Aizaaya 35 - EBƆRƐ BE KAWƆL

Kecheembiya be ekpa be asheŋ

¹ Kiyi be kagbene beeŋ fuli kumo, nɛ ndibi be atoto e purge ashi kasawule nɛ k dese jiga so.

² Kiyi beeŋ purge kaplɛkama nseŋ boŋ kagbenefuli be nshɛ. K beeŋ baa walɛ fanɛ Lebanɔn be abee nsaa kɔ eleŋ fanɛ kebee nɛ baa tre Kamɛl na, ŋko ketaŋɛ nɛ baa tre Sharɔn na be adɔsawule. Kumo be kaman nɛ ekama e wu Enyɛnpe Ebɔrɛ na be kemaŋkura, nɛ mbe keshi nɛ eleŋgboŋ.

^3-4 Kubɔya nɛ k wɔtɔ n sa bekama nɛ b maŋ kɔ eleŋ nsaa chicha na nde; bumo e la basa nɛ baa fɔŋ na: “Men nya kenyɛn nsaa maa ŋana kufu. Menyi be Ebɔrɛ bee ba nɛ e ba gberge men doŋana kusoe. Ebɔrɛ beeŋ sɔ menyi be kɔnɔ ŋ kɔ n m mɔlga menyi.”

⁵ Etanpo beeŋ naŋ nya anishi a wu, nɛ ekpawu e nya asoe a nu.

⁶ Ebobi beeŋ nya aya a tɛ to a cha, nɛ eneemu a nya nnɔ a boŋ to kagbenefuliso Mbombi beeŋ fara a shile kiyi to;

⁷ nɛ shishɛrpumpuŋ tushiso e ki apa, nɛ nsawule nɛ a wɔl a dese kikɛ e nya abuye amo so. Kakpa nɛ ejiŋkaamu daa wɔ na, beeŋ ki kakpa nɛ agasa nɛ achufitiri bee kɔr.

⁸ Kegbembi lela beeŋ ba dese ndoŋ, nɛ b baa tre kumo “Kecheembiya be ekpa.” K beeŋ baa la Ebɔrɛ be basa be ekpa. Esa nɛ e maa shuŋ Ebɔrɛ maaŋ nite kumo so. Bewulpo gba maaŋ nite loŋ be kegbembi na so.

⁹ Ebuluŋ maaŋ baa wɔ ekpa na so, asɔbɔya nɛ a bee keta kufu maaŋ mata ekpa na gba. Basa nɛ Enyɛnpe Ebɔrɛ na kɔ n suge na e naaŋ bɔla ekpa na so n yɔ epe.

¹⁰ Baaŋ ta kagbenefuli nɛ nshɛ n wora awɔr n ya luri Jerusalɛm to. Bumo alɛ be ŋgbene beeŋ fuli bumo mbaanaayɔ; ŋkpal manɛ so, kagbenejija nɛ kafɔŋ maaŋ naa wɔtɔ.