Aizaaya 62 - EBƆRƐ BE KAWƆL

Jerusalɛm ka beeŋ nya kumɔlga be asheŋ

¹ Meeŋ malga n leŋ Jerusalɛmebi to. M maaŋ lo ma kɔnɔ kikɛ, ama b nya kumɔlga nna nɛ bumo be kekɔmpɔɔso e dii efuli fanɛ kabulpi nɛ k chɔɔ so kanyɛso nɛ ekama wu kumo na nna.

² Efuli pɔtɛana na beeŋ wu kananɛ fo, Jerusalɛm kɔ m pɔɔ so! Bumo be bewura kikɛ beeŋ wu fo kemaŋkura. Feeŋ nya ketre popɔr nɛ Enyɛnpe Ebɔrɛ gbagba beeŋ sa na.

³ Feeŋ baa du fanɛ kuwurwuro lela kebita n sa Enyɛnpe Ebɔrɛ na.

⁴ Fo ketre maaŋ naa la Kini n lɛ. Efuli na gba be ketre maaŋ naa la Eche nɛ b kini n lɛ. Ama fo ketre popɔr e naaŋ baa la Ebɔrɛ be Kagbene fuli mo so. Efuli na malɛ peya e naaŋ baa la Kagbenefuli be kakil. Ŋkpal manɛ so, Enyɛnpe Ebɔrɛ na be kagbene beeŋ fuli fo so; mo alɛ beeŋ baa la fanɛ ekul n sa fo efuli na.

⁵ Kananɛ kabrantiɛbia bee wora kasuŋgurbia nɛ e maŋ nyi enyɛn kejafɔ a ta mo a ki mbe eche na nɛ Ebɔrɛ nɛ e to fo na gba beeŋ kre fo kejafɔ nɛ fo ki mbe eche. Kananɛ kejafɔ mo kul be kagbene bee fuli mbe kejafɔ so na, nɛ Ebɔrɛ gba be kagbene beeŋ baa fuli fo so.

⁶ Jerusalɛm, n shin nɛ basa yil fo egbalana so e keni ekpa to. Kapa nɛ kanyɛ kikɛ, a maŋ daga b lo bumo be nnɔ kikɛ. A daga fanɛ b baa shin nɛ Enyɛnpe Ebɔrɛ e baa nyiŋi mbe nnɔ naseso na be asheŋ, nɛ e sa maŋ teŋ amo so kikɛ.

⁷ B sa maŋ sa Enyɛnpe Ebɔrɛ na ewushi kikɛ, ama e bɛta Jerusalɛm nna n yili kumo be eyilikpa, nseŋ shin nɛ k ki kadegboŋ nɛ durnya to be basa kikɛ bee kpaŋ kumo na nna.

⁸ Le nɛ Enyɛnpe Ebɔrɛ na bɔ ntaŋ n nase kɔnɔ ŋ kaŋɛ: “M maaŋ naŋ ta fo ayu n sa fo doŋana fanɛ bumo be kusɔ jiso kikɛ; befɔ malɛ maaŋ naŋ nya yabra nɛ fo gben n wora na n nuu kikɛ.

⁹ Ama fo nɛ fo dɔ ayu na n teŋi na e naaŋ ji amo nseŋ di Enyɛnpe Ebɔrɛ epaŋ ŋkpal amo so. Fo nɛ fo keni ndibi sɔrso na so nseŋ chuge amo be asɔrso na, e naaŋ nu amo be yabra ashi ma bɔrɛlambu be kelɔnɛ so.”

¹⁰ Jerusalɛmebi, men lar kadegboŋ na to n ya lɔŋɛ ekpa n sa menyi be basa nɛ baa bɛta a ba na! Men lɔŋɛ ekpagboŋ nɛ ajembu e sa maa wɔ kumo so. Kumo be kaman nɛ men yili tuta nɛ k baa la tɔɔnɛ n sa efuli pɔtɛana na nɛ b tiŋ n wu ekpa m bɔla so.

¹¹ Kusɔ nɛ Enyɛnpe Ebɔrɛ na bee kaŋɛ nsaa sha fanɛ durnya to be basa kikɛ e nu nde: “Kaŋɛ basa nɛ b wɔ Jerusalɛm to fanɛ Enyɛnpe Ebɔrɛ na bee ba nɛ e ba mɔlga bumo. Men keni, basa nɛ e sɔ n yige na nɛ e kɔ a ba.”

¹² Kumo be kaman nɛ b baa tre menyi, “Ebɔrɛ be Basa Cheembi.” Ŋko Basa nɛ Enyɛnpe Ebɔrɛ na mɔlga. Baaŋ baa tre Jerusalɛm “Kadegboŋ nɛ Ebɔrɛ mɔlga.” Ŋko “Kadegboŋ nɛ basa bɔlɔ kumo to.”