24 Nɛ b kule Ebɔrɛ ŋ kaŋɛ: “Enyɛnpe, fo nyi basa kikɛ be ŋgbene to, amoso, ŋini anyi basa anyɔ ere be emo nɛ feeŋ lara 25 nɛ e baa la fo eshuŋipo a shuŋ kushuŋ nɛ Judas daa shuŋ nseŋ yige kumo n yɔ kakpa nɛ k daga mo na.” 26 Kumo be kaman nɛ b to beri nɛ Matayas ji. Ndoŋ nna nɛ b shin nɛ e ti beshuŋipo kudukako na so. |
© 2015 GILLBT Ghana Institute of Linguistics, Literacy and Bible Translation