Aizaaya 58 - EBƆRƐ BE KAWƆL

Kashenteŋto be ekishi be asheŋ

¹ Enyɛnpe Ebɔrɛ yɛ: “Boŋ to awɔrso ga ŋ kaŋɛ ma basa Israɛlebi na bumo be alubi be asheŋ!

² Baa shuŋ ma karechɛ kikɛ nna a ŋini fanɛ b pere kenishi a sha kepin ma ekpa nseŋ wora ma mbraana kasonu fanɛ efuli nɛ k bee wora kusɔ nɛ k daga. B yɛ n sa bumo mbraana nɛ a maa kpɛa basa to nseŋ naa leŋ bumo to a kaŋɛ fanɛ bumo kebaashuŋ ma na bee wora bumo ebel nna.”

³ Kumo be kaman nɛ basa na bishi le: “Manɛ nna nɛ anyee kishi nɛ Enyɛnpe Ebɔrɛ na maa wu fanɛ anyee kishi? Nɛ manɛ nna nɛ anyee bar anyi be amu kaseto nɛ mbe lakal maŋ wɔ anyi so?” Ade be kaman nɛ Enyɛnpe Ebɔrɛ na malɛ kaŋɛ bumo le: “Kashenteŋ na e la fanɛ, jemanɛ kikɛ nɛ menyee kishi menyi gbagba be aparsheŋ nɛ menyee wora nsaa mɛaŋ menyi be beshumpoana.

⁴ Menyi be ekishi bee shin nɛ menyee ki nyaŋnyaŋ nna nɛ menyee bile a tege abar nsaa bri abar. Men tama fanɛ le be ekishi beeŋ tiŋ n shin nɛ n nu menyi be kabɔrɛkule a?

⁵ Men baŋ kishi kikɛ, menyee ta menyi be amu nna a wɔtɔ awurfoŋ to. Menyi alɛ naa wora asheŋ nna fanɛ bebɔlpo, a kurgi amu a yuu to fanɛ ayu ka bel n chulgi na nseŋ naa buu nli to be asɔbuuso a dese nsunɔ to a ŋini men ka bar menyi be amu kaseto. Le nɛ menyee tre ekishi nɛ k bee par ma nna a?

⁶ Ekishi nɛ k bee par ma a ŋini menyee ka bee shuŋ ma kashenteŋto e la men ka beeŋ lara kanyaŋ nɛ kebaakɔrfɛ basa nɛ b maŋ wora shɛŋ nsaa wɔ kabuti to na nseŋ shin nɛ ekama e nya a wora asheŋ yila yila so.

⁷ Men baa chige menyi be ajibi to a sa basa nɛ b maŋ kɔ nɛ b ji nsaa sa bumo nɛ b maŋ kɔ edesekpa kakpa nɛ b dese ashi menyi peana. Menyi alɛ e naa chɛ basa nɛ b maŋ kɔ asɔbuuso to, a sa bumo asɔbuuso nsaa maa kini kebaachɛ men kurgepoana to.

⁸ Aloŋ nɛ ma kuwɔrwu beeŋ nyaŋɛ n yuu menyi so fanɛ kachipurso be epeŋi, nɛ menyi alɛ e naaŋ nya menyi be alɔ be kechɛ manaŋ manaŋ. Ma nɛ menyi beeŋ baa wɔtɔ nɛ m baa mɔlga menyi nsaa kuŋ menyi ekpa kama so.

⁹ Nɛ men baŋ kule ma kusɔ kama, meeŋ nu menyi be kekule. Nɛ men tre ma malɛ meeŋ shuli menyi be ketre na! Nɛ men yige kanyaŋ nɛ nfɛlso be kebaawɔtɔ nɛ mmalga lubi be kebaamalga

¹⁰ nsaa sa basa nɛ akoŋ kɔ ajibi nseŋ naa chɛ bumo nɛ asheŋ tir bumo to, kumo ere kanyɛso beeŋ ki fanɛ kapiidi n sa menyi.

¹¹ Ma, Enyɛnpe Ebɔrɛ na malɛ beeŋ baa juŋkpar menyi nsaa sa menyi asɔ lela nɛ a beeŋ baa kukwe menyi jemanɛ kikɛ. Ma alɛ beeŋ baa sa menyi eleŋ nɛ alenfia a ti so. Menyi alɛ beeŋ baa du fanɛ kambɔl nɛ k bee nya nchu nɛnɛ ŋko kabombi nɛ k maa wɔlto kikɛ na nna.

¹² Menyi be basa beeŋ lɔŋɛ m pɔr mboŋ nɛ e bure a dese n chɛr na n yili amo be egbaltɔlase dra na so. Saŋɛ na so ekama beeŋ pin fanɛ men la basa nɛ baa lɔŋɛ egbalana nɛ alambure a pɔr nna.”

Kebaakeni kewushiachɛ na a bɔlɔ kenishi be tɔnɔ be asheŋ

¹³ Ade kikɛ be kaman nɛ Enyɛnpe Ebɔrɛ na naaŋ kaŋɛ le: “Nɛ men ta kewushiachɛ na fanɛ kachɛ cheembi a maa wora menyi gbagba be aparsheŋ fanɛ kebaayɔ nde ŋko a shuŋ kushuŋ be yiri kikɛ ŋko a malga mmalga jiga loŋ be kachɛ na,

¹⁴ menyeeŋ nya kagbenefuli nɛ k shi kebaashuŋ ma, Enyɛnpe Ebɔrɛ na to. Meeŋ shin nɛ men nya bunyaŋ ashi durnya be kaplɛkama nɛ menyi alɛ e naŋ ji kasawule nɛ n sa menyi nananyɛn Jeekɔb na be ebel. Ma Enyɛnpe Ebɔrɛ e kaŋɛ na!”