Aizaaya 37 - EBƆRƐ BE KAWƆL

Ewura Hɛzekaya ka fin Aizaaya be kasotoji be asheŋ

¹ Ewura Hɛzekaya ka nu kubɔya nɛ Asiriya be benapo be ejuŋkparpo kaŋɛ na, nɛ mbe kagbene jija mo ga nɛ e kpɛa mbe asɔbuuso to nseŋ ta keeli be asɔbuuso m buu n yɔ Enyɛnpe Ebɔrɛ na be bɔrɛlambu to.

² Kumo be kaman nɛ e shuŋi Eliakim nɛ e bee keni ewura be laŋ so na nɛ Shɛbna nɛ e la ewura be esibɛpo nɛ bɔrɛmatapo nimusoana na ma, anebi Aizaaya kutɔ. Bumo alɛ gba daŋ buu keeli be asɔbuuso nna m ba.

³ Kubɔya nɛ ewura Hɛzekaya ta n shuŋi bumo nɛ b ba sa ma nde: “Kabre la awurfoŋ be kachɛ nna n sa anyi, ŋkpal loŋ so an wɔ kasogberge nɛ ŋaba to nna. An du fanɛ eche nɛ e bee kurge a gben nsaa maŋ naa kɔ eleŋ nɛ e kaŋto ŋ kurge nna.

⁴ Asiriya be ewurgboŋ shuŋi mbe benapo be ejuŋkparpo nna nɛ e ba tege Ebɔrɛ nɛ e bee sa ŋkpa na. Enyɛnpe fo Ebɔrɛ na e naaŋ nu katege ere kikɛ nseŋ gberge basa nɛ baa tege mo na kusoe. Amoso kule Ebɔrɛ n sa anyi be basa nɛ b kraa wɔ ŋkpa to na.”

⁵ Ewura Hɛzekaya be benimu nɛ e shuŋi na ka kaŋɛ ma kubɔya na,

⁶ nɛ ŋ kaŋɛ bumo le: “Enyɛnpe Ebɔrɛ na kaŋɛ fanɛ men sa maa lɔ kufu ŋkpal kusɔ nɛ Asiriyaebi na kaŋɛ na so, fanɛ mo ere Ebɔrɛ na maaŋ tiŋ m mɔlga menyi na.

⁷ Asiriya be ewurgboŋ na beeŋ nu b yɛ b yɛ be kubɔya ko, nɛ k shin nɛ e bɛta n yɔ mo gbagba be efuli so nɛ b ya mɔ mo ndoŋ.”

Asiriyaebi ka naŋ ta kafunti be kubɔya n shuŋi n ya sa Judaebi na be asheŋ

⁸ Asiriya be benapo be ejuŋkparpo na ka nu fanɛ bumo be ewurgboŋ lar Lakish be kadegboŋ to n ya kaa kɔ Libna be kadegboŋ nɛ k mata ndoŋ na kena, nɛ e yɔ ndoŋ nɛ e ya bishi mo kusɔ nɛ e beeŋ wora.

⁹ Loŋ be jemanɛ na gbagba nɛ Asiriya be ewurgboŋ, Sennakerɛb, nu fanɛ Itiopia be ewura, Tɛhaka wɔ ekpa to a ba nɛ e ba kɔ mo kena. Ndoŋ nna nɛ ewurgboŋ Sennakerɛb shuŋi mbɔ fanɛ b ta kawɔlbi ko n ya sa Juda be ewura, Hɛzekaya.

¹⁰ Kusɔ nɛ e kaŋɛ kawɔlbi na to nde: “Sa maŋ ta fo yirda n wɔtɔ fo Ebɔrɛ na to ŋko n shin nɛ mbe kekaŋɛ fanɛ Asiriya be ewura maaŋ tiŋ ŋ kɔ n sɔ Jerusalɛm na e fule fo.

¹¹ Fo nu kananɛ anyi Asiriya be bewura mur efuli pɔtɛana ko cheche be asheŋ. Nɛ manɛ so nɛ fee fɛ fanɛ shɛŋ shɛŋ maaŋ tiŋ n wora fo ere?

¹² N nananyɛnana e daŋ mur ndegboŋ nɛ baa tre Gozan nɛ Haran nɛ Rezef, nseŋ mɔ Bɛtaden be basa nɛ b daa wɔ Tɛlassa na gba. Bumo be agbirana daŋ maŋ tiŋ m mɔlga bumo.

