Aizaaya 65 - EBƆRƐ BE KAWƆL

Ebɔrɛ ka beeŋ gberge basa nɛ b lar mo kaman kusoe be asheŋ

¹ Ade kikɛ be kaman nɛ Enyɛnpe Ebɔrɛ na kaŋɛ le: “N daŋ wora shiriya nɛ n nu ma basa be kabɔrɛkule nna, ama b maŋ kule ma. Ma alɛ daŋ naŋ wora shiriya nɛ n lara ma kumu ŋ ŋini bumo, ama b maŋ wora ania nɛ b fin ma gba kuraa. Ŋ ka wora shiriya nɛ n shuli so ŋ kaŋɛ fanɛ ‘ma nde, meeŋ chɛ menyi to na gba’, efuli na be basa na maŋ kule n fin ma kechɛto.

² Jemanɛ kikɛ ma ere wora shiriya nɛ n sɔ ma basa kpeŋso nɛ b sɔ bumo gbagba be ekpa a wɔtɔ a wora asheŋ lubi na nna.

³ B paŋ nyɔmɔ nna a wɔtɔ a shin nɛ ma kagbene bee kaa. Ŋkpal manɛ so, b wɔtɔ nna a lara esarga a sa agbir ashi adɔbi to nsaa chɔɔ eduwu agbirsure nɛ b ta ebirkesi m pɔr so a sa amo.

⁴ Kanyɛso malɛ baa yɔ nchaŋ ase nna n ya kaa bishi so a fin abuniyoyu be kechɛto. Bumo alɛ naa we epreku be eblaŋ nna nsaa fe asɔbɔya nɛ b ta n lara esarga n sa agbir be epochu.”

⁵ Ade be kaman nɛ b kaŋɛ basa pɔtɛ le: “Men sa maa mata anyi, an du cheembi ga nɛ men baa bɛta anyi!” Le be basa du fanɛ edishi nna a luri ma kamuna to a kpar ma. Ma agbo a laŋɛ bumo be kaplɛa so, du fanɛ edɛ nɛ k maa duŋ kikɛ na nna.

⁶ N tiŋ ŋ kre bumo be kasogberge nseŋ sibɛ kusɔ nɛ k beeŋ wora bumo n nase. M maaŋ kplaŋ kusɔ nɛ b wora na so, ama meeŋ ka bumo kukɔ

⁷ ŋkpal bumo gbagba nɛ bumo nanaana be alubi so. B shuŋ agbir nseŋ chɔɔ eduwu n sa amo ashi abee so a malga a jija ma ketre. Amoso meeŋ keni bumo be asheŋ dra so ŋ gberge bumo kusoe kananɛ k daga bumo.

⁸ Ade kikɛ be kaman nɛ Enyɛnpe Ebɔrɛ na naŋ kaŋɛ le: “Esa kikɛ maaŋ shuli n ta asɔrso nɛ baa tre greep na be alela n lɛ, ama e beeŋ ta amo n wora yabra nna. To, ma alɛ gba maaŋ shuli m mur ma basa kikɛ, ama meeŋ mɔlga bumo nɛ baa shuŋ ma na.

⁹ Meeŋ nɛfa Israɛl nɛ Juda be basa nseŋ shin nɛ ma kasawule nɛ k kɔ abee na e ki bumo be kaman to ebi peya. Saŋɛ na so ma basa laraso nɛ baa shuŋ ma na beeŋ chena kumo so.

¹⁰ Kumo be kaman nɛ b baa shuŋ ma, Enyɛnpe Ebɔrɛ na ashi ndoŋ nsaa kpa bumo be mbolpɔ nɛ ana a yɔ Sharɔn be keplasawule nɛ k wɔ kasawule na be epeŋitɔrkpa be kaba so nɛ b ya ji afitiri lela nɛ Akɔ be Ketaŋɛ nɛ kumo alɛ wɔ epeŋilarkpa be kaba so na so.

¹¹ Ama asheŋ maaŋ baa du loŋ n sa menyi nɛ men kini ma nɛ ma kebee cheembi nɛ baa tre Zayɔn na nsaa shuŋ agbir nɛ baa tre Gad nɛ Meni na. Amo be afito la Kumulela nɛ Kela m ba.

¹² Menyi be kumulela beeŋ fo ekar nɛ m bugi ekpa n shin nɛ b ta etokobi m mɔ menyi. Ŋkpal manɛ so, ŋ ka tre menyi men kini keshuli nna; menyi alɛ maŋ naŋ wɔtɔ lakal kusɔ nɛ ŋ ŋini menyi na to. Ama asɔ nɛ ŋ kishi nɛ menyi alɛ nyi k ka la kulubi na nɛ men wora.”

