Aizaaya 46 - EBƆRƐ BE KAWƆL

¹ “Babilɔn be efuli so be agbirana be eleŋ fo ekar! Jemanɛ ko Babilɔn ebi daa shuŋ agbir nɛ baa tre Bɛl nɛ Nebo na nna. Ama naniere amo nɛ b bela n deŋi ekurma so, nɛ a ki esulɔ a deŋ asɔbɔya nɛ a gben be mman na.

² Agbirana na maaŋ tiŋ m mɔlga amo be amu. Amo nɛ bedoŋ kɔ n suge a yɔ efuli pɔtɛ so na. Babilɔn be agbirana be eleŋ fo ekar nna na!

³ Israɛl be basa, nɛ men la ma basa nɛ b ka a wɔ ŋkpa to, men nu nfe! Jemanɛ nɛ b kurge menyi m ba fo mbre na kikɛ nɛ mee keni menyi so.

⁴ Ma e la menyi be Ebɔrɛ nsaa beeŋ keni menyi so n ya fo fanɛ menyi ka beeŋ ya bel n fuli amu. Ma e to menyi nsaa keni menyi so; meeŋ chɛ menyi to nseŋ kuŋ menyi nɛ shɛŋ shɛŋ maaŋ wora menyi.”

⁵ Kede be kaman, nɛ Enyɛnpe Ebɔrɛ na naŋ kaŋɛ le: “Menyi maaŋ tiŋ n ta ma m ber esa kikɛ, ŋkpal manɛ so, esa kikɛ maŋ du fanɛ ma.

⁶ Basa ko bee ber ebɔyɛpo paa nna, a sa bumo shuwa nɛ gbiti fanɛ b lɔŋɛ agbirana n sa bumo nɛ b baa shuŋ amo.

⁷ Baa kaa sulɔ agbirana na bumo be abatimu so nna n ya ka yili amo be eyilikpa nɛ e maa nite. Nɛ esa baŋ yɔ amo ase n ya malga amo kutɔ gba, a maaŋ tiŋ n tuge mo ŋko m mɔlga amodoŋwura ashi tɔrɔ kikɛ to.

⁸ Menyi, basa nɛ men lar ma kaman ere, men shin nɛ demu ere e baa wɔ menyi be nfɛra to, nɛ men baa nyiŋi kumo jemanɛ kikɛ.

⁹ Men baa nyiŋi kusɔ nɛ k wora dra na, nseŋ pin to fanɛ n nawule e la Ebɔrɛ. Ekama maŋ du fanɛ ma.

¹⁰ Pɔɛŋ nɛ kesheŋ kikɛ e wora, nɛ ma ere tiŋ n wu kumo ŋ kaŋɛ. N teŋ kaŋɛ fanɛ ma ŋkre beeŋ wora m bɔlɔ so, ma alɛ beeŋ wora kusɔ nɛ ŋ kre kewora kikɛ.

¹¹ Mee tre esa ko nna nɛ e shi epeŋilarkpa, m ba manaŋ fanɛ kusore ka fuu kusɔ na. E beeŋ ba wora kusɔ nɛ mee sha n sa ma. Kusɔ nɛ ma, Enyɛnpe Ebɔrɛ na kaŋɛ, e naaŋ wora.

¹² Menyi, basa nɛ men be ŋgbene du kpakpa, nɛ menyi nɛ kumɔlga barga abar na e nu nfe!

¹³ Meeŋ ba mɔlga menyi. Ma nɛ menyi maaŋ naŋ barga abar. M maaŋ naŋ chɛr nseŋ ba mɔlga menyi. Meeŋ mɔlga basa nɛ b wɔ Jerusalɛm to nseŋ shin nɛ Israɛl be efuli na e nya kemaŋkura.”