¹³ Bewura nɛ b daa wɔ ndegboŋ nɛ baa tre Hamaf nɛ Apad nɛ Sefavaim nɛ Hena nɛ Iwa na kikɛ maŋ naa wɔtɔ. Bumo kikɛ mur!”

¹⁴ Ewura Hɛzekaya ka sɔ kawɔlbi na ashi mbɔ na kutɔ nɛ e kraŋ kumo nseŋ ta kumo n yɔ bɔrɛlambu na to n ya bugi kumo to n nase Enyɛnpe Ebɔrɛ na be anishito.

¹⁵ Kumo be kaman nɛ e kule Ebɔrɛ ŋ kaŋɛ le:

¹⁶ “Enyɛnpetale Israɛl be Ebɔrɛ, fo e chena fo kuwurputi so awɔlto nɛ emalaika nɛ baa tre chɛrubim na wɔ fo aya ase. Fo nawule e la Ebɔrɛ. Fo e to esoso nɛ kasawule nsaa ji kuwura durnya be kuwurjiana kikɛ so.

¹⁷ Keni kananɛ Asiriya be ewura, Sennakerɛb bee tege fo Ebɔrɛ nɛ fee sa ŋkpa na loŋ.

¹⁸ Enyɛnpe Ebɔrɛ, kashenteŋ nna fanɛ Asiriya be bewuraana mur efuli damtaana nseŋ shin nɛ amo be nsawule dese fuloŋ.

¹⁹ Bumo alɛ daŋ naŋ chɔɔ efuliana na be agbirana nɛ b ta ndibi nɛ ajembu n lɔŋɛ a shuŋ nna.

²⁰ Ama fo ere la Enyɛnpe, anyi be Ebɔrɛ nna! Anyee kule fo nna nɛ fo mɔlga anyi ashi Asiriya be ewura be enɔ to, saŋɛ na so, ekama nɛ e wɔ durnya to be efuli kama so, beeŋ pin fanɛ fo nawule e la Ebɔrɛ.”

Kubɔya nɛ Aizaaya ta n shoŋi Ewura Hɛzekaya na be asheŋ

²¹ Ndoŋ nna nɛ ma anebi Aizaaya ta kubɔya ere n shuŋi n ya sa ewura Hɛzekaya a kaŋɛ mo kusɔ

²² nɛ Enyɛnpe Ebɔrɛ na malga a laŋɛ mbe kabɔrɛkule na be kaplɛa so. E yɛ: “Sennakerɛb, Jerusalɛm be basa bee mushe fo nna nsaa fɛl fo a keni fo jiga.

²³ Wanɛ nɛ fo daa fɛ fanɛ fee tege nsaa wora eyurto na? Ma, Israɛl be Ebɔrɛ cheembi na nɛ fo daa maa sa bunyaŋ na.

²⁴ Fo daŋ shuŋi fo mbɔ nna nɛ b ba kaa puchi menyi ka daŋ ta menyi be egbaŋɛturko n dii n yɔ Lebanɔn be kebee be awɔlto n ya kɔ m pɔɔ so ashi ma Enyɛnpe Ebɔrɛ na be anishito. Men daa puchi fanɛ men daŋ tiŋ ŋ ku sida be ndibi tenteŋ nɛ seprɛs be ndibi lelaana n lɛ nna ashi kebee na so hale n ya fo kupo na be nferinto.

²⁵ Fo daŋ puchi fanɛ men daŋ kur atirbu ashi efuli pɔtɛana so nseŋ nuu amo to be nchu. Kumo be kaman menyi be benapo be aya gba chichi Lɔrgboŋ nɛ baa tre Nail na gba so nɛ k wɔlto.

²⁶ Menyi maŋ pin to fanɛ ma, Enyɛnpe Ebɔrɛ na e kre kumo loŋ dra na kikɛ nɛ naniere k wora m bɔlɔ so na. Ma e sa menyi eleŋ nɛ men tiŋ n shin nɛ ndegboŋ lempoana ki alambure na.

²⁷ Basa nɛ b daa wɔ ndegboŋ na to daŋ maŋ naa kɔ eleŋ nna, ŋkpal kufu ka daŋ pɛ bumo nɛ eburma tɔr bumo so so. B daa du fanɛ kudɔ to be afitiri nna ŋko afitiri popɔrbi nɛ e kɔr ebu be esoso nɛ epeŋilarkpa be afu tushi so ber amo so nɛ e wu nna.

