Aizaaya 59 - EBƆRƐ BE KAWƆL

Anebi na ka malga ŋ gbiti basa na be asheŋ lubi be asheŋ

¹ Men sa maa fɛ fanɛ Enyɛnpe Ebɔrɛ na pɔ nna ga so nɛ e maaŋ tiŋ m mɔlga menyi ŋko mbe asoe ti nna so nɛ e maaŋ tiŋ n nu kushu nɛ menyee shu a fin kechɛto na!

² Menyi be alubi e barga menyi nɛ men be Ebɔrɛ be kefɛato. Amoso nɛ e maa nu menyi be kabɔrɛkule na.

³ Ŋkpal manɛ so, menyi be mmalga kikɛ la efɛsheŋ nna nɛ menyi be ŋkre kikɛ la kebagato nɛ kelantokɔ be asheŋ. Basa be kamɔ damta so, ŋklaŋ gbiti menyi be enɔana nna.

⁴ Men baŋ yɛra asheŋ demujikpa gba, men maa nya kashenteŋ ashi menyi be edemu be keji to. Efɛ nɛ menyee ku a ji lar edemuji na to. Basa be keji awurfoŋ be ŋkre e wɔ menyi to nɛ menyee wora a bɔlɔ so.

^5-6 Ŋkre lubi nɛ menyee kre na la kɔrtɔ nna fanɛ awɔ lubi be afule. Efule na be kekama bee bure kuwɔ nna! Ama menyi be ŋkre na maaŋ lɔŋɛ shɛŋ n sa menyi. A du fanɛ esa ka maaŋ tiŋ n ta enansatata n lue wajɛ nna!

⁷ Jemanɛ kikɛ asheŋ lubi nɛ menyee kre nsaa nya manaŋ a wora amo. Basa nɛ b maŋ wora shɛŋ be kemɔ maŋ du menyi so kpakpa. Basa nɛ asɔ be kejija n lɛ nɛ kemur nɛ menyee yige kaman ashi kaplɛkama nɛ men yɔ.

⁸ Menyi maŋ nyi kananɛ menyi nɛ beko beeŋ tiŋ n chena abar so nɛ kayurwushi, ŋko kananɛ baa ji kashenteŋ a sa basa pɔtɛ. Ekpaana nɛ menyee bɔla so a wora asheŋ kikɛ maŋ niŋi nɛ menyi be bebɛsopo malɛ maaŋ tiŋ n nya kayurwushi kebaawɔtɔ to kikɛ.

Basa ka bugi to ŋ kaŋɛ bumo be alubi be asheŋ

⁹ Kede be kaman nɛ basa na kaŋɛ le: “Naniere nɛ an pin kusɔ nɛ k ba nɛ Ebɔrɛ maa mɔlga anyi ashi basa nɛ baa kɔrfɛ anyi na be enɔ to. An daa tama fanɛ anyeeŋ baa na kefulto to nna, ama tentembiri e kulti anyi n wɔtɔ

¹⁰ nɛ anyee la a fin ekpa fanɛ etanpo. Kapiidi gba anyi maa wu ekpa to nsaa fiti fanɛ kanyɛso ŋko fanɛ an ka wɔ nchaŋ to na.

¹¹ Anyee munto nna fanɛ eshishiri nsaa shu fanɛ ali na. Anyi alɛ daa tama fanɛ Ebɔrɛ beeŋ mɔlga anyi ashi kanyaŋ nɛ alubi to, ama loŋ maŋ wora.

¹² An wora alubi damta ŋ gbiti fo, Enyɛnpe Ebɔrɛ na. Anyi be alubi bee ji a bri anyi nna, nɛ anyi alɛ nyi amo kikɛ nyam be asheŋ.

¹³ An lar fo kaman nseŋ kini fo a maa shuŋ fo. Anyi alɛ kɔrfɛ beko ga nseŋ shile fo. Anyi be nfɛra fɛso gba la kafulesheŋ nna nɛ anyi be mmalga malɛ maŋ la kashenteŋ.

¹⁴ Keji asheŋ nɛ amo be ekpa so maŋ naa wɔtɔ, nɛ kewora kusɔ nɛ k daga gba maŋ wɔ anyi be kebaawɔtɔ to. Keji kashenteŋ kelɔnɛ so gba maŋ naa wɔtɔ ashi anyi to kuraa.

¹⁵ Kashenteŋji ka maŋ naa wɔtɔ so, bekama nɛ b yige asheŋ lubi be kewora na bee luri asheŋ to nna.” Enyɛnpe Ebɔrɛ na b kagbene daa maŋ fuli mo ŋkpal keji asheŋ nɛ amo be ekpa so ka maŋ naa wɔtɔ so.

Enyɛnpe Ebɔrɛ ka beeŋ mɔlga mbe basa be asheŋ

¹⁶ E ka wu fanɛ esa kikɛ maŋ wɔtɔ nɛ e wora kusɔ ko a laŋɛ kumo be kaplɛa so nɛ k jija mbe kagbene ga n ti so. Amoso e beeŋ bɔla mo gbagba be eleŋ so ŋ kɔ n suge basa nɛ baa kɔrfɛ na n yige nseŋ shin nɛ b kɔ m pɔɔ so.

¹⁷ E beeŋ ta keji asheŋ nɛ amo be ekpa so m buu fanɛ enapo be kebɛlso be kekpaŋkale nɛ kumɔlga malɛ gba m buu fanɛ enapo be kebɛlso be kekpaŋwuro. Mo alɛ beeŋ naŋ ta kewora asheŋ ekpa nɛ k daga so kenishipereso fanɛ kusɔbuuso m buu nseŋ sɔ basa nɛ baa ji awurfoŋ be kɔnɔ so ŋ ka kulubi kukɔ.

¹⁸ Enyɛnpe Ebɔrɛ na beeŋ gberge mo doŋana nɛ b wɔ kufɔ nɛ bumo nɛ b taga to kikɛ kusoe agbo so, ŋkpal kusɔ nɛ b wora mbe basa so.

¹⁹ Yili epeŋilarkpa m ba choŋ epeŋitɔrkpa, ekama beeŋ baa ŋana Enyɛnpe Ebɔrɛ na nɛ mbe eleŋgboŋ nseŋ bunyaŋ mo. E beeŋ ba fanɛ lɔr to be nchu nɛ a bee shile eleŋso ŋko afugboŋ nɛ a bee ber eleŋso na.

²⁰ Ade kikɛ be kaman nɛ Enyɛnpe Ebɔrɛ naŋ kaŋɛ mbe basa le: “Meeŋ ba Jerusalɛm to m ba kɔ n sɔ menyi, Jeekɔb be kaman to ebi nɛ men lar menyi be alubi kikɛ to.

²¹ Ma alɛ bee nase kɔnɔ nna fanɛ meeŋ sa menyi ma Kiyoyu nɛ keŋini nɛ a baa wɔ menyi to mbaanaayɔ. Yili kabre a yɔ, menyeeŋ baa wora ma kasonu nsaa ŋini menyi be mbia nɛ kaman to ebi nɛ bumo alɛ gba e baa wora ma kasonu mbaanaayɔ.”