Aizaaya 45 - EBƆRƐ BE KAWƆL

Enyɛnpe Ebɔrɛ ka sa ewura Sairus kushuŋ be asheŋ

¹ Enyɛnpe Ebɔrɛ na e ta Sairus ŋ ki Pɛshiya be efuli so be ewura! E lara mo nna nɛ e kɔ m pɔɔ efuliana so nseŋ lara bewura ashi kuwurji to. Enyɛnpe Ebɔrɛ na beeŋ bugi ndegboŋ be mbunagboŋ kikɛ n sa mo nseŋ kaŋɛ mo le:

² “Ŋ gbagba e juŋkpar n dɛdɛ abeegboŋ nɛ abeebi kikɛ so ashi fo ekpa to. Meeŋ bure ndegboŋana na be danyaŋ be mbunagboŋ nseŋ buri abɛlso tenteŋ nɛ b kɔ a ber mbunagboŋ na so kikɛ to.

³ Ma alɛ beeŋ sa fo asɔ lela nɛ a ŋana ashiri be mboŋ, nɛ basa bee sha amo ga na. Saŋɛ na so feeŋ pin fanɛ ma e la Enyɛnpe Ebɔrɛ na; nseŋ naŋ pin fanɛ Israɛl be Ebɔrɛ na e ti fo ketre n tre fo.

⁴ Ma e lara fo fanɛ fo chɛ ma anya, Israɛlebi to; bumo e la basa nɛ n lara n sa ma kumu. Jemanɛ nɛ fo maŋ nyi ma na gba, nɛ n shin nɛ fo nya kemaŋkura.

⁵ Ma e la Enyɛnpe Ebɔrɛ na; Ebɔrɛ kikɛ maŋ naa wɔtɔ n ti ma so. Fo ka maŋ nyi ma ere gba, ŋ kraa beeŋ wora fo eleŋ to.

⁶ N wora le nna nɛ basa kikɛ ashi durnya to e pin fanɛ ma e la Enyɛnpe Ebɔrɛ na, nseŋ naŋ pin fanɛ Ebɔrɛ kikɛ maŋ naa wɔtɔ n ti ma so.

⁷ Ma e to kefulto nɛ tentembiri kikɛ. Ma e naa nɛfa nseŋ naa bar kumu lubi gboŋgboŋi basa so. Ma, Enyɛnpe Ebɔrɛ na e naa wora ade kikɛ.

⁸ Meeŋ shin nɛ kewora asheŋ niŋiso e shi ebɔrɛso m ba kasawule so fanɛ bɔrɛchu na, m ba shin nɛ kamooji nɛ kashenteŋji e sɔ kaplɛkama. Ma Enyɛnpe Ebɔrɛ na e naaŋ shin nɛ le e wora.

Ebɔrɛ ka la kasɔto nɛ adrasheŋ be Enyɛnpe be asheŋ

⁹ Israɛl, fo maŋ kɔ ekpa nɛ fo tu fo etopo n ji emɔrɔ. Fo du fanɛ kapuliya nɛ mpuliya pɔrpo ta ebɔ m pɔr nna. Ebɔ na maa bishi epɔrpo na le: ‘Manɛ nɛ fee wora?’ Kapuliya na malɛ gba maa bile asheŋ a kaŋɛ fanɛ epɔrpo na maŋ nyi mbe kushuŋ.

¹⁰ Esa ko wɔtɔ nɛ e tiŋ m bishi basa nɛ b kurge mo le: ‘Manɛ nna nɛ men kurge ma kananɛ n du ere?’ ”

¹¹ Kusɔ nɛ Enyɛnpe, Israɛl be Ebɔrɛ cheembi nɛ e to kusɔ kikɛ na kaŋɛ nde: “Menyi maŋ kɔ ekpa nɛ men bishi ma basa Israɛlebi be asheŋ ma kutɔ, ŋko ŋ kaŋɛ ma kusɔ nɛ k daga fanɛ n wora!

¹² Ma e to durnya nseŋ to edimɛdi be yiri yiri n wɔtɔ kumo to. Ma eleŋgboŋ so nɛ awɔlpa parga to n sɔ kaplɛkama nɛ epeŋi nɛ kufɔl nɛ achɛkpabi kikɛ wɔ kumo so na.

