Aizaaya 48 - EBƆRƐ BE KAWƆL

Ebɔrɛ ka la echefoso be Enyɛnpe be asheŋ

¹ Israɛl be basa, men nu nfe! Menyi nɛ men la an nananyɛn Jeekɔb be kanaŋ to ebi nseŋ shi Juda be yiri to na nɛ n de na. Menyi e naa ta Enyɛnpe Ebɔrɛ na be ketre a bɔ ntaŋ nsaa kaŋɛ fanɛ menyi ere bee shuŋ Israɛl be Ebɔrɛ na nna, ama k maŋ la kashenteŋ nɛ k shi menyi be ŋgbene to.

² Menyee puchi a kaŋɛ fanɛ men la Jerusalɛm, kadegboŋ cheembi na to be basa nsaa ta menyi be amu a to Israɛl be Ebɔrɛ nɛ e la Enyɛnpetale Ebɔrɛ na so nna.

³ Kumo be kaman nɛ Enyɛnpe Ebɔrɛ na kaŋɛ Israɛlebi na le: “Dra dra kikɛ nɛ ŋ kaŋɛ kusɔ nɛ k beeŋ wora; epul na to malɛ nɛ n shin nɛ loŋ wora.

⁴ N nyi menyi ka la amu kpakpaso wuraana, menyi be amu du kpakpa nna fanɛ abɛlso, nɛ menyi be nsɔto malɛ du kpakpa fanɛ danyaŋ.

⁵ Amoso nɛ ŋ kaŋɛ menyi asheŋ ere dra dra kikɛ na, saŋɛ na so nɛ a kaŋ wora m bɔlɔ so, menyi maaŋ kaŋɛ fanɛ agbir nɛ menyee shuŋ na e shin nɛ a wora m bɔlɔ so.

⁶ Asheŋ nɛ ŋ kaŋɛ menyi na kikɛ wora m bɔlɔ so. A daga fanɛ men shuli so fanɛ kashenteŋto nɛ e wora m bɔlɔ so. Naniere meeŋ naŋ kaŋɛ menyi asheŋ popɔr nɛ e beeŋ ba. E la asheŋ woraso nɛ m maŋ naŋ lara ŋ ŋini kikɛ nna.

⁷ Naniere nawule nɛ mee shin nɛ a bee wora. Kesheŋ ere maŋ naŋ wora ŋ ku so kikɛ. Nɛ k daŋ wora ŋ ku so nna, menyi daa beeŋ kaŋɛ fanɛ men nyi kumo be asheŋ.

⁸ N nyi menyi ka la basa nɛ esa maaŋ tiŋ n yirda, nseŋ naa la basa nɛ baa lar ma kaman, yili jemanɛ nɛ n ta menyi ŋ ki efuli n sa ma kumu na. Amoso nɛ menyi maŋ wora ania nɛ men nu kusɔ nɛ ŋ kaŋɛ menyi na.

⁹ Ŋkpal ŋ ka bee sha basa e kpaŋ ma ketre so, nɛ mee pɛ ma agbo nsaa maŋ mur menyi na.

¹⁰ Awurfoŋ nɛ n ta n wora menyi ŋ keni, fanɛ kananɛ baa ta edɛ a lɔŋɛ gbiti so na.

¹¹ Ŋ gbagba so nɛ mee wora le na. M maa sha fanɛ ma ketre e jija nɛ basa e baa keni ma jiga, ŋko n shin nɛ ma nɛ esa ko e chige ma kemaŋkura to. Ma kemaŋkura la n nawule peya nna.”

Enyɛnpe Ebɔrɛ ka lara ewura Sairus fanɛ ejuŋkparpo be asheŋ

¹² Kede be kaman nɛ Enyɛnpe Ebɔrɛ naŋ kaŋɛ le: “Men nu nfe, menyi Israɛlebi nɛ men la ma basa nɛ n tre! N nawule e la Enyɛnpe Ebɔrɛ. Ma e la sososo nɛ lalaloge.

¹³ Ŋ gbagba be enɔ nɛ n ta n to durnya, nseŋ shin nɛ awɔlpa parga to n sɔ kaplɛkama. Kusɔ kama nɛ m baŋ yili n sa amo, e bee nya manaŋ a wora ma kasonu epul to nna.

¹⁴ Men kikɛ e gama abar so nseŋ nu nfe! Agbirana na be kekama maaŋ tiŋ n wu ŋ kaŋɛ fanɛ esa nɛ n lara na e naaŋ kɔ Babilɔn be efuli kena, ŋko n wu ŋ kaŋɛ fanɛ e beeŋ wora kusɔ nɛ ŋ kaŋɛ fanɛ e wora na.

¹⁵ Ma e lara mo nseŋ n tre mo; ma alɛ beeŋ juŋkpar mo n shin nɛ e kɔ m pɔɔ so.

¹⁶ Men firgi n taga ma to naniere nseŋ nu nfe! Sososo na kikɛ nɛ m bugi to ŋ kaŋɛ kusɔ kama nseŋ shin nɛ ma mmalga kikɛ bɔlɔ so kashenteŋto.” Enyɛnpetale Ebɔrɛ na e bɔla mbe Kiyoyu be eleŋgboŋ so n shuŋi ma.

Enyɛnpe Ebɔrɛ na be ŋkre nɛ e kɔ n sa mbe basa be asheŋ

¹⁷ Kusɔ nɛ Enyɛnpe, Israɛl be Ebɔrɛ cheembi, nɛ e mɔlga menyi na kaŋɛ nde: “Ma e la Enyɛnpe menyi be Ebɔrɛ, nɛ mee sha keŋini menyi asheŋ ŋkpal menyi be nɛnɛ so, nseŋ juŋkpar menyi ekpa nɛ menyeeŋ baa bɔla so a wora asheŋ.

¹⁸ K daa beeŋ par ma ga fanɛ men ka beeŋ bɛ kusɔ nɛ n yili n sa menyi so! Aloŋ daa beeŋ shin nɛ men nya nɛfa fanɛ kananɛ kabombi bee nya nchu nsaa maa wɔlto na. Men daa beeŋ baa kɔ a pɔɔ so fanɛ kananɛ ketili bee ku teku so a ba kedeŋi so na.

¹⁹ Menyi be kaman to ebi beeŋ wora keshi fanɛ shishɛr, nɛ ma alɛ e shin nɛ b sa maŋ mur kikɛ

²⁰ Naniere, men lar Babilɔn be efuli so! Men ta kayurji a yɔ. Men shin nɛ menyi be ŋgbene e fuli menyi nɛ men baa boŋ to awɔrso a kaŋɛ ekama le: ‘Enyɛnpe Ebɔrɛ na kɔ n suge anyi, Israɛlebi nɛ an la mbe anya na!

²¹ E juŋkpar anyi m bɔla keshishɛrsawule so nseŋ shin nɛ kefalta pante n lar nchu nɛ an nuu n tuge achukoŋ.

²² Enyɛnpe Ebɔrɛ na nase kɔnɔ fanɛ alubiworapoana maaŋ nya kayurwushi kikɛ.’ ”