Aizaaya 56 - EBƆRƐ BE KAWƆL

Efuli pɔtɛana so ebi ka beeŋ ki Ebɔrɛ be basa be asheŋ

¹ Nɛ Enyɛnpe Ebɔrɛ na kaŋɛ mbe basa le: “Men baa wora kusɔ nɛ k daga nseŋ bɔla ekpa, ŋkpal manɛ so, k maaŋ chɛr nɛ m ba mɔlga menyi.

² Meeŋ nɛfa bekama nɛ baa keni kewushiachɛ na a bɔlɔ kenishi nsaa bɛ kumo so na. Ma alɛ beeŋ nɛfa bekama nɛ b maa wora asheŋ lubi.”

³ Efɔ kama nɛ e ba tu Enyɛnpe Ebɔrɛ na be basa a wɔtɔ e sa maŋ kaŋ kaŋɛ fanɛ: “Enyɛnpe Ebɔrɛ na maaŋ shuli nɛ n tu mbe basa a shuŋ mo.” Enyɛn kama nɛ b lara mbe awulbi be bibi e sa maŋ kaa fɛ fanɛ e ka maaŋ tiŋ ŋ kurge bibi so, mo ere maaŋ tiŋ n ti Ebɔrɛ be basa so.

⁴ Le nɛ Enyɛnpe Ebɔrɛ na bee kaŋɛ amodoŋwura: “Fo baa keni ma kewushiachɛ na a bɔlɔ kenishi nsaa wora kusɔ nɛ k bee par ma nsaa bɛ ma kɔnɔkoŋwule be ŋkre na so kashenteŋto,

⁵ kumo ere baaŋ baa nyiŋi fo ketre ma bɔrɛlambu to nɛ ma basa to n chɛr a chɔ fo ka beeŋ baa kɔ mbia gba. Basa maaŋ teŋ fo so kikɛ.”

⁶ Kumo be kaman nɛ Enyɛnpe Ebɔrɛ na kaŋɛ befɔ nɛ b ti mbe basa so a sha mo nsaa bɛ kewushiachɛ na so nseŋ naa bɛ mbe kɔnɔkoŋwule be ŋkre na so kashenteŋto na le:

⁷ “Meeŋ bar menyi ma kebee cheembi nɛ baa tre Zayɔn nɛ k wɔ Jerusalɛm na so m ba sa menyi kagbenewushi ashi ma bɔrɛlambu to. Ma alɛ beeŋ sɔ menyi be esarga nɛ menyeeŋ lara ashi ma bɔrɛsure so. Ma bɔrɛlambu beeŋ baa la kabɔrɛkule be kakpa n sa efuli kama so be basa.”

⁸ Enyɛnpetale Ebɔrɛ nɛ e keta mbe basa Israɛlebi n shi kenyaya to ashi efuli pɔtɛ wɔfɔ so m ba na e nase kɔnɔ fanɛ e beeŋ bar basa pɔtɛ m ba ti bumo so.

Ebɔrɛ ka beeŋ gberge Israɛl be bejuŋkparpo kusoe be asheŋ

⁹ Enyɛnpe Ebɔrɛ na e kaŋɛ efuli pɔtɛana so ebi fanɛ b ba fanɛ kupuŋ to be asɔbɔya lubi m ba mur mbe basa.

¹⁰ E yɛ: “Bejuŋkparpo nɛ b daga kekpele ma basa kusoe na kikɛ tan nna! B maŋ nyi shɛŋ. B du fanɛ njɔnɔ nɛ b maa gbu nna. Bumo peya e la kebaadese a di a ku edare. Baa sha edi nna ga!

¹¹ Bejuŋkparpo na du fanɛ njɔnɔ nɛ baa sha ajibi ga nna. B maa ji a moɛ kikɛ. Bumo alɛ maa pin asheŋ to nsaa wɔtɔ a wora asheŋ nɛ a bee par bumo nawule.

¹² Kusɔ nɛ basa nɛ baa boo nsa bee kaŋɛ e la fanɛ men shin nɛ an ya nuu nsa m boo kananɛ anyee sha. Echefo peya e baa chɔ kabre peya!”