²⁸ Ama ma ere nyi kusɔ kama a laŋɛ fo kaplɛa so. N nyi kusɔ nɛ fee wora nɛ kakpa nɛ fee yɔ kikɛ. Ma alɛ naa nyi kananɛ fee nya agbo ga a wora ma.

²⁹ N wu fo kamoowu nɛ agbogboŋ na kikɛ. Naniere meeŋ ta dariwa n wɔtɔ fo kamuna to nseŋ ta kebarga n wɔtɔ fo kɔnɔ to. Kumo be kaman nɛ n ta fo m bɔla ekpa nɛ fo bɔla so m ba na m bɛta n yɔ kakpa nɛ fo shi m ba.”

³⁰ Ade kikɛ be kaman nɛ anebi Aizaaya kaŋɛ ewura Hɛzekaya le: “Kusɔ nɛ k beeŋ wora be tɔɔnɛ nde. Kafɛ ere nɛ kafɛ a ba kikɛ menyi maaŋ dɔ n duu shɛŋ ama menyi alɛ beeŋ nya akɔrbua n teŋi n ji. Ama kafɛ nɛ k bɛ so kesasopo na bre, menyeeŋ dɔ n duu ayu n teŋi nseŋ duu ndibi sɔrso n nya amo be asɔrso n chuge n ji.

³¹ Basa nɛ baaŋ ji efute ashi Juda be efuli so na beeŋ purge fanɛ aduuso nɛ amo be achin yɔ kasawule to nɛ e wora nɛnɛ na.

³² Basa ko beeŋ ji efute ashi Jerusalɛm to nɛ Zayɔn be kebee so, ŋkpal manɛ so, Enyɛnpetale Ebɔrɛ na gbagba e naŋ shin nɛ loŋ e wora.

³³ Kusɔ nɛ Enyɛnpe Ebɔrɛ na kaŋɛ a laŋɛ Asiriya be ewurgboŋ na be kaplɛa so nde. E yɛ: ‘Asiriya be ewurgboŋ maaŋ nya n luri kadegboŋ na to ŋko n to ketanyembi koŋwule gba ashi kumo to. Mbe benapo nɛ b keta abɛlso be asɔ kuŋamuso a kuŋ bumo be amu maaŋ taga kadegboŋ na to. Bumo alɛ maaŋ nya n dɔ ashigboŋ ŋ kulti kumo kikɛ n wɔtɔ m bɔla amo so n dii n luri kumo to.

³⁴ Ekpa nɛ e bɔla so m ba na nɛ e beeŋ naŋ bɔla so n yɔ nɛ e maŋ nya n luri kadegboŋ na to. Ma, Enyɛnpe Ebɔrɛ na e kaŋɛ na.

³⁵ Meeŋ kuŋ kadegboŋ na ŋkpal ŋ gbagba be kemaŋkura nɛ kɔnɔ nɛ n nase n sa ma kayɛrbi Deevid nɛ e daa la ewura ashi Jerusalɛm to jemanɛ ko na so.’ ”

Ewurgboŋ Sennakerɛb be luwu be asheŋ

³⁶ Ade kikɛ be kaman nɛ Enyɛnpe Ebɔrɛ na shin nɛ mbe malaika yɔ Asiriya be basa be keeyi to n ya mɔ benapo ŋgboŋ kalfa nɛ aduburwa nɛ anu. Kare ka chɛ kachipurdidi, nɛ bumo kikɛ wu a dese!

³⁷ Ndoŋ nna nɛ Asiriya be ewurgboŋ, Sennakerɛb bɛta n yɔ mbe ewurkpa ashi Asiriya be efuli so be kadegboŋ nɛ baa tre Ninɛve na.

³⁸ Kachako e ka yɔ mbe kegbir be lambu to n ya kaa shuŋ mbe kegbir nɛ baa tre Nishrɔk na, nɛ mbe mbinyɛnsobi anyɔ nɛ baa tre bumo Adremalɛk nɛ Shareza na ta bumo be etokobi m mɔ mo ndoŋ. Kumo be kaman nɛ b shile n yɔ Ararat be kasawule so nɛ mo pibinyɛn nɛ baa tre Essahaddɔn na sɔ mo so ŋ ki ewura.