Aizaaya 38 - EBƆRƐ BE KAWƆL

Ewura Hɛzekaya ka lɔ nseŋ naŋ nya alenfia be asheŋ

¹ Le be jemanɛ ere nɛ kulɔ ko pɛ ewura Hɛzekaya nɛ a daŋ ka gbrɛ nɛ e wu. Ndoŋ nna nɛ anebi Aizaaya nɛ e la Amɔz pibinyɛn na yɔ nɛ e ya bɔ mo so nseŋ kaŋɛ mo le: “Enyɛnpe Ebɔrɛ yɛ fo bela ase n lɔŋɛ fo kusɔ kama n yili nɛnɛ, ŋkpal manɛ so, fo maaŋ naŋ nya alenfia. Bela ase a jo luwu.”

² Ewura Hɛzekaya ka nu loŋ nɛ e kilgi anishi n shoŋi egbal nseŋ kule Ebɔrɛ ŋ kaŋɛ le:

³ “Enyɛnpe Ebɔrɛ, baa nyiŋi kananɛ n daŋ shuŋ fo kashenteŋ nɛ kagbene koŋwule so. Ma alɛ wora ania fanɛ meeŋ baa wora kusɔ kama nɛ fee sha.” Kumo be kaman nɛ e shu ga.

⁴ Ndoŋ nna nɛ Enyɛnpe Ebɔrɛ naŋ kaŋɛ anebi Aizaaya

⁵ fanɛ e naŋ bɛta n yɔ ewura Hɛzekaya kutɔ n ya kaŋɛ mo le: “Ma, Enyɛnpe, fo nananyɛn ewura Deevid be Ebɔrɛ na, nu fo kabɔrɛkule nseŋ wu fo anishichubi na. Meeŋ naŋ shin nɛ fo naŋ ji nfɛ kuduanu n ti so.

⁶ Ma alɛ beeŋ kuŋ fo nɛ Jerusalɛm be kadegboŋ ere ashi Asiriya be ewurgboŋ kutɔ.”

⁷ Nɛ anebi Aizaaya kaŋɛ Ewura Hɛzekaya: “Enyɛnpe Ebɔrɛ na beeŋ sa fo tɔɔnɛ ko a ŋini fanɛ e beeŋ wora m bɔlɔ mbe kɔnɔ naseso so.

⁸ Enyɛnpe Ebɔrɛ na beeŋ shin nɛ kiyoyul nɛ k deŋ atemprembi nɛ ewura Ahaz pɔr na so na e bɛta kaman ateŋgreŋ kudu so.” Ndoŋ nna nɛ kiyoyul na bɛta kaman ateŋgreŋ kudu so, fanɛ kananɛ Enyɛnpe Ebɔrɛ kaŋɛ na.

⁹ Ewura Hɛzekaya ka koso mbe kulɔ na to nɛ e sibɛ kapandi be kashɛ ere:

¹⁰ Le nɛ n daa fɛ ashi ma kagbene to; jemanɛ nɛ ma kebaawɔtɔ daa yil to nɛnɛ na, nɛ n daa shin nɛ n wu n yɔ bubuni to; saŋɛ na so m maaŋ naa wɔ ŋkpa to.

¹¹ N daa maa tama fanɛ meeŋ naŋ wu fo, Enyɛnpe Ebɔrɛ na, ŋko basa nɛ b kraa wɔ ŋkpa to ashi durnya to kikɛ.

¹² Ma ŋkpa daŋ ku so nna nseŋ fo ekar, fanɛ mbolpɔkpapo be wajɛbu nɛ e bɔɔ na, ŋko fanɛ wajɛ nɛ b kraa lue nseŋ ku kumo so ashi kɔrɛ to na. N daa fɛ fanɛ Ebɔrɛ shin nɛ ma ŋkpa loge nna.

¹³ Amoso n daa shu nna a klade ŋkpal ebesa so! K daa du fanɛ buluŋ ka bee buri ma awibi to nna. N daa fɛ fanɛ Ebɔrɛ shin nɛ ma ŋkpa loge nna.

¹⁴ N daa shu nna fanɛ kabɔrɛpɔpɔbi, nseŋ daa naa shu kuwɔr so fanɛ lepɔ na. N daŋ dese nna a keni fo Enyɛnpe Ebɔrɛ na anishito, hale nɛ ma anishi gben, a maŋ naa wu nɛnɛ. Jande, Enyɛnpe Ebɔrɛ, mɔlga ma ashi etɔrɔ ere kikɛ to.

¹⁵ Manɛ nɛ meeŋ naŋ kaŋɛ? Enyɛnpe Ebɔrɛ na e wora ma loŋ. Kagbenejija nɛ ebesa damta e bɔlɔ ma kagbene to, hale m maaŋ tiŋ n di gba kuraa.

¹⁶ Enyɛnpe Ebɔrɛ, fo nawule nɛ meeŋ baa wɔtɔ n sa. Chɛ ma kulɔ ere n shin nɛ n naŋ nya ŋkpa.

¹⁷ Ma nɛnɛ so nɛ fo shin nɛ asheŋ kpakpaso ere tu ma. Ama fo kasha kuŋ ma, nɛ m maŋ wu n yɔ bubuni to. Fo alɛ kpele fo anishi n lɛ ashi ma alubi so.

¹⁸ Esa kama nɛ e wɔ bubuni to maaŋ naŋ tiŋ ŋ kpaŋ fo; bubuni maaŋ naŋ tiŋ n yirda fo kashenteŋji.

¹⁹ Basa nɛ b wɔ ŋkpa to e naa kpaŋ fo, fanɛ kananɛ mee kpaŋ fo naniere na. Bekurgepo bee kaŋɛ bumo be mbia fo kashenteŋji be asheŋ.

²⁰ Enyɛnpe Ebɔrɛ, fo e chɛ ma kulɔ. Amoso, anyeeŋ laŋ ejaŋjilaŋ m boŋ nshɛ ŋ kpaŋ fo. Anyi be kebaawɔtɔ to kikɛ, anyeeŋ boŋ nshɛ ŋ kpaŋ fo ashi fo bɔrɛlambu to.

²¹ Pɔɛŋ nɛ ewura Hɛzekaya nya alenfia nseŋ boŋ kashɛ na, anebi Aizaaya daŋ kaŋɛ mo nna fanɛ e shin nɛ b kɔr kedibi nɛ baa tre figi na be afantaŋ m mata mbe kechuu bɔbɔ na so.

²² Kumo be kaman nɛ ewura Hɛzekaya bishi le: “Manɛ e naaŋ ŋini fanɛ meeŋ naaŋ tiŋ n yɔ Enyɛnpe Ebɔrɛ be bɔrɛlambu to n ya shuŋ mo?”