Aizaaya 6 - EBƆRƐ BE KAWƆL

Ebɔrɛ ka tre Aizaaya nɛ e baa kaa la anebi be asheŋ

¹ Kafɛ nɛ ewura Uzzaya wu na nɛ ŋ ku bɔrɛdare n wu Enyɛnpe Ebɔrɛ na nɛ e tase mbe kuwurputi so kemaŋkura nɛ bunyanso. Mbe kuwurpiŋi daŋ sɔ bɔrɛlambu na be kaplɛkama nna.

² Nɛ asɔbɔya keniso nɛ baa suse so fanɛ edɛ be adondulombi na yili ŋ kulti mo. Bumo be ekama daa kɔ mbuibi be aba ashe nna. Asɔbɔya na be ekama daŋ ta mbe mbuibi be aba anyɔ nna m buu mbe anishiakpa so nseŋ ta anyɔ m buu mbe eyur so nseŋ ta anyɔ nɛ a ka na a firgi.

³ Bumo alɛ daa ponte awɔrso nna a shoŋi abar a kaŋɛ le: “Enyɛnpetale Ebɔrɛ na nawule e du cheembi! Mbe kemaŋkura e bɔlɔ durnya kikɛ nyam to.”

⁴ Asɔbɔya keniso na be ebɔl be awɔr na daŋ shin nɛ bɔrɛlambu na be gbaltɔlase daa gbuŋgbuŋ nna, nɛ edishi malɛ sɔ kumo kikɛ to.

⁵ Ndoŋ nna nɛ ŋ kaŋɛ le: “Tama maaŋ naa wɔtɔ n sa ma nna na! Asheŋ maaŋ nyalɛ n sa ma, ŋkpal manɛ so, kamalga kikɛ nɛ k beeŋ lar ma kɔnɔ to la kulubi nna. Ma alɛ nɛ basa nɛ bumo be mmalga kikɛ la alubi e wɔtɔ, ama ma alɛ wu Enyɛnpetale Ebɔrɛ na kenishiso.”

⁶ Kumo be kaman nɛ asɔbɔya na be eko ta beterɛ n lara kejanwulɛbi ashi ebɔrɛso be bɔrɛsure na so n firgi ŋ gbelge to m ba

⁷ beta ma kɔnɔpurbi nseŋ kaŋɛ le: “Kede beta fo kɔnɔpurbi nna na. Fo nya alubi be ketampaŋ nsaa maŋ naa la esa nɛ e wora n jija nna na.”

⁸ Kede be kaman nɛ n nu Enyɛnpe Ebɔrɛ na ka kaŋɛ le: “Wanɛ nɛ meeŋ shuŋi? Wanɛ e naaŋ baa la anyi be kabɔ?” Nɛ n shuli ŋ kaŋɛ: “Meeŋ yɔ! Shuŋi ma!”

⁹ Ndoŋ nna nɛ e kaŋɛ ma fanɛ n ta kubɔya ere n ya sa mbe basa. E yɛ “Kanaŋkama nɛ men nu asheŋ gba, menyi maaŋ pin amo to. Kanaŋkama malɛ nɛ men keni asheŋ, menyi maaŋ pin kusɔ nɛ k bee wora na to.”

¹⁰ Kumo be kaman nɛ e naŋ kaŋɛ ma le: “Shin nɛ basa ere be nfɛra e mel to nɛ bumo be asoe e ti nɛ bumo be anishi e tan, saŋɛ na so b maaŋ baa wu ŋko a nu ŋko a pin asheŋ to. Nɛ mannɛ aloŋ, baaŋ baa wu ŋko a nu ŋko a pin asheŋ to nseŋ bɛta m ba ma kutɔ m ba nya kechɛ.”

¹¹ Ndoŋ nna nɛ m bishi Enyɛnpe Ebɔrɛ na le: “Jemanɛ mo nɛ kede beeŋ fo ekar?” Nɛ e kaŋɛ ma le: “Jemanɛ nɛ ndegboŋana na beeŋ mur nɛ amo to be nwuana e ka a yil fuloŋ nɛ amo to be adɔsawule e dese jiga na nɛ k beeŋ fo ekar.

¹² Meeŋ yɛr basa na kakpa wɔfɔ nseŋ shin nɛ kasawule na kikɛ e ki jiga a dese fuloŋ.

¹³ Basa kudu to be esa koŋwule gba ka kasawule na so, mo alɛ gba beeŋ mur. E beeŋ ki fanɛ kedibi gboŋgboŋi nɛ b ku n lɛ be keyimu.” (Keyimu na yili n sa Ebɔrɛ be basa ka beeŋ naŋ fara kepopɔr to nna.)