¹³ Ŋ gbagba e we n wɔtɔ ewura Sairus nɛ e koso a wora kusɔ nɛ mee sha nɛ asheŋ e nyalɛ. Meeŋ shin nɛ asheŋ e baa du pɔtɔ pɔtɔ n sa mo. Saŋɛ na so e beeŋ lɔŋɛ ma kadegboŋ nɛ baa tre Jerusalɛm na m pɔr, nseŋ sɔ ma basa n yige nɛ b nya bumo be amu. Esa kikɛ maŋ ber mo paa ŋko n sa mo kusɔ ko fanɛ e wora loŋ. Ma, Enyɛnpe Ebɔrɛ e malga na.”

¹⁴ Kede be kaman nɛ Enyɛnpe Ebɔrɛ na naŋ kaŋɛ Israɛlebi na le: “Ijipt nɛ Itiopia be efuliana so be kedamaya beeŋ ki menyeya, nɛ Seba be efuli so be basa tenteŋ na e ki menyi be anya. Menyi beeŋ chɛ bumo ŋgbɛlɛbi ŋ gberge bumo m bɛ menyi be amu so. Baaŋ jɔŋɛ menyi ase nseŋ kaŋɛ le: ‘Ebɔrɛ wɔ menyi kutɔ, mo alɛ nawule e la Ebɔrɛ.’

¹⁵ Israɛl be Ebɔrɛ nɛ e bee mɔlga mbe basa na la Ebɔrɛ nɛ esa maa wu mo kenishiso nna.

¹⁶ Bekama nɛ baa lɔŋɛ agbirana beeŋ ji anishinyɔr nseŋ ŋaba.

¹⁷ Ama Enyɛnpe Ebɔrɛ na mɔlga Israɛl be basa bre, nɛ b kɔ m pɔɔ so mbaanaayɔ. Bumo be basa malɛ maaŋ ŋaba kikɛ.

¹⁸ Enyɛnpe na nawule e la Ebɔrɛ, mo e to ebɔrɛso nɛ durnya nɛ basa wɔ kumo to na. E maŋ to durnya nna nɛ k baa dese fuloŋ fanɛ kiyi.” Mo e kaŋɛ le na: “Ma e la Enyɛnpe Ebɔrɛ, Ebɔrɛ kikɛ maŋ naa wɔtɔ n ti ma so.

¹⁹ Mannɛ ashiri to nɛ m malga ŋko n ta ma ŋkre ŋ ŋana. M maŋ kaŋɛ Israɛl be basa fanɛ, nɛ b fin ma b maaŋ wu ma a. Ma e la Enyɛnpe Ebɔrɛ nɛ e bee ji kashenteŋ na. Kusɔ nɛ k bɔla ekpa nɛ mee kaŋɛ.”

Durnya to nɛ Babilɔn be agbirana be Enyɛnpe be asheŋ

²⁰ Ade be kaman nɛ Enyɛnpe Ebɔrɛ na naŋ kaŋɛ le: “Menyi kama nɛ men ji efute ashi efuli pɔtɛana so, e gama abar so m ba ma anishi to nɛ n ji menyi demu! Men koya m pin fanɛ keshuŋ agbir nɛ b ta ndibi n lɔŋɛ maŋ kɔ tɔnɔ, nɛ kebaato nchu agbir ase maŋ kɔ kechɛto kikɛ kuraa.

²¹ Men ba demujikpa! Bekama nɛ baaŋ tiŋ m malga ŋ kuŋ bumo be amu na e to abar jina. Dra dra na kikɛ, wanɛ e tiŋ ŋ kaŋɛ kusɔ nɛ k beeŋ wora? Mannɛ ma Enyɛnpe Ebɔrɛ nɛ e mɔlga mbe basa na e tiŋ ŋ kaŋɛ a? Ebɔrɛ kikɛ maŋ naa wɔtɔ n ti ma so.

²² Mee pla enɔ a tre durnya kikɛ to be basa nna, nɛ b kilgi m ba ma kutɔ nseŋ nya kumɔlga. N nawule kpeŋ e la Ebɔrɛ a wɔtɔ.

²³ Ma kɔnɔ naseso la kashenteŋ nna, kumo alɛ maa chɛrga. M bɔ ntaŋ n nase kɔnɔ fanɛ ekama beeŋ ba gbir ma kumuli nseŋ shuŋ ma, Enyɛnpe Ebɔrɛ na.

²⁴ Bumo alɛ beeŋ kaŋɛ fanɛ n nawule kutɔ nɛ esa beeŋ tiŋ n nya kekɔmpɔɔso nɛ eleŋ. Ama bekama nɛ b kishi ma na bre beeŋ ŋaba.

²⁵ Ma, Enyɛnpe Ebɔrɛ na e naaŋ mɔlga Israɛl be basa kikɛ, nɛ bumo alɛ e maŋkura ma.”