¹³ Kumo be kaman nɛ Enyɛnpetale Ebɔrɛ na naŋ kaŋɛ le: “Basa kama nɛ baa shuŋ ma nsaa wora ma kasonu na beeŋ nya n ji nseŋ nuu yilayilaso, ama akoŋ nɛ achukoŋ e naaŋ mɔ menyi alubiworapoana bre. Bumo be ŋgbene beeŋ fuli bumo ama menyi ere beeŋ ji anishinyɔr.

¹⁴ Ma nyɛrbi beeŋ baa mushe nsaa boŋ nshɛ kagbenefuliso, ama menyi ere be ŋgbene beeŋ jija menyi nɛ men baa shu.

¹⁵ Ma, Enyɛnpetale Ebɔrɛ na beeŋ shin nɛ men wu nɛ ma basa laraso e ta menyi be atre a sho basa nnɔ. Ama meeŋ sa basa nɛ baa nu a sa ma na bre atre popɔr.

¹⁶ Esa kama nɛ e bee sha nɛfa ashi kasawule na so beeŋ kule Ebɔrɛ nɛ e bee ji kashenteŋ na nɛ e nɛfa mo. Ekama malɛ nɛ e bee sha kenase kɔnɔ e beeŋ nase kɔnɔ na kashenteŋji be Ebɔrɛ na be ketre to nna. Ŋkpal manɛ so, etɔrɔ dra na kikɛ choŋ nɛ n teŋ amo so.”

Enyɛnpe Ebɔrɛ na be apɔrso popɔr be asheŋ

¹⁷ Ade kikɛ be kaman nɛ Enyɛnpe Ebɔrɛ na naŋ kaŋɛ le: “Mee to durnya nɛ ebɔrɛso popɔr nna. Asheŋ dra na kikɛ choŋ nɛ n teŋ amo so kuraa.

¹⁸ Meeŋ shin nɛ menyi be ŋgbene e fuli menyi nɛ men baa ji eyur hale mbaanaayɔ ŋkpal asɔ nɛ meeŋ to so. Kagbenefuli beeŋ bɔlɔ Jerusalɛm popɔr nɛ meeŋ to na to nɛ kumo to be basa be ŋgbene e fuli bumo.

¹⁹ Ŋ gbagba be kagbene beeŋ fuli ma ŋkpal Jerusalɛm nɛ kumo be basa so. Kushu nɛ kebɔltofinfin maaŋ naa wɔ ndoŋ.

²⁰ Mbi popɔrbi be luwu maaŋ naa wɔtɔ. Basa kikɛ beeŋ chena n fo bumo be nchɛ be ekar pɔɛŋ nseŋ wu. Basa nɛ b ji nfɛ kalfa gba beeŋ baa du fanɛ mbifɔlbi. Basa nɛ b maaŋ fo nfɛ kalfa pɔɛŋ nseŋ wu na, baaŋ wu bumo be luwu na fanɛ kɔnɔsho be luwu.

^21-22 Basa beeŋ pɔr nwu n chena amo to bumo gbagba, mannɛ esa pɔtɛ e naaŋ chena amo to. Bumo alɛ beeŋ dɔ ndibi sɔrso be adɔ nseŋ nya amo be asɔrso be yabra n nu nɛ mannɛ basa pɔtɛ e naaŋ nu amo. Ma basa beeŋ chena n chɛr fanɛ ndibi. Baaŋ ji bumo be kegben be tɔnɔ nɛnɛ ga.

²³ Bumo be ashuŋ beeŋ nyalɛ n sa bumo nɛ bumo be mbia malɛ maaŋ naaŋ lɔ alɔ lubi n wu. Meeŋ nɛfa bumo nɛ bumo be kaman to ebi kikɛ.

²⁴ Pɔɛŋ nɛ baaŋ kule ma kusɔ kama gba nɛ n tiŋ n nu bumo be kekule.

²⁵ Ekuŋtuŋ nɛ mbolpɔ fɔlbi beeŋ tu abar a ji nɛ ebuluŋ e ji afitiri fanɛ ana. Awɔ beeŋ baa ji eshishɛr, amo alɛ maaŋ naa duŋ basa a mɔ. Kusɔ lubi kikɛ maaŋ naa wɔ ma kebee cheembi nɛ baa tre Zayɔn na so. Ma, Enyɛnpe Ebɔrɛ e kaŋɛ na.”